ໃນວັນທີ 28 ສິງຫາ 2024 ທີ່ຫ້ອງວ່າການສູນກາງພັກ ໄດ້ຈັດພິທີເຊັນບົດບັນທຶກຮ່ວມ ລະຫວ່າງ ຫ້ອງວ່າການສູນກາງພັກ, ຫ້ອງວ່າການສຳນັກງານປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ ແລະ ຫ້ອງວ່າການສະພາແຫ່ງຊາດ ກ່ຽວກັບລະບອບ, ກົນໄກ ແລະ ວິທີເຮັດວຽກ ໂດຍມີ ທ່ານ ທອງສະລິດ ມັງໜໍ່ເມກ ຫົວໜ້າຫ້ອງວ່າການສູນກາງພັກ, ທ່ານ ນາງ ເຂັມມະນີ ພົນເສນາ ຫົວໜ້າຫ້ອງວ່າການສຳນັກງານປະທານປະເທດ, ທ່ານ ບົວຄົງ ນາມມະວົງ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແລະ ທ່ານ ນາງ ອຳໄພວັນ ລ້ອມບຸນແພງ ເລຂາທິການສະພາແຫ່ງຊາດ ຮ່ວມລົງນາມເຊັນບົດບັນທຶກ, ມີຮອງຫົວໜ້າ ຫ້ອງວ່າການສູນກາງພັກ, ຫົວໜ້າ ແລະ ຮອງຫົວໜ້າກົມພາຍໃນ 4 ຫ້ອງວ່າການເຂົ້າຮ່ວມ.

          ເພື່ອຮັບປະກັນໃຫ້ຫ້ອງວ່າການຂັ້ນສູນກາງ ສາມາດເຄື່ອນໄຫວວຽກງານຂອງຕົນ ໃນການເປັນເສນາທິການໃຫ້ແກ່ສູນກາງພັກ, ປະທານປະເທດ, ລັດຖະບານ, ສະພາແຫ່ງຊາດ ນັ້ນ ກົມການເມືອງສູນກາງພັກໄດ້ອອກມະຕິຕົກລົງ ສະບັບເລກທີ 63/ກມສພ, ລົງວັນທີ 9 ຕຸລາ 1993 ວ່າດ້ວຍຫຼັກການ ແລະ ລະບຽບການ ໃນການພົວພັນປະສານສົມທົບວຽກງານ ລະຫວ່າງ 4 ຫ້ອງວ່າການ ໂດຍກໍານົດກົນໄກ, ລະບອບ, ວິທີເຮັດວຽກ, ການປະສານສົມທົບ ລະຫວ່າງ 4 ຫ້ອງວ່າການ ຢ່າງຈະແຈ້ງ ແລະ ເປັນລະບົບ ຊຶ່ງສ້າງເງື່ອນໄຂ ອັນສໍາຄັນ ໃຫ້ 4 ຫ້ອງວ່າການ ເຮັດຫຼ້ອນໜ້າທີ່ ຂອງຕົນເປັນກ້າວໆຈົນມາເຖິງປັດຈຸບັນ.

          ບົນຈິດໃຈດັ່ງກ່າວນັ້ນ, ໃນສະໄໝທີ XI ນີ້ ກົມການເມືອງສູນກາງພັກ, ຄະນະເລຂາທິການສູນກາງພັກ ໂດຍສະເພາະແມ່ນສະຫາຍເລຂາທິການໃຫຍ່ ແລະ ສະຫາຍຜູ້ປະຈໍາການຄະນະເລຂາທິການສູນກາງພັກ ກໍໄດ້ມີທິດຊີ້ນໍາ ເພື່ອຜັນຂະຫຍາຍກົດລະບຽບ ຂອງພັກ, ມະຕິຕົກລົງ ວ່າດ້ວຍລະບອບແບບແຜນວິທີເຮັດວຽກຂອງສູນກາງພັກ, ຂອງກົມການເມືອງ ແລະ ຄະນະເລຂາທິການສູນກາງພັກ ສະໄໝທີ XI ກ່ຽວກັບການປັບປຸງລະບອບນໍາພາ, ແບບແຜນເຮັດວຽກ ກໍຄື ການຊີ້ນໍາ-ນໍາພາ ແກ້ໄຂບັນຫາ ລະຫວ່າງການນໍາ ຂອງພັກ, ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ກໍຄື ຄະນະພັກ ກະຊວງ, ອົງການ ແລະ ທ້ອງຖິ່ນ ໃຫ້ມີຄວາມຄ່ອງຕົວ, ແນໃສ່ສ້າງພື້ນຖານເງື່ອນໄຂ ການຈັດຕັ້ງຜັນຂະຫຍາຍແນວທາງ, ນະໂຍບາຍ ແລະ ແກ້ໄຂບັນຫາທີ່ເກີດຂຶ້ນໃນແຕ່ລະໄລຍະ ໃຫ້ຖືກຕ້ອງ ແລະ ທັນກັບສະພາບການ.

