ໃນວັນທີ 16 ພຶດສະພາ 2023 ຫ້ອງວ່າການສໍານັກງານປະທານປະເທດ(ຫສປທ) ໄດ້ຈັດກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈໍາປີ 2022 ແລະ ທິດທາງແຜນການປີ 2023 ຂຶ້້ນທີ່ຕຶກງານລ້ຽງທໍານຽບປະທານປະເທດ ໂດຍການເປັນປະທານຂອງສະຫາຍ ນ. ເຂັມມະນີ ພົນເສນາ, ກໍາມະການສູນກາງພັກ, ເລຂາຄະນະບໍລິຫານງານ ພັກ, ຫົວໜ້າ ຫສປທ ເຂົ້າຮ່ວມມີສະຫາຍ ພູໂຂງ ພິລາເພັດ ກໍາມະການຄະນະພັກ, ຫົວໜ້າຫ້ອງການ,ຕາງໜ້າຄະນະຈັດຕັ້ງສູນກາງພັກ;  ມີຄະນະພັກ, ຫົວໜ້າກົມ-ຮອງກົມ, ຫົວໜ້າພະແນກ-ຮອງຫົວໜ້າພະແນກ ແລະ ພະນັກງານ-ລັດຖະກອນທັງໝົດພາຍໃນ ຫສປທ.

     ໃນໂອກາດນີ້, ສະຫາຍ ຄໍາຕາ ລາດຊະວົງ ຄະນະພັກ, ເລຂາໜ່ວຍພັກ ຕາງໜ້າກົມຈັດຕັ້ງ ແລະ ກວດກາ ໄດ້ຂຶ້ນສະເໜີບົດສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງປະຈໍາປີ 2022 ແລະ ທິດທາງແຜນການປິ 2023 ເຊິ່ງສະຫາຍໄດ້ຍົກໃຫ້ເຫັນສະພາບໂດຍລວມຂອງພາກພື້ນ ແລະ ສາກົນ ກໍຄຶສະພາບລວມພາຍໃນປະເທດເຮົາທີ່ໄດ້ຮັບຜົນກະທົບຈາກສະພາບສາກົນ ເຮັດໃຫ້ພົບຄວາມຫຍຸ້ງຍາກທາງດ້ານເສດຖະກິດ-ການເງິນບໍ່ໜ້ອຍ, ນອກນັ້ນກໍແມ່ນການປະເຊີນກັບໄພທໍາມະຊາດ, ການລະບາດຂອງພະຍາດໂຄວິດ 19 ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ກໍຄືພະນັກງານ-ລັດຖະກອນ. ສໍາລັບ ຫສປທ ແມ່ນໄດ້ເອົາໃຈໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກ ຫສປທ ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດຄັ້ງທີ IX ແລະ ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ເພື່ອຫັນເຂົ້າສູ່ວຽກງານຕົວຈິງຂອງຂະແໜງການຕົນ ເຮັດໃຫ້ ຫສປທ ສາມາດຈັດຕັ້ງປະຕິບັດວຽກງານສໍາເລັດໄດ້ຫຼາຍດ້ານເປັນຕົ້ນແມ່ນວຽກງານກໍ່ສ້າງພັກໄດ້ເອົາໃຈໃສ່ໃນການກໍ່ສ້າງທາງດ້ານການເມືອງ-ແນວຄິດ ດ້ວຍການເຜີຍແຜ່, ເຊື່ອມຊຶມມະຕິ, ຄໍາສັ່ງ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປາຖະກະຖາວັນສໍາຄັນຕ່າງໆ ຈໍານວນ 08 ຄັ້ງ 25 ເອກະສານ; ກໍ່ສ້າງພັກທາງດ້ານການຈັດຕັ້ງໂດຍການຄົ້ນຄວ້າພິຈາລະນາຕາມລະບຽບການ-ຂັ້ນຕອນຂະຫຍາຍພັກ ເພື່ອໃຫ້ໄດ້ມະຫາຊົນຜູ້ກ້າວໜ້າພົ້ນເດັ່ນຄົບຕາມມາດຕະຖານເງື່ອນໄຂ ