ໃນລະຫວ່າງວັນທີ 13-16 ກັນຍາ 2023, ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນທາງການ ແຫ່ງ ສປປ ລາວ ໄດ້ເດີນທາງໄປເຄື່ອນໄຫວຢ້ຽມຢາມລັດຖະກິດ ແລະ ເຂົ້າຮ່ວມກອງປະຊຸມສຸດຍອດຂອງກຸ່ມປະເທດ 77 ແລະ ຈີນ ທີ່ ສາທາລະນະລັດ ກູບາ ຕາມການເຊື້ອເຊີນ ຂອງ ພະນະທ່ານ ມີເກັນ ດີເອັດສ-ກາແນນ ແບຣມູເດັດສ, ເລຂາທີໜຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສາທາລະນະລັດ ກູບາ.

          ການເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສ.ກູບາ ຂອງ ທ່ານປະທານປະເທດແຫ່ງ ສປປ ລາວ ແລະ ຄະນະ ຄັ້ງນີ້ ແມ່ນແນໃສ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມທີ່ມີມາຢ່າງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ແລະ ເປັນການຊຸກຍູ້ ສົ່ງເສີມການຮ່ວມມື ວຽກງານການພັດທະນາ ວິທະຍາສາດ, ເຕັກໂນໂລຊີ ແລະ ນະວັດຕະກໍາ ລະຫວ່າງປະເທດກໍາລັງພັດທະນາ ໂດຍສະເພາະໂຄງການຮ່ວມມືໃຕ້-ໃຕ້.

          ໃນໄລຍະການຢ້ຽມຢາມລັດຖະກິດ ລະຫວ່າງ ວັນທີ 13-14 ກັນຍາ 2023, ສະຫາຍ     ທອງລຸນ ສີສຸລິດ, ເລຂາທິການໃຫຍ່, ປະທານປະເທດແຫ່ງ ສປປ ລາວ ໄດ້ພົບປະເຮັດວຽກກັບຄູ່ຮ່ວມຕໍາແຫນ່ງ ສະຫາຍ ມີເກັນ ດີເອັດສ-ການແນນ ເບີມູເດັດສ (Miguel Diaz-Canel bermudez), ເລຂາທີ່ຫນຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສາທາລະນະລັດ ກູບາ; ພົບປະ ສະຫາຍ ເອັສຕາບານ ລາໂຊ ເຮີນານເດສ (Esteban Lazo Hernandez), ປະທານສະພາແຫ່ງຊາດ ອໍານາດປະຊາຊົນ ແຫ່ງ ສ.ກູບາ; ພົບປະ ສະຫາຍ ມານູເອັນ ມາເຣໂຣ ກຣຸຊ (Manuel Marrero Cruz), ນາຍົກລັດຖະມົນຕີແຫ່ງ ສ.ກູບາ ແລະ ພົບປະອະດີດການນໍາຂັ້ນສູງຂອງ ສ.ກູບາ  ເຊິ່ງສອງຝ່າຍໄດ້ຕີລາສູງຕໍ່ການພົວພັນຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ກູບາ-ລາວ ທີ່ມີມູນເຊື້ອ ແລະ ເພື່ອນມິດຍຸດທະສາດ ໄດ້ຮັບການເສີມຂະຫຍາຍນັບມື້ນັບມີຄວາມເລິກເຊິ່ງ ອັນໄດ້ນໍາຜົນປະໂຫຍດມາສູ່ປະຊາຊົນສອງຊາດ ລາວ-ກູບາ, ກູບາ-ລາວ, ພ້ອມທັງຢືນຢັນຈະສືບຕໍ່ຮ່ວມກັນຊຸກຍູ້ສົ່ງເສີມ ການພົວພັນການຮ່ວມມື ທີ່ມີມາແລ້ວນັ້ນ ໃຫ້ຫມັ້ນຄົງທະນົງແກ່ນ ແລະ ຂະຫຍາຍການຮ່ວມມືໃນຂົງເຂດຕ່າງໆ ຕາມທ່າແຮງຂອງສອງປະເທດ. ສະຫາຍ ເລຂາທິການໃຫຍ່, ປະທານປະເທດ ທອງລຸນ ສີສຸລິດ ຖືໂອກາດນີ້ ສະແດງຄວາມຂອບໃຈ ມາຍັງ ພັກ, ລັດ ກໍ່ຄືປະຊາຊົນກູບາອ້າຍນ້ອງ ທີ່ໄດ້ໃຫ້ການສະໜັບສະໜູນຊ່ວຍເຫຼືອອັນລໍ້າຄ່າ ແກ່ ສປປ ລາວ ທັງໃນໄລຍະປົດປ່ອຍຊາດໃນເມື່ອກ່ອນ ກໍ່ຄືໄລຍະປົກປັກຮັກສາ ແລະ ສ້າງສາປະເທດຊາດໃນປັດຈຸບັນ ໂດຍສະເພາະ ການສ້າງຊັບພະຍາກອນມະນຸດ, ດ້ານການແພດ, ກິລາ ແລະ ອື່ນໆ.   ໃນການພົບປະ, ທັງສອງຝ່າຍ ໄດ້ແຈ້ງໃຫ້ກັນຊາບ ກ່ຽວກັບສະພາບການພັດທະນາເສດຖະກິດ-ສັງຄົມທີ່ພົ້ນເດັ່ນຂອງແຕ່ລະປະເທດ ແລະ ປຶກສາຫາລື, ແລກປ່ຽນຄວາມຄິດເຫັນ ແລະ  ທິດທາງໃນການເສີມຂະຫຍາຍການພົວພັນຮ່ວມມືໃນຕໍ່ຫນ້າຖານອ້າຍນ້ອງ, ຄວາມສາມັກຄີອັນແໜ້ນແຟ້ນ ລະຫວ່າງ ສອງປະເທດ ໃຫ້ນັບມື້ນັບຂະຫຍາຍຕົວ ແລະ ມີປະສິດທິຜົນຕົວຈິງເປັນກ້າວໆ. ນອກຈາກນັ້ນ, ກໍ່ຍັງໄດ້ແລກປ່ຽນຄວາມຄິດເຫັນກ່ຽວກັບສະພາບພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈນໍາກັນ.

