ໃນວັນທີ 12 ພຶດສະພາ 2023 ອົງຄະນະພັກຫ້ອງວ່າການສໍານັກງານປະທານປະເທດ (ຫສປທ) ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ໃຫ້ 05 ໜ່ວຍພັກ ຈັດຂຶ້ນທີ່ຫ້ອງງານລ້ຽງທໍານຽບປະທານປະເທດ ໃຫ້ກຽດເປັນປະທານພິທີ ແລະ ມອບໃບຢັ້ງຢືນໂດຍສະຫາຍ ນ. ເຂັມມະນີ ພົນເສນາ, ກໍາມະການສູນກາງພັກ, ເລຂາຄະນະບໍລິຫານງານພັກ ຫສປທ, ມີສະຫາຍຮອງເລຂາຄະນະພັກ, ບັນດາຄະນະພັກ, ຄະນະໜ່ວຍພັກ, ສະມາຊິກພັກສົມບູນ ແລະ ສໍາຮອງເຂົ້າຮ່ວມ.

    ໃນພິທີດັ່ງກ່າວ ສະຫາຍ ສົມພຽງ ແກ້ວວິເສດ ຄະນະພັກ, ເລຂາໜ່ວຍພັກກົມກົດໝາຍ ໄດ້ຕາງໜ້າ 05 ໜ່ວຍພັກຂຶ້ນຜ່ານບົດສະຫຼຸບສັງລວມຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຂອງ 05 ໜ໋ວຍພັກ ແລະ ແຜນການປະຈໍາປີ 2023 ເຊິ່ງສະຫາຍໄດ້ຍົກໃຫ້ເຫັນວ່າ ອົງຄະນະພັກ ຫສປທ ມີ 05 ໜ່ວຍພັກຂຶ້້ນກັບຄື: ໜ່ວຍພັກກົມບໍລິຫານ ແລະ ຄຸ້ມຄອງ, ກົມຄົ້ນຄວ້າສັງລວມ, ກົມພົວພັນຕ່າງປະເທດ, ກົມກົດ ໝາຍ ແລະ ໜ່ວຍພັກກົມຈັດຕັ້ງ, ກວດກາ ແລະ ໂຄສະນາ ມີສະມາຊິກພັກທັງໝົດ 81 ສະຫາຍ, ຍິງ 36 ສະຫາຍ,ຕີລາຄາຈັດປະເພດສະມາຊິກພັກແຂງ 53 ສະຫາຍ, ປະເພດກາງ 04 ສະຫາຍ, ບໍ່ໄດ້ຈັດປະເພດສະມາຊິກພັກບໍານານ 07 ສະຫາຍ ແລະ ສະມາຊິກພັກສໍາຮອງ 15 ສະຫາຍ. ໃນ 1 ປີ ຜ່ານມາ ໄດ້ອະນຸມັດເປີດຮຽນສະໜັບສະໜູນໃຫ້ ຈໍານວນ 08 ຄົນ, ຍິງ 02 ຄົນ, ເປີດຮຽນກົດລະບຽບພັກໃຫ້ມະຫາຊົນກ້າວໜ້າຈໍານວນ 08 ຄົນ, ຍິງ 03 ຄົນ, ຈັດຮັບພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ 13 ສະຫາຍ, ຍິງ 05 ສະຫາຍ ແລະ ເລື່ອນສະມາຊິກພັກສໍາຮອງຂຶ້ນສົມບູນ ຈໍານວນ 10 ສະຫາຍ, ຍິງ 07 ສະຫາຍ. ໃນການນໍາພາປະຕິບັດໜ້າທີ່ການເມຶອງ ບັນດາໜ່ວຍພັກໄດ້ຖືເອົາການນໍາພາທາງດ້ານການເມືອງ-ແນວຄິດ ໂດຍການຊຸກຍູ້, ປຸກລະດົມສະມາຊິກພັກ, ພະນັກງານ-ລັດຖະກອນ ເຂົ້າຮ່ວມຮັບຟັງການເຜີຍແຜ່ເອກະສານກໍຄືແນວທາງນະໂຍບາຍຂອງພັກ, ກົດລະບຽບຂອງພັກ, ກົດໝາຍຂອງລັດ, ມະຕິ, ຄໍາສັ່ງ, ຄໍາແນະນໍາ, ມູນເຊື້ອວັນສໍາຄັນຕ່າງໆຂອງຊາດ ແລະ ສາກົນ ທີ່ ຫສປທ ຈັດຂຶ້ນ ທັງໝົດ 08 ຄັ້ງ, ມີ 25 ເອກະສານ ເຮັດໃຫ້ສະມາຊິກພັກ, ພະນັກງານ-ລັດຖະກອນ ມີຄວາມຮັບຮູ້, ກໍາແໜ້ນ, ເຂົ້າໃຈຕໍ່ເນື້ອໃນບັນດາເອກະສານໄດ້ດີສົມຄວນ ສະແດງອອກໃນທັດສະນະຫຼັກໝັ້ນ, ຄຸນສົມບັດສິນທໍາປະຕິວັດ ປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງ ເຮັດໃຫ້ການປະຕິບັດໜ້າທີ່ການເມືອງ ກໍຄືວິຊາສະເພາະຕາມພາລະບົດຂອງຕົນໃນການເປັນເສນາທິການໃຫ້ແກ່ຄະນະພັກ-ຄະນະນໍາ ຫສປທ ເຊິ່ງມີຜົນສໍາເລັດຫຼາຍດ້ານຈຶ່ງເຮັດໃຫ້ບັນດາໜ່ວຍພັກໄດ້ຮັບໃບຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ. ພ້ອມທັງຍົກໃຫ້ເຫັນດ້ານດີ, ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງ 05 ໜ່ວຍພັກປະຈໍາປີ 2023.

     ໃນຕອນທ້າຍພິທີ ສະຫາຍປະທານກອງປະຊຸມໄດ້ຍ້ອງຍໍຊົມເຊີຍຕໍ່ຜົນງານທີ່ບັນດາໜ່ວຍພັກຍາດມາໄດ້ເຊິ່ງຍາມໃດຄະນະໜ່ວຍພັກກໍມີຄວາມເອົາໃຈໃສ່ໃກ້ຊິດຕິດແທດ ນໍາພາ-ຊີ້ນໍາ ສະມາຊິກພາຍໃນໜ່ວຍພັກຂອງຕົນບຸກບືນເຂົ້າໃນການຈັດຕັງປະຕິບັດວຽກງານຕາມພາລະບົດບາດຂອງຕົນຈົນມີຜົນສໍາເລັດຫຼາຍດ້ານ. ສ່ວນທິດທາງໃນຕໍ່ໜ້າສະຫາຍຍັງໄດ້ເນັ້ນໃຫ້ແຕ່ລະໜ່ວຍພັກສືບຕໍ່ເພີ່ມທະວີສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນໃຫ້ມີຄວາມເຂົ້າໃຈ ແລະ ເຊື່ອມຊຶມແນວທາງນະໂຍບາຍຂອງພັກ, ສືບຕໍ່ປັບປຸງກົງຈັກການຈັດຕັ້ງໃຫ້ກະທັດຮັດ, ບອບບາງ ຕາມພາລະບົດບາດຂອງບັນດາກົມ, ຍົກສູງການເປັນເສນາທິການໃຫ້ເປັນມືອາຊີບທີ່ມີຄວາມຊໍານານງານ, ສືບຕໍ່ຮັກສາວັດຖຸເຕັກນິກທີ່ມີຢູ່ພາຍໃນ ຫສປທ ໃຫ້ເກີດປະໂຫຍດສູງສຸດຫັນສູ່ທັນສະໄໝເທື່ອລະກ້າວ, ຍົກສູງຄຸນນະພາບຂອງການເປັນເສນາທິການໃນການຄົ້ນຄວ້າບັນດາເອກະສານສໍາຄັນໂດຍສະເພາະແມ່ນກວດກາໃຫ້ຖືກຕ້ອງສອດຄ່ອງກັບນິຕິກໍາຕ່າງໆ.