ໃນວັນທີ 29 ພະຈິກ 2024 ທີ່ ທຳນຽບປະທານປະເທດ, ການນຳຂັ້ນສູງ ພັກ-ລັດຖະບານລາວ ນຳໂດຍ     ທ່ານ ທອງລຸນ ສີສຸລິດ ປະທານປະເທດ ໄດ້ຕ້ອນຮັບການເຂົ້າອວຍພອນ ຂອງບັນດາທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ   ສປປ ລາວ ນຳໂດຍ ທ່ານ ໂອຮານ ໄອຊິກ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ຕວັກກີ ປະຈໍາ ສປປ ລາວ, ທູດອາວຸໂສ ເນື່ອງໃນໂອກາດວັນສະຖາປະນາ ສປປ ລາວ ຄົບຮອບ 49 ປີ ແລະ ປີໃໝ່ສາກົນ 2025.

       ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ມາຍັງທ່ານທູດອາວຸໂສ ໃນນາມຕາງໜ້າຄະນະທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ທີ່ໄດ້ກ່າວຄຳອວຍພອນ ດ້ວຍຄຳເວົ້າອັນຈົບງາມ ຕໍ່​ ສາທາລະນະລັດ ປະຊາທິປະໄຕ ປະຊາຊົນລາວ ກໍ​ຄື ລັດ​ຖະ​ບານ ແລະ ປະ​ຊາ​ຊົນລາວ ຊຶ່ງເປັນການຢັ້ງຢືນ ແລະ ສະແດງເຖິງໄມຕີຈິດ ມິດຕະພາບ ແລະ ການຮ່ວມມືອັນດີ ລະຫວ່າງປະເທດຂອງບັນດາທ່ານ ແລະ ອົງການຈັດຕັ້ງສາກົນຕ່າງໆ ມີຕໍ່ ສປປ ລາວ, ທັງເປັນກໍາລັງໃຈອັນໃຫຍ່ຫຼວງໃຫ້ແກ່ ລັດຖະບານ ແລະ ປະຊາຊົນລາວ ໃນການສືບຕໍ່ປະຕິບັດພາລະກິດ ແຫ່ງການປົກປັກຮັກສາ ແລະ ສ້າງສາພັດທະນາປະເທດ ສືບຕໍ່ໄປຢ່າງບໍ່ຢຸດຢັ້ງ.

          ທ່ານ ທອງລຸນ ສີສຸລິດ ກ່າວອີກວ່າ: ປະຊາຊົນລາວ ມີຄວາມເອກອ້າງທະນົງໃຈຕໍ່ບັນດາຜົນງານ ທີ່ ສປປ ລາວ ບັນລຸໄດ້ບົນເສັ້ນທາງທີ່ລະອິດລະອ້ຽວ ແຫ່ງການພັດທະນາ ໃນຕະຫຼອດໄລຍະ 49 ປີຜ່ານມາ. ໃນໂອກາດນີ້, ພວກຂ້າພະເຈົ້າ  ບໍ່ພຽງແຕ່ສະແດງຄວາມຮູ້ບຸນຄຸນ ຕໍ່ການເສຍສະຫຼະ ຂອງຄົນຮຸ່ນກ່ອນທີ່ໄດ້ນຳພາ ພາລະກິດຕໍ່ສູ້ນຳເອົາເອກະລາດມາໃຫ້ປະເທດຊາດ ແລະ ສືບຕໍ່ນຳພາພາລະກິດພັດທະນາປະເທດຊາດ ຕາມແນວທາງປ່ຽນແປງໃໝ່ ເທົ່ານັ້ນ, ຫາກຍັງແມ່ນໂອກາດໄດ້ຮັບຮູ້ ແລະ ຢືນຢັນເຖິງຄວາມສາມັກຄີເປັນປຶກແຜ່ນ ແລະ ຄວາມຕັດສິນໃຈ ຂອງປະຊາຊົນລາວບັນດາເຜົ່າ ພາຍໃຕ້ການນຳພາ ຂອງພັກ ແລະ ລັດຖະບານ ເພື່ອພ້ອມກັນ ສືບຕໍ່ສ້າງອະນາຄົດອັນສົດໃສ ເພື່ອພັດທະນາປະເທດຊາດ ໃຫ້ຈະເລີນກ້າວໜ້າ ແລະ ສ້າງຄວາມວັດທະນະຖາວອນຕໍ່ໄປ ຢ່າງບໍ່ຢຸດຢັ້ງ.

