ໃນວັນທີ 10 ເມສາ 2026 ທີ່ ຫ້ອງວ່າການສໍານັກງານປະທານປະເທດ (ຫສປທ) ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານ ປະຈໍາປີ 2025 ແລະ ທິດທາງແຜນການປີ 2026 ຂອງ ຫສປທ, ໂດຍການເຂົ້າຮ່ວມເປັນປະທານຂອງທ່ານ ນາງ ຟອງສະໝຸດ ອັ່ນລາວັນ ເລຂາຄະນະບໍລິຫານງານພັກ, ຫົວໜ້າ ຫສປທ, ມີຮອງ ຫົວໜ້າ ຫສປທ, ບັນດາຫົວໜ້າກົມ - ຮອງກົມ, ຄະນະພະແນກ ແລະ ພະນັກງານ-ລັດຖະກອນ ພາຍໃນ ຫສປທ ກໍໄດ້ເຂົ້າຮ່ວມ.

          ໃນກອງປະຊຸມດັ່ງກ່າວໄດ້ມີການທົບທວນ, ຕີລາຄາຜົນໄດ້ຮັບໃນການຈັດຕັ້ງປະຕິບັດ ບັນດາວຽກງານໃນປີ 2025 ທີ່ຜ່ານມາຊຶ່ງເປັນປີມ້ວນທ້າຍຂອງການຈັດຕັ້ງປະຕິບັດແຜນພັດທະນາ ຫສປທ 5 ປີ ຄັ້ງທີ I ຂອງ ຫສປທ ແລະ  ພ້ອມກັນປຶກສາຫາລື, ຖອດຖອນບົດຮຽນ ແລະ ເອກະພາບ ຕໍ່ບົດສະຫຼຸບ ແລະ ທິດທາງແຜນການ ວຽກງານຈຸດສຸມໃນປີ 2026 ພ້ອມທັງມາດຕະການຈັດຕັ້ງປະຕິບັດທິດທາງແຜນການດັ່ງກ່າວ.

          ໃນໂອກາດດັ່ງກ່າວ ຍັງໄດ້ມີພິທີມອບ ໃບຍ້ອງຍໍ ບຸກຄົນ ແລະ ກົມກອງ ທີ່ມີຜົນງານດີເດັ່ນ ໃນການຈັດຕັ້ງປະຕິບັດ ວຽກງານປະຈໍາປີ 2025 ໃຫ້ກຽດມອບໃບຍ້ອງຍໍ ໂດຍ ທ່ານຫົວໜ້າ ແລະ ຮອງຫົວໜ້າຫ້ອງວ່າການສໍານັກງານປະທານປະເທດ ຕາມລໍາດັບ.