ໃນວັນທີ 1 ມີຖຸນາ 2023 ທີ່ ທໍານຽບປະທານປະເທດ (ຫໍຄໍາ)ໄດ້ມີການຈັດພິທີປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ ທີ 1 ມີຖຸນາ ໂດຍການເຂົ້າຮ່ວມຂອງທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ, ທ່ານຮອງປະທານປະເທດທັງສອງທ່ານ, ຄະນະນໍາ ຫສປທ, ພະນັກງານ-ລັດຖະກອນ ແລະ ນ້ອງນ້ອຍເຍົາວະຊົນ ເຂົ້າຮ່ວມ.

    ທ່ານ ນ. ເຂັມມະນີ ພົນເສນາ ຫົວໜ້າ ຫສປທ ໄດ້ກ່າວວ່າການປູກຕົົ້ນໄມ້ຂອງການນໍາຂັ້ນສູງໃນວັນທີ 1 ມິຖຸນາ ວັນປູກຕົົ້ນໄມ້ແຫ່ງຊາດ ແມ່ນຂີດໝາຍອັນສໍາຄັນ ທີ່ສະແດງໃຫ້ເຫັນເຖິງການເປັນແບບຢ່າງທີ່ດີເລີດ. ສໍາລັບຫ້ອງວ່າການສໍານັກງານປະທານປະເທດ ກໍ່ຄືອົງການອື່ນຂອງພັກ ແລະ ລັດຖະບານ, ໄດ້ຖືເອົາວຽກງານສ້າງເມືອງສີຂຽວ, ສະອາດ ແລະ ສະຫງົບເປັນວຽກສໍາຄັນ ໂດຍຍົກສູງການປົກປັກຮັກສາ ແລະ ພັດທະນາປ່າໄມ້ ເອົາໃຈໃສ່ໃນການບົວລະບັດຮັກສາ ແລະ ເຮັດໃຫ້ທໍານຽບປະທານປະເທດກາຍເປັນສະຖານທີ່ສີຂຽວ ແລະ ບັນຍາກາດອັນດີ. ຢູູ່ທໍານຽບປະທານປະເທດ ປະຈຸບັນມີຕົ້ນໄມ້ທັງໝົດ 525 ຕົົ້ນ, ປະກອບມີ 27 ຊະນິດ. ການປູກຕົ້ນໄມ້ໃນຄັ້ງນີ້ ປະກອບດ້ວຍ: ຕົ້ນໄມ້ດູ່ແດງ ແລະ ຕົ້ນໄມ້ດູ່ລາຍ ຊຶ່ງແມ່ນໜຶ່ງໃນບັນດາຕົ້ນໄມ້ທີ່ຫາຍາກ ແລະ ມີຄຸນຄ່າສໍາລັບ ສປປ ລາວ ແລະ ຢູ່ໃນພາກພື້ນອີກດ້ວຍ.