ໃນໂອກາດເດີນທາງຢຽ້ມຢາມ ແຂວງອຸດົມໄຊ ລະຫວ່າງວັນທີ 31 ມັງກອນ ຫາ ວັນທີ 2 ກຸມພາ 2024 ທ່ານ ນາງ ປານີ ຢ່າທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ ແຫ່ງ ສປປ ລາວ ພ້ອມດ້ວຍ ທ່ານ ນາງ ເຂັມມະນີ ພົນເສນາ ຫົວໜ້າຫ້ອງວ່າການສໍານັກງານປະທານປະເທດ ແລະ ຄະນະຕິດຕາມ, ທ່ານ ບຸນຄົງ ຫຼ້າຈຽມພອນ ເຈົ້າແຂວງ ແຂວງອຸດົມໄຊ ພ້ອມດ້ວຍອໍານາດການປົກຄອງ ແຂວງ-ເມືອງ ໄດ້ລົງຢຽ້ມຢາມພົບປະພໍ່ແມ່ປະຊາຊົນ ແລະ ບັນດາລູກຫຼານຢູ່ເຂດຫ່າງໄກສອກຫຼີກເຂດພູດອຍພາຍໃນເມືອງຫຼາ ແຂວງອຸດົມໄຊ ໂດຍໄດ້ຮັບການຕ້ອນຮັບຈາກອໍານາດການປົກຄອງ ເມືອງຫຼາ ແລະ ພໍ່ແມ່ປະຊາຊົນ ກຸ່ມ ບ້ານອາໂນ ຢ່າງອົບອຸ່ນ.

        ຄະນະຮັບຜິດຊອບກຸ່ມບ້ານອາໂນ ໄດ້ລາຍງານສະພາບການຈັດຕັ້ງປະຕິບັດວຽກງານໃນໄລຍະທີ່ຜ່ານມາໃຫ້ຊາບວ່າ: ກຸ່ມບ້ານອາໂນ ກວມເອົາ 7 ບ້ານ, ມີ 2 ຊົນເຜົ່າ, ຄື: ກຶມມຸ 3 ບ້ານ ແລະ ອາຄາ 4 ບ້ານ, ມີພົນລະເມືອງທັງໝົດ 5.014 ຄົນ, ຍິງ 2.481 ຄົນ, ເປັນກຸ່ມໜຶ່ງທີ່ເປັນເຂດພູດອຍກວມ 99% ຊຶ່ງມີ 7 ໜ່ວຍພັກບ້ານທີ່ຂຶ້ນກັບກຸ່ມບ້ານ, ໃນນີ້ບ້ານອາໂນ ແລະ ບ້ານແສນຫຼວງ ເປັນບ້ານທີ່ຂຶ້ນກັບກຸ່ມບ້ານອາໂນ ຊຶ່ງເປັນບ້ານຊົນເຜົ່າ ອາຄາ ພົນລະເມືອງທັງສອງບ້ານລວມມີ 2.339 ຄົນ, ຍິງ 1.138 ຄົນ, ມີ 354 ຫຼັງຄາເຮືອນ, ມີ 531 ຄອບຄົວ. ໃນກຸ່ມດັ່ງກ່າວມີທ່າແຮງບົ່ມຊ້ອນ: ເໝາະແກ່ການປູກພືດທັນຍາຫານ, ລ້ຽງສັດໃຫຍ່, ເພາະກຸ່ມດັ່ງກ່າວຕັ້ງຢູ່ເຂດພູສູງ ແລະ ພູມສັນຖານຂອງບ້ານຢູ່ສູງ ຈຶ່ງເປັນສະຖານທີ່ແຫຼ່ງທ່ອງທຽວຕິດພັນກັບທຳມະຊາດຊົມສາຍທະເລໝອກຍາມເຊົ້າຕາມລະດູການ.  