ໃນໂອກາດທີ່ເດີນທາງເຄື່ອນໄຫວຢຽ້ມຢາມຢູ່ແຂວງ ອຸດົມໄຊ ໃນວັນທີ 31 ມັງກອນ ຫາ 2 ກຸມພາ 2024 ຂອງທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດ ແຫ່ງ ສປປ ລາວ ພ້ອມດ້ວຍ ທ່ານ ນາງ ເຂັມມະນີ ພົນເສນາ, ຫົວໜ້າຫອ້ງວ່າການສໍານັກງານປະທານປະເທດ ແລະ ຄະນະຕິດຕາມ ໄດ້ຮັບຟັງການລາຍງານຂອງ ທ່ານ ບຸນຄົງ ຫຼ້າຈຽມພອນ ເຈົ້າແຂວງແຂວງອຸດົມໄຊ ກ່ຽວກັບສະພາບລວມໃນການນໍາພາ-ຊີ້ນໍາວຽກງານຮອບດ້ານ ຂອງແຂວງ ຕະຫຼອດໄລຍະ 01 ປີ 2023 ທີ່ຜ່ານມາ ແຂວງອຸດົມໄຊ ມີທ່າເເຮງໃນການພັດທະນາຫຼາຍດ້ານ, ມາຮອດ ປະຈຸບັນ ໂດຍລວມພະນັກງານ, ສະມາຊິກພັກ, ປະຊາຊົນບັນດາເຜົ່າພາຍໃນແຂວງ ແມ່ນມີຄວາມສະຫງົບທາງດ້ານການເມືອງແນວຄິດ, ສັງຄົມມີຄວາມສະຫງົບສຸກ. ໂດຍພື້ນຖານ ເຮັດໃຫ້ເສດຖະກິດຂອງແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ ຊຶ່ງລວມຍອດຜະລິດຕະພັນພາຍໃນ GDP ສະເລ່ຍ 4,80 %, ສ້າງມູນຄ່າເພີ່ມຕາມລາຄາໃນປີ ສະເລ່ຍ 8.658 ກວ່າຕື້ກີບ, ສະເລ່ຍລາຍຮັບຕໍ່ຫົວຄົນເທົ່າກັບ 1.284 ໂດລາສະຫະລັດ; ປະຈຸບັນພວມສຸມໃສ່ຜັນຂະຫຍາຍຈັດຕັ້ງປະຕິບັດບັນດານິຕິກໍາ ກ່ຽວກັບການແກ້ໄຂບັນຫາເຄັ່ງຮ້ອນທາງດ້ານ ເສດຖະກິດ ການເງິນຂອງລັດຖະບານຢ່າງເປັນເຈົ້າການ ແລະ ຕິດພັນວຽກງານປັບປຸງ, ກໍ່ສ້າງພັກ, ກໍ່ສ້າງພະນັກງານ, ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ວຽກງານຂະບວນການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ໄດ້ຖືສໍາຄັນຢ່າງເປັນເຈົ້າການ, ໃນນີ້ໄດ້ແຕ່ງຕັ້ງ ຄະນະຮັບຜິດຊອບຊີ້ນໍາຂັ້ນເມືອງ ໃນການກະກຽມກອງປະຊຸມໃຫຍ່ ຢູ່ຂັ້ນຮາກຖານບ້ານ ແລະ ສໍານັກງານອົງການຢູ່ຂັ້ນເມືອງ. ຄາດຄະເນຮາກຖານບ້ານ ແລະ ສໍານັກງານອົງການຂັ້ນເມືອງ ໃຫ້ສໍາເລັດ ພາຍໃນ ເດືອນ 6 ປີ 2024 ນີ້.  ສໍາລັບກອງປະຊຸມໃຫຍ່ ຮາກຖານພັກອ້ອມຂ້າງແຂວງ ແລະ ກອງປະຊຸມໃຫຍ່ ອົງຄະນະພັກແຂວງ ໄດ້ສໍາເລັດການແຕ່ງຕັ້ງຄະນະຊີ້ນໍາ ແລະ ຄະນະອະນຸກໍາມະການດ້ານຕ່າງໆແລ້ວ. ປະຈຸບັນ ພວມກະກຽມໃນການຈັດຕັ້ງປະຕິບັດເຂົ້າສູ່ວຽກຕົວຈິງ ຄາດວ່າຈະດໍາເນີນກອງປະຊຸມໃຫຍ່ຂອງແຂວງໃນຊ່ວງກາງປີ2025.