          ໃນປີ 2024, ເຖິງວ່າ ສປປ ລາວ ຈະຜະເຊີນກັບຄວາມຫຍຸ້ງຍາກ ແລະ ສິ່ງທ້າທາຍນາໆປະການກໍຕາມ, ແຕ່ດ້ວຍຄວາມພະຍາຍາມຂອງທົ່ວລະບົບການເມືອງ, ການບໍລິຫານ-ຄຸ້ມຄອງຂອງລັດຖະບານ ແລະ ຄວາມສາມັກຄີເປັນຈິດໜຶ່ງໃຈດຽວ ຂອງປະຊາຊົນລາວທັງຊາດ, ບວກກັບການສະໜັບສະໜູນ ແລະ ຊ່ວຍເຫຼືອຂອງເພື່ອນມິດສາກົນ ເຮັດໃຫ້ ສປປ ລາວ ສາມາດແກ້ໄຂບັນຫາຄວາມຫຍຸ້ງຍາກໄດ້ໂດຍພື້ນຖານ, ເສດຖະກິດມີການຂະຫຍາຍຕົວໃນລະດັບທີ່ດີຂຶ້ນ ຊຶ່ງເປັນການຄ້ຳປະກັນໃຫ້ປະເທດຊາດ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ, ສ້າງປັດໄຈສໍາຄັນ ໃນການກະກຽມຄວາມພ້ອມ ໃນການນໍາເອົາປະເທດ ອອກຈາກສະຖານະພາບດ້ອຍພັດທະນາ ໃນອະນາຄົດອັນໃກ້ນີ້ ຕາມການກຳນົດຂອງອົງການສະຫະປະຊາຊາດ. ໃນໂອກາດ, ທ່ານປະທານປະເທດ ຍັງໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຢ່າງຈິງໃຈ ມາຍັງບັນດາປະເທດເພື່ອນມິດ ແລະ ອົງການຈັດຕັ້ງສາກົນ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອໃນດ້ານຕ່າງໆ ຕະຫລອດໄລຍະຜ່ານມາ ຊຶ່ງເປັນການປະກອບສ່ວນສຳຄັນເຂົ້າໃນຜົນສຳເລັດຮອບດ້ານຂອງ ສປປ ລາວ,  ລວມທັງການສະໜັບສະໜູນໃຫ້ແກ່ ສປປ ລາວ ໃນການເຮັດໜ້າທີ່ເປັນປະທານອາຊຽນ ໃນຕະຫຼອດປີ 2024 ໃຫ້ສໍາເລັດລຸລ່ວງໄປໄດ້ເປັນຢ່າງດີ. ພ້ອມນີ້, ສປປ ລາວ ຈະສືບຕໍ່ປະກອບສ່ວນຢ່າງຕັ້ງໜ້າເຂົ້າໃນຄວາມພະຍາຍາມ ຂອງວົງຄະນະຍາດສາກົນ ໃນຂອບການຮ່ວມມືຕ່າງໆ ທີ່ຕົນເປັນພາຄີ ເພື່ອສົ່ງເສີມສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການຮ່ວມມື ເພື່ອການພັດທະນາທີ່ຍືນຍົງ ໃນພາກພື້ນ ແລະ ໃນໂລກ.

          ທ່ານປະທານປະເທດ ໄດ້ກ່າວຕື່ມວ່າ: ປີ 2025 ທີ່ຈະມາເຖິງນີ້ ເປັນປີທີ່ມີຄວາມໝາຍສໍາຄັນ ສໍາລັບ ສປປ ລາວ ເນື່ອງຈາກເປັນປີຄົບຮອບ 50 ປີ ແຫ່ງການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ, ເປັນປີຄົບຮອບ 70 ປີ ຂອງການເຂົ້າເປັນສະມາຊິກ ອົງການສະຫະປະຊາຊາດ ຂອງ ສປປ ລາວ, ທັງເປັນປີມ້ວນທ້າຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ເປັນປີແຫ່ງການກະກຽມຄວາມພ້ອມ ໃນການອອກຈາກສະຖານະພາບປະເທດດ້ອຍພັດທະນາ ໃນປີ 2026, ພ້ອມທັງ ເຊື່ອໝັ້ນວ່າການທີ່ ສປປ ລາວ ສືບຕໍ່ໄດ້ຮັບການສະໜັບສະໜູນ ແລະ ຊ່ວຍເຫຼືອຂອງ ບັນດາປະເທດເພື່ອນມິດ ແລະ ອົງການຈັດຕັ້ງສາກົນບວກກັບກຳລັງແຮງແຫ່ງການເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ ຂອງປະຊາຊົນໃນຊາດ ຈະກາຍເປັນກຳລັງຂັບເຄື່ອນອັນແຂງແຮງເພື່ອຊ່ວຍໃຫ້ ສປປ ລາວ ບັນລຸຕາມເປົ້າໝາຍທີ່ວາງໄວ້ຢ່າງແນ່ນອນ.

          ໃນໂອກາດນີ້, ທ່ານ ໂອຮານ ອີຊິກ ໄດ້ຕາງໜ້າໃຫ້ແກ່ບັນດາທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ລາວ  ສະແດງຄວາມຊົມເຊີຍອັນອົບອຸ່ນ ຕໍ່ການນຳຂັ້ນສູງ ພັກ-ລັດຖະບານ ແລະ ປະຊາຊົນ ແຫ່ງ ສປປ ລາວ ໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 49 ປີ, ສະແດງຄວາມຊົມເຊີຍ ຕໍ່ຜົນສຳເລັດອັນດີເລີດໃນການເປັນປະທານອາຊຽນ ຂອງ ສປປ ລາວ ກໍຄື ບັນດາກອງປະຊຸມຕ່າງໆທີ່ໄດ້ດຳເນີນ ແລະ ສຳເລັດລົງຢ່າງຈົບງາມໃນຕະຫລອດປີນີ້, ພ້ອມທັງ ສະແດງຄວາມຮູ້ບຸນຄຸນມາຍັງ ລັດຖະບານ ແຫ່ງ ສປປ ລາວ ທີ່ໄດ້ສ້າງສະພາບແວດລ້ອມອັນເອື້ອອຳນວຍ ໃຫ້ແກ່ການປະຕິບັດໜ້າທີ່ວຽກງານ ຂອງພວກຂ້າພະເຈົ້າ ຢູ່ໃນ ສປປ ລາວ ແລະ ຢືນຢັນວ່າ ພວກຂ້າພະເຈົ້າ ຈະສືບຕໍ່ເສີມຂະຫຍາຍການຮ່ວມມື ລະຫວ່າງ ສປປ ລາວ ແລະ ບັນດາປະເທດຂອງພວກຂ້າພະເຈົ້າ ບົນຈິດໃຈ ແຫ່ງ ມິດຕະພາບ ແລະ ຄວາມສາມັກຄີປອງດອງ.