ໃນວັນທີ 23 ຕຸລາ 2024 ນີ້, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ອິວຮາມ ເຮດາ ອັກລື ອາລີເຢບ (H.E. Mr. Ilham Heydar oglu Aliyev) ປະທານາທິບໍດີ ແຫ່ງ ສາທາລະນະລັດ ອາແຊັກໄບຊານ ໃນໂອກາດເຂົ້າຮ່ວມ ກອງປະຊຸມສຸດຍອດກຸ່ມ BRICS ແລະ ປະເທດກໍາລັງພັດທະນາໃນເຂດໂລກໃຕ້ ທີ່ເມືອງກາຊານ, ສ ຣັດ ເຊຍ ເພື່ອປຶກສາຫາລືສົ່ງເສີມການພົວພັນຮ່ວມມື ລະຫວ່າງສອງປະເທດ ໃຫ້ຂະຫຍາຍຕົວຍິ່ງໆຂຶ້ນ.

          ການພົບປະຄັ້ງນີ້, ສອງຝ່າຍໄດ້ສະແດງຄວາມປິຕິຍິນດີ ທີ່ໄດ້ມີໂອກາດພົບປະກັນໃນຄັ້ງນີ້ ແລະ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ ແລະ ອາແຊັກ​ໄບຊານ ທີ່ໄດ້ຮັບການພັດທະນາເປັນກ້າວໆ ນັບແຕ່ສ້າງຕັ້ງສາຍພົວພັນການທູດນໍາກັນ ໃນປີ 1995 ເປັນຕົ້ນມາ ໂດຍໄດ້ມີການແລກປ່ຽນ ການຢ້ຽມຢາມຂອງເຈົ້າໜ້າທີ່ລະດັບສູງ ແລະ ມີການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ; ສອງ​ຝ່າຍ ຢືນ​ຢັນ​ຄວາມ​ມຸ່ງ​ໝັ້ນ​​ ໃນການ​ເສີມ​ຂະ​ຫ​ຍາຍ​ການ​ພົວ​ພັນ ລະ​ຫວ່າງ​ສອງ​ປະ​ເທດ ​ໃຫ້​ນັບ​ມື້​ກວ້າງ​ຂວາງ ແລະ​ ແໜ້ນ​ແຟ້ນ ໂດຍສະ​ເພາະ​ໂອ​ກາດ ຄົບ​ຮອບ 30 ປີ ແຫ່ງ​ການ​ສ້າງ​ຕັ້ງ​ສາຍ​ພົວ​ພັນ​ການ​ທູດ ລະ​ຫວ່າງ ສອງ​ປະ​ເທດ ທີ່​ຈະ​ມາ​ເຖິງ​​ນີ້ ​ຈະ​ໄດ້​ຮ່ວມ​ກັນ​ແລກ​ປ່ຽນ​ການ​ຢ້ຽມ​ຢາມ​ ເຊິ່ງ​ກັນ ແລະ ກັນ. ພ້ອມນັ້ນ, ສອງ​ຝ່າຍ ຍັງ​ໄດ້ແລກ​ປ່ຽນ​ຄວາມ​ຄິດ​ເຫັນ​ກ່ຽວ​ກັບ​ ການ​ເສີມ​ຂະ​ຫ​ຍາຍ​ການ​ພົວ​ພັນຮ່ວມ​ມື​ ດ້ານ​ເສດ​ຖະ​ກິດ-ສັງ​ຄົມ​ ​ແລະ ເປັນ​ເອ​ກະ​ພາບ​ກັນ ໃຫ້​ມີ​ການ​ສ້າງ​ຕັ້ງ​ກົນ​ໄກ​ປຶກ​ສາ​ຫາ​ລື ແລະ ຮ່ວມ​ມື ທາງ​ດ້ານ​ເສດ​ຖະ​ກິດ-ສັງ​ຄົມ ລະ​ຫວ່າງ​ສອງ​ປະ​ເທດ ໃນ​​ຕໍ່​ໜ້າ ເພື່ອສົ່ງ​ເສີມການຄ້າ, ການລົງທຶນ, ການສຶກສາ, ພະ​ລັງ​ງານ, ການທ່ອງທ່ຽວ ແລະ ດ້ານອື່ນໆ.   
          ໃນໂອກາດນີ້, ທ່ານ ທອງລຸນ ສີສຸລິດ ໄດ້ເຊື້ອເຊີນ ທ່ານ ອິວຮາມ ເຮດາ ອັກລື ອາລີເຢບ ປະທານາທິບໍດີ ແຫ່ງ ສ ອາແຊັກໄບຊານ ເດີນທາງຢ້ຽມຢາມ ສປປ ລາວ ຢ່າງເປັນທາງການ ໃນໂອກາດທີ່ສະດວກ ແລະ ເໝາະສົມ ເຊິ່ງ ທ່ານ ປະທານາທິບໍດີ ແຫ່ງ ສ ອາແຊັກໄບຊານ ກໍໄດ້ຕອບຮັບ ການເຊື້ອເຊີນດັ່ງກ່າວ.