ໃນໂອກາດເດີນທາງເຄື່ອນໄຫວຢ້ຽມຢາມ ແຂວງອຸດົມໄຊ ລະຫວ່າງວັນທີ 31 ມັງກອນ ຫາ ວັນທີ 2 ກຸມພາ 2024 ທ່ານ ນາງ ປານີ ຢ່າທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ ແຫ່ງ ສປປ ລາວ ພ້ອມດ້ວຍ ທ່ານ ນາງ ເຂັມມະນີ ພົນເສນາ ຫົວໜ້າຫອ້ງວ່າການສໍານັກງານປະທານປະເທດ ແລະ ຄະນະຕິດຕາມ ໂດຍມີທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ພ້ອມດ້ວຍຄະນະພະແນກການທີ່ກ່ຽວຂ້ອງ ໄດ້ເຄື່ອນໄຫວຢ້ຽມຢາມ ຊຸກຍູ້ ບັນດາບໍລິສັດ, ໂຮງງານ ແລະ ຄອບຄົວຕົວແບບມີດັ່ງນີ້:

• ບໍລິສັດໄຊມີ່ງເມືອງ ຢູ່ບ້ານຫ້ວຍຂຸມ ເມືອງໄຊ ແຂວງອຸດົມໄຊ: ໃນໂອກາດເຄື່ອນໄຫວຢ້ຽມຢາມດັ່ງກ່າວ ໄດ້ຮັບຟັງການລາຍງານໂດຍຫຍໍ້ກ່ຽວກັບ ການກະກຽມ ແລະ ປັບປຸງ ໂຮງງານຫົວອາຫານ ສັດ ຂອງບໍລິສັດໄຊມີ່ງເມືອງ  ຊຶ່ງໂຮງງານນີ້ມີກຳລັງການຜະລິດ ຂອງໂຮງງານແມ່ນ 60.000 ໂຕນ/ປີ,  ປະຈຸບັນແມ່ນໄດ້ທົດລອງຜະລິດຫົວອາຫານສັດໃນຫຼາຍຊະນິດຕາມແຜນການຜະລິດຂອງໂຮງງານ ປະຈຳປີ 2024 ຄື: ຫົວອາຫານໝູກາງ 1.300 ໂຕນ, ຫົວອາຫານໝູນ້ອຍ1.200 ໂຕນ, ຫົວອາຫານໄກ່ນ້ອຍ 2.000 ໂຕນ, ຫົວອາຫານໄກ່ໃຫຍ່1.500 ໂຕນ, ຫົວອາຫານໄກ່ໄຂ່ 4.000 ໂຕນ. ພ້ອມດຽວກັນນີ້ ທາງບໍລິສັດຕ້ອງການເກັບຊື້ວັດຖຸດິບພາຍໃນປະເທດ  ຈຳນວນ 5.000 ໂຕນ ເພື່ອມາເປັນສ່ວນປະສົມຂອງຫົວອາຫານສັດ ປະກອບມີ: ສາລີ, ມັນຕົ້ນ, ກາກມັນຕົ້ນ, ຮຳ, ຫີນບົດ ແລະ ເກືອ ເພື່ອໃຊ້ເຂົ້າໃນການຜະລິດຫົວອາຫານສັດ ແລະ ຍັງຕ້ອງການນຳເຂົ້າວັດຖຸດິບທີ່ບໍ່ສາມາດຜະລິດຢູ່ ສປປ ລາວ ໄດ້ເຊັ່ນ: ກາກຖົ່ວເຫຼືອງ, ແປ້ງເຂົ້າບາເລ່, ຮຳເຂົ້າບາເລ່, ຊ່າເຫຼົ້້າສາລີ, ກາກນ້ຳຕານ, ນ້ຳມັນຖົ່ວເຫຼືອງ, ໂຄລີນ, ແຄລຊຽມ(ດູກປົ່ນ), ນ້ຳຢາໜຽວ, ປຼີມິກ, ອາຫານເສີມສຳລັບສັດ, ປາປົ່ນ, ຜົງໂປຣຕິນ, ກາກແກ່ນຝ້າຍ, ສານຮັກສາຄຸນນະພາບອາຫານສັດ, ວິຕາມິນລວມ, ຫີນຝຸ່ນ, ແຮ່ທາດ, ຜົງໂປຣຕິນສາລີ, ຜົງໂປຣຕິນຖົ່ວ, ແປ້ງຝຸ່ນ, ກາກແກ່ນຜັກ.