ຕະຫລອດໄລຍະທີ່ຜ່ານມາຍ້ອນມີພັກນໍາພາແນວທາງນະໂຍບາຍຂອງພັກ-ລັດ ຊຶ່ງຍາມໃດກໍເອົາໃຈໃສ່ລົງທຶນ, ສ້າງພື້ນຖານ ໂຄງລ່າງເຊັ່ນ: ເສັ້ນທາງລົດ, ໂຮງຮຽນ, ໂຮງໝໍນ້ອຍ, ຕາຂ່າຍໄຟຟ້າ ແລະ ເຄືອຂ່າຍໂທລະສັບ (ລະບົບອິນເຕີເນັດ) ທີ່ມີຄະນະພັກຂັ້ນເທິງໃຫ້ການຊີ້ນຳໃນການຈັດຕັ້ງປະຕິບັດໃນແຕ່ລະໄລຍະ, ມີເລຂາຄະນະພັກຮາກຖານກຸ່ມບ້ານ ແລະ ປະຊາຊົນທີ່ມີຄວາມຕື່ນຕົວຕໍ່ແນວທາງນະໂຍບາຍຂອງພັກ-ລັດວາງອອກ, ມີພູຜາປ່າໄມ້ ແລະ ທຳມະຊາດ ທີ່ເອື້ອອໍານວຍຄວາມສະດວກໃນການທຳມາຫາກິນ, ເໝາະແກ່ການຜະລິດເປັນສິນຄ້າ ແລະ ອື່ນໆ. ປະຊາຊົນມີທ່າແຮງມູນເຊື້ອຄວາມດຸໝັ່ນຂະຫຍັນພຽນໃນການອອກແຮງງານເພື່ອລ້ຽງຊີບຂອງພໍ່ແມ່ປະຊາຊົນ ຈຶ່ງເຮັດໃຫ້ພື້ນຖານໂຄງລ່າງ ພາຍໃນກຸ່ມມີການພັດທະນາໂດຍເຫັນໄດ້ຈາກເມື່ອກອ່ນປະຊາຊົນກຸ່ມດັ່ງກ່າວມີຄວາມຫຍຸ້ງຍາກຫຼາຍດ້ານ ແຕ່ມາຮອດປະຈຸບັນຊີວິດການເປັນຢູ່ຂອງປະຊາຊົນໄດ້ຮັບການພັດທະນາດີຂຶ້ນຈາກສະພາບພື້ນຖານໂຄງລ່າງຂອງບ້ານແບບປະຖົມປະຖານມາຮອດປະຈຸບັນບ້ານເຮືອນຂອງປະຊາຊົນມີເຮືອນຢູ່ແບບຖາວອນ, ລະບົບພື້ນຖານໂຄງລ່າງໄດ້ຮັບການພັດທະນາ, ໄປຄຽງຄູ່ກັບການພັດທະນາຂອງປະຊາຊົນໃນແຕ່ລະໄລຍະນັ້ນກໍຍັງມີຄວາມຫຍຸ້ງຍາກຫຼາຍດ້ານໂດຍສະເພາະແມ່ນເປັນບ້ານທີ່ມີພື້ນທີ່ຄ້ອຍຊັນ ພູດອຍ ກວມ 99%. ຊຶ່ງພື້ນທີ່ການຜະລິດແມ່ນຢູ່ກະແຈກກະຈາຍ, ການຜະລິດເປັນສິນຄ້າຍັງບໍ່ທັນເປັນຂະບວນຟົດຟື້ນ ແລະ ສ່ວນຫຼາຍການຜະລິດແມ່ນຍັງອີງໃສ່ທຳມະຊາດແບບດັ່ງເດີມ. ໃນນັ້ນບ້ານເຮືອນປະຊາຊົນກໍຕັ້ງຢູ່ກະແຈກກະຈາຍ ເຮັດໃຫ້ການຄຸ້ມຄອງພົນລະເມືອງມີຄວາມສັບສົນ ແລະ ມີຄວາມຫຍຸ້ງຍາກທາງດ້ານນໍ້າລິນທີ່ສະອາດບໍ່ພຽງພໍຕໍ່ການນຳໃຊ້ເຂົ້າໃນຊີວິດປະຈຳວັນ. ສະນັ້ນ, ສະເໜີຂໍໃຫ້ຂັ້ນເທິງທີ່ກ່ຽວຂ້ອງສະໜອງເສົາໄຟຟ້າ, ຊອກແຫຼ່ງທຶນເພື່ອພັດທະນາພື້ນຖານໂຄງລ່າງເພື່ອຫັນປ່ຽນຈາກອາຊີບການເຮັດໄຮ່-ເຮັດສວນແບບເລື່ອນລອຍເປັນອາຊີບຄົງທີ່, ປັບແຜນຜັງຂອງບ້ານ ແລະ ນ້ຳລິນສະອາດໃຫ້ພຽງພໍ ແລະ ອື່ນໆ.