          ດັ່ງນັ້ນ, ກົມການເມືອງສູນກາງພັກ ຈຶ່ງໄດ້ອອກມະຕິຕົກລົງ ສະບັບເລກທີ 17/ກມສພ, ລົງວັນທີ 21 ມິຖຸນາ 2024,  ວ່າດ້ວຍລະບອບ, ກົນໄກ, ວິທີເຮັດວຽກ ລະຫວ່າງຜູ້ປະຈໍາການ ຄະນະເລຂາທິການສູນກາງພັກ ກັບເລຂາຄະນະພັກກະຊວງ, ອົງການ, ນະຄອນຫຼວງ ແລະ ບັນດາແຂວງ, ໃນນັ້ນໄດ້ກໍານົດໜ້າທີ່ ໃຫ້ຫ້ອງວ່າການສູນກາງພັກ, ຫ້ອງວ່າການສໍານັກງານປະທານປະເທດ, ຫ້ອງວ່າການສໍານັກງານນາຍົກລັດຖະມົນຕີ ແລະ ຄະນະເລຂາທິການສະພາແຫ່ງຊາດ, ເອີ້ນລວມວ່າ ຫ້ອງວ່າການຂັ້ນສູນກາງ (4 ຫ້ອງວ່າການ) ເປັນຜູ້ຊ່ວຍວຽກທີ່ເອົາການເອົາງານ ເພື່ອເປັນເສນາທິການ ໃຫ້ແກ່ຂັ້ນເທິງ ນຳພາຊີ້ນໍາໄດ້ຢ່າງມີປະສິດທິພາບ, ມີປະສິດທິຜົນ ແລະ ໄດ້ຮັບຜົນສໍາເລັດເປັນຢ່າງດີ.

          ບົນພື້ນຖານນັ້ນ, ຫ້ອງວ່າການສູນກາງພັກ ໄດ້ຮ່ວມກັບ 3 ຫ້ອງວ່າການ ຄົ້ນຄວ້າ, ປຶກສາຫາລື ແລະ ມີຄວາມເປັນເອກະພາບກັນ ເຮັດບົດບັນທຶກຮ່ວມກັນ ເພື່ອປັບປຸງລະບອບ, ກົນໄກ, ແບບແຜນວິທີເຮັດວຽກ ແລະ ການປະສານງານຮ່ວມກັນໃຫ້ມີຄວາມສອດຄ່ອງ, ກົມກຽວ ແລະ ໂລ່ງລຽນ, ຄ່ອງຕົວ ຫຼາຍຂຶ້ນກວ່າເກົ່າ ແນໃສ່ປັບປຸງ ແລະ ຍົກສູງຄຸນນະພາບວຽກງານເສນາທິການຮັບໃຊ້ການນໍາ ພັກ-ລັດ ໃນສະພາບການໃໝ່ໃຫ້ມີປະສິດທິພາບ ແລະ ປະສິດທິຜົນສູງ.