• ໂຮງງານຜະລິດແປງມັນຕົ້ນ ບ້ານປຸ່ງຫວີງ ເມືອງໄຊ ແຂວງອຸດົມໄຊ: ໃນໂອກາດທີ່ຢ້ຽມຊົມໂຮງານ ປະທານບໍລິສັດ ກໍໄດ້ລາຍງານສະພາບການຈັດຕັ້ງປະຕິບັດວຽກງານດ້ານຕ່າງໆໂດຍຫຍໍ້ ໃຫ້ກັບຄະນະທີມງານໄດ້ຮັບຊາບ ເປັນຕົ້ນແມ່ນການລົງທຶນທາງດ້ານການປູກ ແລະ ການລ້ງຽ ໃນນັ້ນຢູ່ໃນເມືອງໄຊ ມີຈຳນວນຄອບຄົວທີ່ປູກມັນຕົ້ນທັງໝົດ 540 ຄອບຄົວ, ມີ 37 ບ້ານ, ມີເນື້ອທີ່ທັງໝົດ 240 ເຮັກຕາ ການຈັດຕັ້ງປະຕິບັດຕໍ່ການປູກມັນຕົ້ນຂອງບໍລິສັດ ແລະ ພໍ່ແມ່ປະຊາຊົນໃນປີ 2023 ຈາກການເກັບກໍາຂໍ້ມູນເບື້ອງຕົ້ນມີຄອບຄົວທີ່ຈະປູກມັນຕົ້ນທັງໝົດ ມີ 52 ບ້ານ, 640 ຄອບຄົວ, ມີເນື້ອທີ ທັງໝົດ 412 ເຮັກຕ້າ. ແຕ່ມາຮອດໄລຍະການສະໜອງແນວພັນທາງບໍລິສັດແມ່ນຊອກຫາແນວພັນມາສະໜອງໃຫ້ພໍ່-ແມ່ປະຊາຊົນ ແມ່ນບໍ່ໄດ້ຕາມແຜນການປູກ ຍ້ອນແນວພັນບໍ່ພຽງພໍ ເຮັດໃຫ້ຄອບຄົວທີ່ໄດ້ປູກຕົວຈິງໃນປະຈຸບັນມີທັງໝົດ 540 ຄອບຄົວ, ມີ 37 ບ້ານ, ມີເນື້ອທີ່ທັງໝົດ 240 ເຮັກຕາ, ສະພາບການປູກມັນຕົ້ນຂອງພໍ່ແມ່ປະຊາຊົນເຫັນວ່າມີຄວາມງອກງາມດີ ແຕ່ຍັງມີບາງແນວພັນທີ່ບໍ່ເໝາະສົມກັບ ສະພາບພື້ນທີ່ເຮັດໃຫ້ມີຫົວນ້ອຍບໍ່ງາມ,  ປະຈຸບັນພໍ່ແມ່ປະຊາຊົນແມ່ນຢູ່ໃນໄລຍະການເກັບກູ້ຜົນຜະລິດແລ້ວປະມານ 70% ຍັງ 30% ແມ່ນຍັງບໍ່ທັນເກັບກູ້ ສ່ວນການເກັບຊື້ມັນຕົ້ນຂອງບໍລິສັດ ແມ່ນບໍລິສັດໄດ້ເຮັດສັນຍາເກັບຊື້ໃນປີ 2023 ລາຄາ 1500 ກີບຕໍ່ 1 ກິໂລ ແມ່ນສົ່ງມາຮອດໂຮງງານ ເພາະວ່າທາງບໍລິສັດຈະບໍ່ມີລົດໄປເກັບຊື້ແຕ່ລະຈຸດແຕ່ລະບ່ອນ. ສຳລັບແຜນປູກມັນຕົ້ນຂອງບໍລິສັດ ໃນປີ 2024 ທາງບໍລິສັດຈະມີແຜນເກັບຊື້ແນວພັນຈາກປະຊາຊົນມາເກັບໄວ້ປະມານ 150 ໂຕນ ເພື່ອສາມາດສະໜອງປະຊາຊົນທີ່ຕ້ອງການປູກ ໃນເນື້ອທີ່ຕາມແຜນການຂອງເມືອງໄຊ ໃຫ້ໄດ້ 400-500 ເຮັກຕາ. ຕະຫຼາດຈໍາໜ່າຍແປ້ງມັນຕົ້ນແມ່ນທາງໂຮງງານໄດ້ສົ່ງອອກໄປຂາຍຢູ່ ສປ ຈີນ ເຫັນວ່າຜົນຕອບຮັບດີ ແລະ ມີຄວາມຕ້ອງການເປັນຈຳນວນຫຼາຍ.