   ໃນການລົງຢຽ້ມຢາມໃນຄັ້ງນີ້ ທ່ານ ຮອງປະທານປະເທດ ຍັງໄດ້ມອບເຄື່ອງນຸ່ງຫົ່ມ, ອຸປະກອນການສຶກສາ ໃຫ້ແກ່ລູກຫຼານ ແລະ ພໍ່ແມ່ປະຊາຊົນ ພ້ອມກັນນັ້ນຍັງໄດ້ມອບທຶນຈໍານວນໜຶ່ງໃຫ້ແກ່ກຸ່ມບ້ານອາໂນ ເພື່ອນໍາໃຊ້ເຂົ້າໃນການພັດທະນາວຽກງານທີ່ຈໍາເປັນຂອງກຸ່ມບ້ານຕື່ມອີກ.

  ພາຍຫລັງສໍາເລັດການຢຽ້ມຢາມ ແລະ ມອບເຄື່ອງໃຫ້ປະຊາຊົນ ກຸ່ມບ້ານອາໂນ ແລ້ວ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພ້ອມດ້ວຍຄະນະ ແລະ ທ່ານ ເຈົ້າແຂວງອຸດົມໄຊ ໄດ້ສືບຕໍ່ລົງຢຽ້ມຢາມ ພໍ່ແມ່ປະຊາຊົນ ບ້ານປາງປໍ ຊຶ່ງເປັນບ້ານຂອງຊົນເຜົ່າມົ້ງ ທີ່ຕັ້ງຖິ່ນຖານບ້ານເກີດຢູ່ນີ້ມາແຕ່ດົນນານ ແລະ ເປັນບ້ານທີ່ຕັ້ງຢູ່ເຂດພູດອຍທີ່ສູງຊັນ ຊຶ່ງປະຊາຊົນອາໄສການປູກຝັງລຽ້ງສັດເປັນຕົ້ນຕໍເພາະເນື້ອທີ່ການຜະລິດມີຄວາມຫຍຸ້ງຍາກ ສະນັ້ນ ປະຊາຊົນຈຶ່ງອາໄສການລຽ້ງ ແລະ ຊອກຫາເຄື່ອງປ່າຂອງດົງຄ້າຂາຍ. ໃນການລົງຢຽ້ມຢາມຄັ້ງນີ້ ທ່ານຮອງປະທານປະເທດ ຍັງໄດ້ມອບທຶນ ແລະ ເຄື່ອງນຸ່ງຫົ່ມຈຳນວນໜຶ່ງໃຫ້ແກ່ປະຊາຊົນ ແລະ ລູກຫຼານພາຍໃນບ້ານ ເພື່ອຕ້ານໄພໜາວຕື່ມອີກ.