          ໃນໂອກາດພົບປະການນໍາຂັ້ນສູງ ສ.ກູບາ, ສະຫາຍ ທອງລຸນ ສີສຸລິດ ໄດ້ຢືນຢັນຄືນເຖິງນະໂຍບາຍອັນສະເໝີຕົ້ນສະເໝີປາຍຂອງ ພັກ ແລະ ລັດຖະບານລາວ ທີ່ມີຕໍ່ ພັກ ແລະ ລັດຖະບານ ກູບາ ໃນການເຄື່ອນໄຫວຕໍ່ສູ້ໃນເວທີພາກພື້ນ ແລະ ສາກົນ ລວມທັງການເຄື່ອນໄຫວຕໍ່ສູ້ເພື່ອຢຸດຕິການປິດລ້ອມກູບາ ມາເປັນເວລາ 60 ກວ່າປີ ແລະ ກ່າວສະແດງຄວາມຊົມເຊີຍຜົນສໍາເລັດ ແລະ ໄຊຊະນະ ທີ່ ພັກ, ລັດຖະບານ ແລະ ປະຊາຊົນກູບາ ຍາດມາໄດ້ໃນການປົກປັກຮັກສາໝາກຜົນຂອງການປະຕິວັດ ແລະ ການສ້າງສາພັດທະນາປະເທດ; ພ້ອມທັງ ຊົມເຊີຍ ສ.ກູບາ ເປັນເຈົ້າພາບຈັດກອງປະຊຸມສຸດຍອດກຸ່ມປະເທດ 77 ແລະ ຈີນ ໃນຄັ້ງນີ້ ຊຶ່ງສະແດງເຖິງຄວາມເຊື່ອໝັ້ນ ແລະ ການຮັບຮູ້ຂອງສາກົນຕໍ່ບົດບາດຂອງກູບາໃນເວທີສາກົນ.

          ໃນໂອກາດເຄື່ອນໄຫວຢ້ຽມຢາມເຮັດວຽກ ຢູ່ ສ.ກູບາ ຄັ້ງນີ້, ສະຫາຍ ທອງລຸນ ສີສຸລິດ ຍັງໄດ້ເຂົ້າຢ້ຽມຊົມ ສູນ ຟີແດນ ກາດສໂຕ ແລະ ລົງນາມໃນປຶ້ມຄວາມຊົງຈໍາແຫ່ງການມາຢ້ຽມຢາມສູນດັ່ງກ່າວ ຂອງ ສະຫາຍ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໃນຄັ້ງນີ້. ນອກຈາກ ນັ້ນ, ໃນຕອນແລງ ວັນທີ 14 ກັນຍາ 2023, ສະຫາຍ ເລຂາທິການໃຫຍ່, ປະທານປະເທດ ຍັງໄດ້ໂອ້ລົມນັກສຶກສາລາວ ທີ່ພວມສຶກສາ ຢູ່ ສ.ກູບາ ທີ່ ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ສ.ກູບາ ໂດຍມີນັກສຶກເຂົ້າຮ່ວມທັງຫມົດ 29 ທ່ານ ໃນຈໍານວນ 30 ທ່ານ ທີ່ສຶກສາ ຢູ່ ສ.ກູບາ, ພ້ອມທັງໄດ້ນໍາເອົາວັດຖຸປັດໄຈຈໍານວນໜຶ່ງສະຫນັບສະໜູນ ໃຫ້ກໍາລັງໃຈແກ່ລູກຫຼານນັກສຶກສາຂອງ ສປປ ລາວ ພວກເຮົາ.

