ໃນຕອນບ່າຍຂອງວັນທີ 8 ກຸມພາ 2024 ທີ່ ສະພາແຫ່ງຊາດ, ທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຍື່ນສານຕາຕັ້ງຂອງບັນດາເອກອັກຄະລັດຖະທູດ ປະຈໍາ ສປປ ລາວ 7 ທູດ ຄື:

          ທ່ານ ມໍຄຳ ມັມບາ (Morecome Mumba) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ຊຳບີ ປະຈໍາ ສປປ ລາວ ຊຶ່ງມີສຳນັກງານຕັ້ງຢູ່ ກົວລາລຳເປີ, ມາເລເຊຍ.

          ທ່ານ ບາເດີ ອັບດຸນລາ ຊາອິດ ບິນ ຊາເຢດ ອາລມາໂຕຣຊີ (Bader Abdulla Saeed Bin Saayed Almatrooshi) ເອກອັກຄະຣາຊະທູດ ວິສາມັນ ຜູ້ມີອຳນາດເຕັມ ແຫ່ງ ສະຫະນະຄອນ ເອເມຣັດ ອາຣັບ ປະຈໍາ ສປປ ລາວ ຊຶ່ງມີສຳນັກງານຕັ້ງຢູ່ ຮ່າໂນ່ຍ, ສສ ຫວຽດນາມ.

          ທ່ານ  ເຊີເນ ມີເລີ (Jernej Miiller) ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສະຫະລັດ ສະໂລເວນີ ຄົນໃໝ່ ປະຈໍາ ສປປ ລາວ ຊຶ່ງມີສຳນັກງານຕັ້ງຢູ່ ເຊອູນ, ສ. ເກົາຫຼີ.

          ທ່ານ ດາກີ ອີຟຣີອາມ ເອຟຣີຄາ (Darkey Ephraim Africa) ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ອາຟຣີກາໃຕ້ ປະຈຳ ສປປ ລາວ, ຊຶ່ງມີສຳນັກງານຕັ້ງຢູ່ ບາງກອກ, ຣາຊະອານາຈັກໄທ.

          ທ່ານ ນາງ ອາມີນາຕາ ຄອຍຕາ (Aminata KOITA), ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສ. ກິເນ ປະຈຳ ສປປ ລາວ, ຊຶ່ງມີສຳນັກງານຕັ້ງຢູ່ ປັກກິ່ງ, ສປ ຈີນ.

          ທ່ານ ນາງ ແອນນາ ແຮມມາເກັນ (Anna Hammargren), ເອກອັກຄະຣາຊະທູດ ວິສາມັນ ຜູ້ມີອຳນາດເຕັມ ແຫ່ງ ຊູແອດ ປະຈຳ ສປປ ລາວ, ຊຶ່ງມີສຳນັກງານຕັ້ງຢູ່ ບາງກອກ, ຣາຊະອານາຈັກໄທ.

          ທ່ານ ຄູບິໂຕ ມັນຊີ ບາກຸຣາມຸດຊາ (Nkubito Manzi Bakuramutsa), ເອກອັກຄະ ລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສ.ຣູວັນດາ ປະຈຳ ສປປ ລາວ, ຊຶ່ງມີສຳນັກງານຕັ້ງຢູ່ ເຊອູນ, ສ. ເກົາຫຼີ.

          ໃນໂອກາດຕ້ອນຮັບການເຂົ້າຍື່ນສານຂອງແຕ່ລະທ່ານທູດ, ທ່ານ ທອງລຸນ ສີສຸລິດ ໄດ້ກ່າວຕໍ່ທ່ານທູດແຕ່ລະທ່ານ ຊຶ່ງມີເນື້ອໃນໂດຍລວມແມ່ນໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍບັນດາທ່ານເອກອັກຄະລັດຖະທູດແຕ່ລະທ່ານ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ຄົນໃໝ່ ປະຈໍາ ສປປ ລາວ ໃນຄັ້ງນີ້, ພ້ອມທັງສະແດງຄວາມຫວັງວ່າ ໃນໄລຍະທີ່ດຳລົງຕຳແໜ່ງເປັນເອກອັກຄະລັດຖະທູດປະຈຳ ສປປ ລາວ, ບັນດາທ່ານທູດ ຈະເປັນຂົວຕໍ່ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີໃຫ້ນັບມື້ແຕກດອກອອກຜົນຍິ່ງໆຂຶ້ນໃນອະນາຄົດ ຊຶ່ງລັດຖະບານ ແລະ ພາກສ່ວນກ່ຽວຂ້ອງຕ່າງໆຂອງລາວ ພ້ອມທີ່ຈະໃຫ້ການຮ່ວມ ມື, ສະໜັບສະໜູນ ແລະ ອໍານວຍຄວາມສະດວກ ເພື່ອໃຫ້ບັນດາທ່ານທູດ ສາມາດເຮັດສໍາເລັດໜ້າທີ່ ທີ່ໄດ້ຮັບມອບ ໝາຍຢ່າງຈົບງາມ; ພ້ອມດຽວກັນ, ທ່ານປະທານປະເທດ ກໍຍັງໄດ້ສະເໜີໃຫ້ບັນດາທ່ານທູດຊ່ວຍສືບຕໍ່ຊຸກຍູ້ການຮ່ວມມືໃນດ້ານຕ່າງໆ, ໂດຍສະເພາະໃນປີ 2024 ນີ້ ທີ່ ສປປ ລາວ ຈະໄດ້ຮັບກຽດເປັນປະທານອາຊຽນ ແລະ ຫວັງຢ່າງຍິ່ງວ່າຈະໄດ້ຮັບການສະໜັບສະໜູນຊ່ວຍເຫຼືອ ແລະ ການຮ່ວມມືຈາກບັນດາທູດທັງໝົດ ເພື່ອເຮັດໃຫ້ການເປັນປະທານອາຊຽນຂອງ ສປປ ລາວ ປະສົບຜົນສໍາເລັດຢ່າງຈົບງາມ.

          ຕອນທ້າຍວາລະການເຂົ້າຍື່ນສານຂອງທ່ານທູດແຕ່ລະປະເທດ, ທ່ານທູດແຕ່ລະທ່ານ ກໍໄດ້ສະແດງຄວາມຂອບໃຈຕໍ່ຄໍາເວົ້າອັນຈົບງາມຂອງ ທ່ານປະທານປະເທດ ແຫ່ງ ສປປ ລາວ ແລະ ກ່າວສະແດງຄວາມຍິນດີ ທີ່ຈະສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບອັນດີງາມ ແລະ ການຮ່ວມມືຢ່າງມີໝາກຜົນ ລະຫວ່າງ ປະເທດຂອງຕົນ ກັບ ສປປ ລາວ ໃຫ້ນັບມື້ນັບໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ.