ໃນວັນທີ 30 ພຶດສະພາ 2023, ທີ່ ທໍານຽບປະທານປະເທດ, ທ່ານ ນາງ ປານີ ຢາທໍ່ຕູ້, ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບອໍາລາ ຂອງ ທ່ານ ຈອນ ເພຍຊັນ (H.E. Mr. John Pearson), ເອກອັກຄະຣາຊາທູດ ວິສາມັນ ຜູ້ມີອໍານາດເຕັມ ແຫ່ງ ຣາຊະອານາຈັກ ອັງກິດ ແລະ ອຽກລັງເໜືອ ປະຈໍາ ສປປ ລາວ ເນື່ອງໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ.

     ໃນໂອກາດນີ້, ທ່ານ ຮອງປະທານປະເທດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດໃນການປະຕິບັດໜ້າທີ່ການທູດ ຕະຫຼອດໄລຍະຜ່ານມາ ຊຶ່ງ ທ່ານທູດ ໄດ້ມີການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ລາວ ແລະ ອັງກິດ ກໍຄື ສົ່ງເສີມການຮ່ວມມື ແລະ ສະໜັບສະໜູນຊ່ວຍເຫຼືອໃນດ້ານຕ່າງໆ ແລະ ໃນຕໍ່ໜ້າຫວັງວ່າ ທ່ານທູດ ຈະສືບຕໍ່ໃຫ້ການຊຸກຍູ້ສົ່ງເສີມການຮ່ວມມື, ການຊ່ວຍເຫຼືອສະໜັບສະໜູນ ແລະ ການແລກປ່ຽນໄປມາຫາສູ່ລະຫວ່າງການນໍາຂັ້ນສູງ, ບັນດາກະຊວງ, ອົງການ ເພື່ອແລກປ່ຽນບົດຮຽນ ແລະ ຂໍ້ມູນຂ່າວສານຕ່າງໆນໍາກັນ ໂດຍສະເພາະ ຂົງເຂດທີ່ສອງຝ່າຍມີທ່າແຮງ ແລະ ສາມາດແລກປ່ຽນຮ່ວມກັນ. ພ້ອມນີ້, ທ່ານ ຮອງປະທານປະເທດ ຍັງໄດ້ອວຍພອນໃຫ້ ທ່ານທູດ ຈົ່ງເດີນທາງກັບຄືນປະເທດ ດ້ວຍຄວາມສະຫວັດດີພາບ ແລະ ປະສົບຜົນສໍາເລັດໃນໜ້າທີ່ໃໝ່ ອັນມີກຽດຂອງທ່ານ.

     ໃນໂອກາດດຽວກັນ, ທ່ານທູດ ໄດ້ສະແດງຄວາມຂອບໃຈ ມາຍັງ ທ່ານຮອງປະທານປະເທດ ທີ່ໄດ້ໃຫ້ການຕອ້ນຮັບຢ່າງອົບອຸ່ນ ໃນຄັ້ງນີ້, ພ້ອມທັງສະແດງຄວາມຂອບໃຈ ຕໍ່ ລັດຖະບານ ແລະ ປະຊາຊົນລາວ ທີ່ໄດ້ໃຫ້ການຊ່ວຍເຫຼືອສະໜັບສະໜູນ ແລະ ໃຫ້ການເອົາໃຈໃສ່, ອໍານວຍຄວາມສະດວກ ຕະຫຼອດໄລຍະການປະຕິບັດໜ້າທີ່ການທູດຂອງຕົນ ຈົນໄດ້ຮັບຜົນສໍາເລັດຢ່າງຈົບງາມ ແລະ ຈະສືບຕໍ່ປະກອບສ່ວນເສີມຂະຫຍາຍການພົວພັນຮ່ວມມື ລະຫວ່າງ ຣາຊະອານາຈັກ ອັງກິດ ແລະ ສປປ ລາວ ໃນຕໍ່ໜ້າ.