ຫ້ອງວ່າການສຳນັກງານປະທານປະເທດ (ຫສປທ) ໄດ້ຈັດຕັ້ງເຜີຍແຜ່ 03 ເອກະສານມູນເຊື້ອວັນສໍາຄັນຂອງຊາດຄື: ວິລະກຳໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ 24 ພຶດສະພາ 1960 ຄົບຮອບ 63 ປີ, ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ 18 ພຶດສະພາ 1959 ຄົບຮອບ 64 ປີ ແລະ ວັນກໍາມະກອນສາກົນ 1 ພຶດສະພາ 1886 ຄົບຮອບ 137 ປີ ການເຜີຍແຜ່ເອກະສານດັ່ງກ່າວໄດ້ຈັດຂຶ້ນເມື່ອວັນທີ 26 ພຶດສະພາ ຜ່ານມານີ້ ທີ່ຫ້ອງງານລ້ຽງທໍານຽບປະທານປະເທດ ຊຶ່ງມີຄະນະພັກ, ຄະນະນຳ, ບັນດາຫົວໜ້າກົມ, ຮອງກົມ, ພະນັກງານ ແລະ ສະມາຊິກກໍາມະບານເຂົ້າຮ່ວມຮັບຟັງ.

     ສະຫາຍ ເພັດສະໝອນ ພັນທະວົງ ຮອງເລຂາຄະນະບໍລິຫານງານພັກ ຮອງຫົວໜ້າຫ້ອງວ່າການ  ສຳນັກງານປະທານປະເທດໄດ້ເຜີຍແຜ່ເອກະສານ ວິລະກຳໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ ຄົບຮອບ 63 ປີ ໂດຍໄດ້ຍົກໃຫ້ເຫັນ ສະພາບ ແລະ ການເຄື່ອນໄຫວປະຕິວັດຂອງບັນດາຜູ້ນໍາຂອງພັກ ແລະ ແນວລາວ​ຮັກຊາດໃນໄລຍະ ປີ 1957-1959, ແຜນການໂຕນອອກຈາກຄຸກ, ການກະກຽມໂຕນອອກຈາກຄຸກໂພນເຄັງຂອງບັນດາຜູ້ນຳ ແລະ ສາເຫດການໂຕນຄຸກຢ່າງມະຫັດສະຈັນ ຂອງບັນດາຜູ້ນຳໄປສູ່ເຂດທີ່ໝັ້ນປະຕິວັດຢ່າງປອດໄພ; ເຜີຍແຜ່ເອກະສານວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ  ຄົບຮອບ 64 ປີ ໂດຍໄດ້ຍົກໃຫ້ເຫັນສະພາບການຖືກປິດລ້ອມຂອງກອງພັນທີ 2, ການຜ່າວົງປິດລ້ອມຂອງກອງພັນທີ 2 ວັນທີ 18/5/1959 ແລະ ຄວາມ ໝາຍສຳຄັນ ແລະ ປັດໄຈພື້ນຖານການຜ່າວົງປິດລ້ອມຂອງກອງພັນທີ 2.

     ສະຫາຍ ອິນທະປັນຍາ ຂຽວວົງພະຈັນ ຄະນະບໍລິຫານງານພັກ ຮອງຫົວໜ້າຫ້ອງວ່າການສຳນັກງານປະທານປະເທດ ໄດ້ເຜີຍແຜ່ເອກະສານ ວັນກຳມະກອນສາກົນ 1 ພຶດສະພາ 1886 ຄົບຮອບ 137 ປີ ໂດຍໄດ້ຍົກໃຫ້ເຫັນ ປະຫວັດຄວາມເປັນມາຂອງວັນກຳມະກອນສາກົນ ວັນທີ 1 ພຶດສະພາ, ບັນດາອົງການຈັດຕັ້ງ, ສົນທິສັນຍາ, ຖະແຫຼງການ ແລະ ກອງປະຊຸມຕ່າງໆກ່ຽວກັບກຳມະກອນ ແລະ ຜູ້ອອກແຮງານໃນພາກພື້ນ ແລະ ສາກົນ ແລະ ການປະກອບສ່ວນໃນພາລະກິດປະຕິວັດຂອງກຳມະກອນລາວຕະຫຼອດໄລຍະຜ່ານມາ.