• ຄອບຄົວຕົວແບບຂອງທ່່ານ ຈົງເຊັງເຮີ ຢູ່ບ້ານປຸງຫວີງ ເມືອງໄຊ ແຂວງອຸດົມໄຊ: ໃນໂອກາດທີ່ຢ້ຽມຊົມຄອບຄົວຕົວແບບ ຊຶ່ງໄດ້ຮັບຟັງການລາຍງານຈາກ ທ່ານ ໄຊຈາເຮີ ກ່ຽວກັບສະພາບລວມກໍຄື: ແຜນເສດຖະກິດແມ່ນໂດຍຖືເອົາການປູກຢາງພາລາ, ການລ້ຽງປາ ແລະ ງົວລາດ ເປັນສິນຄ້າຕົ້ນຕໍ ແຕ່ປະຈຸບັນແມ່ນລ້ຽງງົວເປັນຕົວເສດຖະກິດຫຼັກ, ມີງົວລາດທັງໝົດ ປະມານ 300 ກວ່າໂຕ ແລະ ພາຍໃນ 01 ປີ ສາມາດຂາຍງົວອອກ ໂດຍປະມານ 50 ເຖິງ 60 ໂຕ ແລະ ສ້າງລາຍໄດ້ເຂົ້າຄອບຄົວຫຼາຍຮ້ອຍລ້ານກີບ.

• ໂຮງງານຜະລິດຊາ ທຳມະຊາດ: ໃນໂອກາດທີ່ຢ້ຽມຊົມໂຮງງານຊາ ໄດ້ຮັບຟັງການລາຍງານກ່ຽວກັບການຜະລິດແມ່ນໄດ້ຮັບຊືິ້ຊາຈາກພໍ່ແມ່ປະຊາຊົນເພື່ອມາແປຮູບເປັນຜະລິດພັນ ແລ້ວສົ່ງອອກຂາຍ ສປ ຈີນ ເພາະເຫັນວ່າຕະຫຼາດຂອງຈີນມີຄວາມຕ້ອງການສູງ ເນື່ອງຈາກເປັນຊາທີມີອາຍຸຫຼາຍປີ ແລະ ເປັນຊາທີ່ມີລົດຊາດແຊບ.

         ໃນໂອກາດທີ່ໄດ້ເຄື່ອນໄຫວຢ້ຽມຢາມແຕ່ລະສະຖານທີ່ນັ້ນ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດ ແຫ່ງ ສປປ ລາວ ກໍໄດ້ໃຫ້ກຽດກ່າວຍ້ອງຍໍຊົມເຊີຍຕໍ່ການນຳແຂວງ ທີ່ສາມາດດຶງດູດເອົານັກລົງທຶນຕ່າງປະເທດ ໂດຍສະເພາະແມ່ນບັນດາບໍລິສັດ, ໂຮງງານຜະລິດອື່ນໆເຂົ້າມາລົງທຶນ ເພື່ອສ້າງວຽກເຮັດງານທຳ, ສ້າງລາຍໄດ້ ແລະ ເຮັດໃຫ້ປະຊາຊົນຈໍານວນຫຼາຍມີອາຊີບທີ່ຖາວອນ. ພ້ອມທັງເນັ້ນພະແນກການທີ່ກ່ຽວຂ້ອງ ໂດຍສະເພາະແມ່ນພະແນກກະສິກຳ ແລະ ປ່າໄມ້, ພະແນກອຸດສາຫະກຳ ແລະ ການຄ້າແຂວງ ພ້ອມດ້ວຍຄະນະປະທານບັນດາບໍລິສັດ, ໂຮງງານ ແລະ ຄອບຄົວຕົວແບບ ຈົ່ງຂະຫຍາຍການຜະລິດ, ການປູກຝັງ, ການລ້ຽງສັດໃຫ້ຫຼາຍຂຶ້ນ ພ້ອມມີການພັດທະນາໄປເລື້ອຍໆ ເຖິງວ່າຈະພົບຂໍ້ຫຍຸ້ງຍາກຫຼາຍປະການກໍຕາມ ຂໍໃຫ້ສູ້ຊົນເພື່ອໃຫ້ພໍ່ແມ່ປະຊາຊົນມີຊີວິດທີ່ດີຂຶ້ນ.