       ໃນໂອກາດນີ້ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ໂອ້ລົມ ແລະ ໃຫ້ທິດຊີ້ນໍາແກ່ອໍານາດການປົກຄອງແຂວງ ຊຶ່ງທ່ານໄດ້ຕີລາຄາສູງຕໍ່ຜົນງານທີ່ແຂວງຍາດມາໄດ້ ແລະ ເຫັນວ່າແຂວງອຸດົມໄຊ ໄດ້ມີການພັດທະນາຫຼາຍ, ເຖິງແມ່ນວ່າຕະຫຼອດໄລຍະທີ່ຜ່ານມາ  ສະພາບພາກພື້ນ ແລະ ສາກົນ ມີການຜັນແປຢ່າງສະຫຼັບຊັບຊ້ອນ ກໍຄືສະພາບພາຍໃນປະເທດ ແລະ ແຂວງພົບຄວາມຫຍຸ້ງຍາກທາງດ້ານເສດຖະກິດ-ການເງິນ, ຜົນກະທົບຈາກການແຜ່ລະບາດພະຍາດໂຄວິດ-19, ໄພພິບັດທາງທໍາມະຊາດ.  ສິ່ງເຫຼົ່ານີ້ ລ້ວນແຕ່ເປັນບົດທົດສອບຕໍ່ການຊີ້ນໍາ-ນໍາພາ ຂອງອົງຄະນະພັກແຂວງ. ດ້ວຍຄວາມເອົາໃຈໃສ່ ແລະ ເປັນເອກະພາບ, ຄວາມຮັບຜິດຊອບທາງດ້ານການເມືອງ ຂອງບັນດາສະຫາຍ, ການມີສ່ວນຮ່ວມຂອງທຸກພາກສ່ວນ ແລະ ປະຊາຊົນບັນດາເຜົ່າ ໃນທົ່ວແຂວງ ເຮັດໃຫ້ແຂວງສາມາດຍາດໄດ້ຜົນສໍາເລັດທີ່ພົ້ນເດັ່ນໃນຫຼາຍດ້ານ. ຄຽງຄູ່ກັບຜົນສໍາເລັດທີ່ຍາດມາໄດ້ນັ້ນ ເມື່ອທຽບກັບຄວາມເລັ່ງທວງຂອງສະພາບການໃໝ່ ກໍຍັງເຫັນວ່າມີຫຼາຍດ້ານ ທີ່ຍັງຕ້ອງໄດ້ເອົາໃຈໃສ່ບຸກບືນ ແລະ ບຸກທະລຸ ຢ່າງຈິງຈັງກວ່າເກົ່າ. ພອ້ມນີ້ທ່ານຮອງປະທານປະເທດ ຍັງໄດ້ໃຫ້ທິດຊີ້ນໍາບາງດ້ານຕື່ມອີກເປັນຕົ້ນແມ່ນໃຫ້ສືບຕໍ່ເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານ, ສະມາຊິກພັກ ຕະຫຼອດຮອດປະຊາຊົນບັນດາເຜົ່າໃຫ້ຮັບຮູ້ເຂົ້າໃຈຕໍ່ຄວາມຫຍຸ້ງຍາກທາງດ້ານເສດຖະກິດ-ການເງິນທີ່ພວມປະເຊີນຢູ່, ໃຫ້ມີຄວາມອຸ່ນອ່ຽນທຸ່ນທ່ຽງ ແລະ ເປັນເຈົ້າຕົນເອງຫຼາຍຂຶ້ນ. ໃນນີ້ໃຫ້ສືບຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ເປັນໜ້າທີ່ ແລະ ຄວາມຮັບຜິດຊອບ ຂອງທົ່ວປວງຊົນ, ເອົາໃຈໃສ່ເດັດດ່ຽວແກ້ໄຂບັນຫາຢາເສບຕິດ ແລະ ປາກົດການຫຍໍ້ທໍ້ຕ່າງໆໃນສັງຄົມ ໃຫ້ຫຼຸດລົງ ແລະ ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ຢ່າງມີຈຸດສຸມ ໂດຍຂຸດຄົ້ນທ່າແຮງບົ່ມຊ້ອນ, ກຳລັງແຮງທີ່ມີ ທີ່ສາມາດປະຕິບັດໄດ້ເຊັ່ນ: ສົ່ງເສີມການຜະລິດກະສິກໍາ ເພື່ອຜະລິດສະບຽງອາຫານ ແລະ ຜະລິດສິນຄ້າໃຊ້ສອຍເພື່ອທົດແທນການນໍາເຂົ້າ; ຍູ້ແຮງ ແລະ ສົ່ງເສີມການລ້ຽງສັດໃຫຍ່ ແລະ ການປະມົງ ທີ່ແຂວງມີທ່າແຮງ; ສ້າງເຂດອຸດສາຫະກໍາເບົາ ແລະ ເຂດປຸງແຕ່ງກະສິກໍາ-ຫັດຖະກໍາ; ຂົນຂວາຍການລົງທຶນ (ສ້າງບັນຊີໂຄງການຮຽກການລົງທຶນ), ເພີ່ມທະວີ ໂດຍການປັບປຸງພື້ນຖານໂຄງລ່າງ, ການບໍລິການ, ເອົາໃຈໃສ່ການພັດທະນາດ້ານວັດທະນະທໍາ-ສັງຄົມ ແລະ ຍູ້ແຮງການພັດທະນາການທ່ອງທ່ຽວໃຫ້ໄດ້ທັງປະລິມານ ແລະ ຄຸນນະພາບ. ຮັບປະກັນດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາແຂວງໃຫ້ຫຼາຍຂຶ້ນ, ສືບຕໍ່ຫັນລົງກໍ່ສ້າງຮາກຖານການເມືອງ, ຍູ້ແຮງການພັດທະນາຊົນນະບົດໃໝ່ ຕິດພັນກັບການແກ້ໄຂຄອບຄົວທຸກຍາກ ແລະ ວຽກງານ 3 ສ້າງ. ເພີ່ມທະວີການນໍາພາຂອງຄະນະພັກແຕ່ລະຂັ້ນ ຕໍ່ວຽກງານພະນັກງານ ເພື່ອສ້າງໃຫ້ມີກຳລັງຖັນແຖວພະນັກງານມີຄວາມເຂັ້ມແຂງ, ໜັກແໜ້ນ, ກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ຮັບປະກັນທາງດ້ານຂະບວນການ, ເນື້ອໃນ, ບຸກຄະລະກອນ ແລະ ດ້ານວຽກງານອື່ນໆອີກ ແລະ ເຊື່ອແນ່ວ່າພາຍໃຕ້ການຊີ້ນໍາ-ນຳພາຂອງອົງຄະນະພັກແຕ່ລະຂັ້ນຈະເຮັດໃຫ້ແຂວງອຸດົມໄຊມີການພັດທະນາຢ່າງບໍ່ຢຸດຢັ້ງ.