          ໃນວັນທີ 15 ກັນຍາ 2023, ປະທານປະເທດ ທອງລຸນ ສີສຸລິດ ໄດ້ເຂົ້າຮ່ວມກອງປະຊຸມສຸດຍອດກຸ່ມປະເທດ 77 ແລະ ຈີນ ຮ່ວມກັບບັນດາປະມຸກລັດຂອງປະເທດກຸ່ມ 77 ແລະ ຈີນ ໂດຍໄດ້ກ່າວປາໃສ ແລະ ຮຽກຮ້ອງໃຫ້ກຸ່ມ ເພີ່ມທະວີບົດບາດຂອງຕົນໃນການສົ່ງເສີມ ແລະ ປົກປ້ອງຜົນປະໂຫຍດດ້ານເສດຖະກິດ-ສັງຄົມ ແລະ ມີຄວາມສາມັກຄີເປັນປຶກແຜ່ນ ແລະ ຄວາມເປັນເອກະພາບ ເພື່ອພ້ອມຊຸກຍູ້ບັນດາບັນຫາທີ່ພົວພັນໂດຍກົງ ຕໍ່ຜົນປະໂຫຍດອັນຊອບທໍາຂອງປະເທດກໍາລັງພັດ ທະນາ, ເປັນຕົ້ນການຈັດຕັ້ງປະຕິບັດ SDG, ການປະຕິຮູບລະບົບການເງິນສາກົນ ແລະ ອື່ນໆ; ຮຽກຮ້ອງໃຫ້ປະເທດກໍາລັງພັດທະນາ ຊອກຫາແນວທາງ ແລະ ວິທີການແບບໃໝ່ ເພື່ອຟື້ນຟູສະພາບເສດຖະກິດ-ສັງຄົມ ທີ່ໄດ້ຮັບຜົນກະທົບຈາກວິກິດການຕ່າງໆ ແລະ ສຶບຕໍ່ສ້າງຄວາມເຂັ້ມແຂງ ໂດຍການນໍາໃຊ້ ນະວັດຕະກໍາ ແລະ ເຕັກໂລໂລຊີຂໍ້ມູນຂ່າວສານທີ່ທັນສະໄໝ ເຂົ້າໃນການຈັດຕັ້ງປະຕິບັດວາລະການພັດທະນາ ລວມທັງການຈັດຕັ້ງປະຕິບັດເປົ້າຫມາຍການພັດທະນາແບບຍືນຍົງ; ຮຽກຮ້ອງໃຫ້ມີການສ້າງກົນໄກຮ່ວມມື ແລະ ມີຂໍ້ລິເລີ່ມທີ່ເປັນທ່າແຮງ ໃນການສົ່ງເສີມຄວາມແຂງແຮງ ແລະ ຊ່ວຍຊຸກຍູ້ຊຶ່ງກັນ ແລະກັນລະຫວ່າງປະເທດກໍາລັງພັດທະນາ.  

          ໃນໄລຍະເຄື່ອນໄຫວຢ້ຽມຢາມເຮັດວຽກ ຢູ່ ສາທາລະນະລັດ ກູບາ ຄັ້ງນີ້,  ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ຍັງໄດ້ພົບປະກັບ ທ່ານ ນິໂກລັດສ ມາດູໂຣ ໂມໂຣດສ (Nicolas Maduro Moros), ປະທານາທິບໍດີ ແຫ່ງ ສາທາລະນະລັດ ໂບລີວາຣຽນ ເວເນຊູເອລາ ເພື່ອສຶບຕໍ່ຊຸກຍູ້ສົ່ງເສີມການພົວພັນຮ່ວມມືລະຫວ່າງສອງຝ່າຍ ແລະ ປະສານສົມທົບ ແລະ ສະຫນັບສະຫນູນຊຶ່ງກັນ ແລະກັນ ໃນເວທີພາກພື້ນ ແລະ ສາກົນ.

          ການຢ້ຽມຢາມ ສາທາລະນະລັດ ກູບາ ຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໃນຄັ້ງນີ້ ໄດ້ຮັບການຕ້ອນຮັບຢ່າງອົບອຸ່ນ ແລະ ນໍາເນີນໄປຢ່າງມີຜົນສໍາເລັດອັນຈົບງາມ, ທັງໄດ້ເປັນການປະກອບສ່ວນທີ່ສໍາຄັນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບຖານສະຫາຍອ້າຍນ້ອງ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ກູບາ-ລາວ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ນະໂອກາດນີ້, ປະທານປະເທດ ແຫ່ງ ສປປ ລາວ ກໍໄດ້ເຊື້ອເຊີນ ປະທານປະເທດ ແຫ່ງ ສ.ກູບາ ໄປຢ້ຽມຢາມ ສປປ ລາວ ໃນໂອກາດທີ່ເຫັນວ່າເໝາະສົມ.