     ໃນການລົງຢຽ້ມຢາມແຕ່ລະບ່ອນ ທ່ານຮອງປະທານປະເທດ ກໍໄດ້ສະແດງຄວາມຊົມເຊີຍຕໍ່ອໍານາດການປົກຄອງເມືອງ ກໍຄືກຸ່ມບ້ານ ທີ່ໄດ້ເອົາໃຈໃສ່ເຂົ້າໃນການຊີ້ນໍາ-ນຳພາພໍ່ແມ່ປະຊາຊົນພາຍໃນບ້ານຂອງຕົນ ຊຶ່ງສະແດງອອກເຫັນໄດ້ຢ່າງຈະແຈ້ງໃນເມື່ອກ່ອນຊີວິດການເປັນຢູ່ຂອງປະຊາຊົນພົບຄວາມຫຍຸ້ງຍາກ ບັນດາເຮືອນຢູ່ຂອງປະຊາຊົນແບບປະຖົມປະຖານແຕ່ມາຮອດປະຈຸບັນພື້ນຖານໂຄງລ່າງຂອງບ້ານໄດ້ຮັບການພັດທະນາເຮືອນຢູ່ຂອງເຂົາເຈົ້າມາຮອດປະຈຸບັນມີເຮືອນຢູ່ແບບຖາວອນ. ພື້ນຖານໂຄງລ່າງພາຍໃນບ້ານໄດ້ຮັບການພັດທະນາ, ຄອບຄົວທຸກຍາກໄດ້ຫຼຸດລົງ, ຊີວິດການເປັນຢູ່ນັບມື້ດີຂຶ້ນ. ພອ້ມນີ້, ທ່ານຮອງປະທານປະເທດ ກໍໄດ້ຊີ້ນໍາບາງດ້ານໃຫ້ແກ່ອໍານາດການປົກຄອງໂດຍສະເພາະແມ່ນໃຫ້ອໍານາດການປົກຄອງຈົ່ງເອົາໃຈໃສ່ເຂົ້າໃນການຊີ້ນໍາ-ນຳພາເປັນຕົ້ນແມ່ນການສຶກສາອົບຮົມທາງດ້ານວຽກງານການເມືອງແນວຄິດ, ນໍາພາປະຊາຊົນເອົາໃຈໃສ່ເຂົ້າໃນການປູກຝັງ-ລຽ້ງສັດ ໃຫ້ຫຼາຍກາຍເປັນສິນຄ້າເພື່ອສ້າງລາຍຮັບໃຫ້ແກ່ຄອບຄົວເພາະພູມສັນຖານຂອງບ້ານແມ່ນເປັນເຂດພູດອຍ. ຈາກນັ້ນ, ທ່ານຮອງປະທານປະເທດ ປານີ ຢາທໍ່ຕູ້ ພ້ອມດ້ວຍຄະນະໄດ້ສືບຕໍ່ລົງຢຽ້ມຢາມ ແລະ ເບິ່ງການປູກໝາກຖົ່ວເປັນສິນຄ້າຂອງປະຊາຊົນຢູ່ພາຍໃນເຂດເທດສະບານເມືອງ ຫຼາ ເພາະປະຈຸບັນການປູກໝາກຖົ່ວແມ່ນພວມໃຫ້ຄວາມສົນໃຈຂອງປະຊາຊົນເພາະຕະຫຼາດຮອງຮັບດ້ານຜົນຜະລິດມີຄວາມຕ້ອງການສູງທັງຕະຫຼາດພາຍໃນ ແລະ ຕ່າງປະເທດ.

    ຈາກນັ້ນ, ໄດ້ສືບຕໍ່ລົງຢຽ້ມເຮືອນຊົນເຜົ່າຕ່າງໆຢູ່ເຂດສະໜາມກິລາຂອງແຂວງ ຊຶ່ງໃນຕໍ່ໜ້າທາງແຂວງ ແລະ ບໍລິສັດ ຂອງເອກະຊົນລາວ ຈະຮ່ວມມືກັນພັດທະນາເຂດສະໜາມກິລາໃຫ້ມີຫຼາຍກິດຈະກໍາ ນອກຈາກສະໜາມກິລາແລ້ວ ຈະສ້າງເຮືອນຈໍາລອງຂອງຊົນເຜົ່າຕ່າງໆພາຍໃນແຂວງເພື່ອໃຫ້ປະຊາຊົນກໍຄືນັກທອ່ງ ທຽ່ວເຂົ້າມາທຽ່ວຊົມເບິ່ງວິຖີຂອງການດໍາລົງຊີວິດຂອງແຕ່ລະເຜົ່າ.