ເນື້ອໃນສໍາຄັນ ຂອງບົດບັນທຶກ ມີ (7 ບັນຫາໃຫຍ່) ດັ່ງນີ້:

1). ກໍານົດໃຫ້ ຫົວໜ້າຫ້ອງວ່າການຂັ້ນສູນກາງ ດໍາເນີນລະບອບປະຊຸມຮ່ວມກັນ ເປັນປະຈໍາເດືອນ, ໃນກໍລະນີຈໍາເປັນ, ຮີບດ່ວນ ສາມາດຮຽກປະຊຸມວິສາມັນໄດ້;

2). ກໍານົດໃຫ້ຫ້ອງວ່າການສໍານັກງານນາຍົກລັດຖະມົນຕີ, ຫ້ອງວ່າການສະພາແຫ່ງຊາດ ລາຍງານ ຜົນກອງປະຊຸມລັດຖະບານ, ກອງປະຊຸມນາຍົກລັດຖະມົນຕີ ຮ່ວມກັບຮອງນາຍົກລັດຖະມົນຕີ, ກອງປະຊຸມນາຍົກລັດຖະມົນຕີ ຮ່ວມກັບບັນດາກະຊວງ, ອົງການ, ກອງປະຊຸມຄະນະປະຈໍາສະພາແຫ່ງຊາດ ສະໄໝສາມັນ ແລະ ວິສາມັນ ເພື່ອລາຍງານໃຫ້ກົມການເມືອງສູນກາງພັກ, ຄະນະເລຂາທິການສູນກາງພັກ ເປັນແຕ່ລະເດືອນ;

3). ສະໜອງເອກະສານ ແລະ ຂໍ້ມູນ ທີ່ຈໍາເປັນໃຫ້ກັນຢ່າງເປັນປະຈໍາເພື່ອຮັບໃຊ້ການນໍາພາຊີ້ນໍາ, ວຽກງານຄົ້ນຄວ້າສັງລວມ, ວຽກງານບໍລິການຮັບໃຊ້;

4). ຮ່ວມກັນສ້າງ ແລະ ຍົກສູງຂີດຄວາມສາມາດ ເປັນເສນາທິການ ຂອງຫ້ອງວ່າການ, ຫ້ອງການ ອ້ອມຂ້າງສູນກາງ ແລະ ທ້ອງຖິ່ນ ກໍຄືການປັບປຸງບຸກຄະລາກອນ ຂອງຫ້ອງວ່າການ ຢູ່ທ້ອງຖິ່ນ; ຮ່ວມກັນ ປັບປຸງ, ພັດທະນາ ເອກະສານ, ປຶ້ມຄູ່ມືວຽກງານຫ້ອງວ່າການ, ວຽກງານເສນາທິການ ຮັບໃຊ້ການຝຶກອົບຮົມ, ຍົກລະດັບຄວາມຊຳນິຊໍານານດ້ານວິຊາການ ໃຫ້ແກ່ພະນັກງານ ຂອງຫ້ອງວ່າການແຕ່ລະຂັ້ນ;

5). ຈັດຕັ້ງກອງປະຊຸມສະຫຼຸບຕີລາຄາວຽກງານ ຫ້ອງວ່າການຂັ້ນສູນກາງ ໂດຍຜັດປ່ຽນກັນເປັນເຈົ້າພາບ;

6). ແຕ່ລະປີ, ໃຫ້ມີການຈັດຝຶກອົບຮົມ ຫຼື ແລກປ່ຽນບົດຮຽນຕ່າງໆ ກ່ຽວກັບວຽກງານຫ້ອງວ່າການໃຫ້ພະນັກງານ ຂອງຫ້ອງວ່າການຂັ້ນສູນກາງ ກໍຄື ຫ້ອງວ່າການແຕ່ລະຂັ້ນ ຢ່າງໜ້ອຍ 1-2 ຄັ້ງ ຕໍ່ປີ;

7). ຜັດປ່ຽນກັນເປັນເຈົ້າພາບ ກອງປະຊຸມວຽກງານຫ້ອງວ່າການທົ່ວປະເທດ 5 ປີ ຕໍ່ຄັ້ງ ໂດຍຈັດຂຶ້ນໃນຕົ້ນສະໄໝ ພາຍຫຼັງສໍາເລັດກອງປະຊຸມໃຫຍ່ ຂອງພັກ.