ໃນວັນທີ 23 ກຸມພາ 2024 ຫ້ອງວ່າການສໍານັກງານປະທານປະເທດ ໄດ້ຈັດກອງປະຊຸມເຜີຍແຜ່ເອກະສານສໍາຄັນຂອງພັກ-ຂອງຊາດ ຄື: ລະນຶກວັນເກີດຂອງປະທານຄໍາໄຕ ສີພັນດອນ ຄົບຮອບ100 ປີ (8/2/1924-8/2/2024) ແລະເຊື່ອມຊຶມ ແລະ ຜັນຂະຫຍາຍທິດຊີ້ນຳ ຂອງສະຫາຍເລຂາທິຫານໃຫຍ່ ຄະນະບໍລິຫານງານສູນກາງພັກ, ປະທານປະເທດ ຕໍ່ວຽກງານການເງິນທົ່ວປະເທດ, ໂດຍການເປັນປະທານຂອງ ທ່ານ ອິນທະປັນຍາ ຂຽວວົງພະຈັນ ຮອງຫົວໜ້າຫ້ອງວ່າການສໍານັກງານປະທານປະເທດ, ມີຄະນະພັກ-ຄະນະນໍາ, ຫົວໜ້າກົມ-ຮອງກົມ ພ້ອມດ້ວຍພະນັກງານ-ລັດຖະກອນ ຫ້ອງວ່າການສໍານັກງານປະທານປະເທດ ເຂົ້າຮ່ວມ.

          ໃນໂອກາດດັ່ງກ່າວ, ທ່ານ ອິນທະປັນຍາ ຂຽວວົງພະຈັນ ໄດ້ເລົ່າປະຫວັດ ລະນຶກວັນເກີດຂອງປະທານ ຄໍາໄຕ ສີພັນດອນ ຄົບຮອບ 100 ປີ, ຊຶ່ງໄດ້ຍົກໃຫ້ເຫັນຊີວິດເຍົາໄວ, ຈຸດເລີ່ມຕົ້ນ ກໍຄືຜົນງານໃນການເຄື່ອນໄຫວປະຕິວັດ, ທັດສະນະແນວຄິດ, ການຄົ້ນຄວ້າຍຸດທະສາດ ສາມບາດຄ້ອນ ໝູນໃຊ້ເຂົ້າໃນການຍຶດອຳນາດແບບ ບົວບໍ່ຊ້ຳ ນ້ຳບໍ່ຂຸ່ນ ແລະ ຄຸນງາມຄວາມດີ ຂອງປະທານ ຄໍາໄຕ ສີພັນດອນ ເພື່ອໃຫ້ພະນັກງານ-ລັດຖະກອນ ຫສປທ ຮັບຮູ້ເຂົ້າໃຈ ແລະ ນຳໄປໝູນໃຊ້ເຂົ້າໃນວຽກງານຕົວຈິງຂອງຕົນ.

          ຈາກນັ້ນ, ທ່ານ ອິນທະປັນຍາ ຂຽວວົງພະຈັນ ກໍໄດ້ໃຫ້ກຽດສືບຕໍ່ເຜີຍແຜ່ ແລະ ເຊື່ອມຊຶມ ທິດຊີ້ນໍາ ຂອງທ່ານທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ຕໍ່ວຽກງານການເງິນທົ່ວປະເທດປະຈໍາປີ 2023 ແລະ ທິດທາງປີ 2024 ໃນວັນທີ 19 ທັນວາ 2023 ທີ່ ນະຄອນຫຼວງວຽງຈັນ. ໃນການເຜີຍແຜ່, ເຊື່ອມຊຶມ ແລະ ຜັນຂະຫຍາຍທີິດຊີ້ນຳດັ່ງກ່າວນັ້ນ ໄດ້ຍົກໃຫ້ເຫັນເຖິງຄວາມເປັນຫ່ວງເປັນໄຍ ແລະ ເອົາໃຈໃສ່ຂອງທ່ານເລຂາທິການໃຫຍ່, ປະທານປະເທດ ຕໍ່ຂະແໜງການເງິນ ແລະ ທັດສະນະ ແລະ ທິດຊີ້ນຳຂອງເພິ່ນຕໍ່ຂະແໜງການດັ່ງກ່າວ ໃຫ້ເພີ່ມຄວາມພະຍາຍາມຍົກສູງປະສິດພາບຂອງການຄຸ້ມຄອງງົບປະມານແຫ່ງລັດ, ປັບປຸງກົນໄກ ແລະ ລະບຽບການຕ່າງໆ ໂດຍໝູນໃຊ້ທັດສະນະແນວຄິດການຄົ້ນຄວ້າຂອງເພິ່ນຄື: ເສດຖະກິດເອກະລາດ ເປັນເຈົ້າຕົນເອງ (ສອຈ) ເພື່ອແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ການຄຸ້ມຄອງການເງິນແຫ່ງລັດ ຕາມທິດຫັນເປັນທັນສະໄໝ; ສົ່ງເສີມການດຳເນີນທຸລະກິດ-ການລົງທຶນ ຂອງເອກະຊົນພາຍໃນ ແລະ ຕ່າງປະເທດ ໃຫ້ມີຄວາມສະດວກຂຶ້ນ ພ້ອມທັງປະກອບສ່ວນຢ່າງຕັ້ງໜ້າ ເຂົ້າໃນການປະຕິບັດເປົ້າໝາຍການພັດທະນາແບບຍືນຍົງ ແລະ ຍຸດທະສາດເພື່ອການເຕີບໂຕສີຂຽວ ກໍຄື ສ້າງເສດຖະກິດເອກະລາດເປັນເຈົ້າຕົນເອງ.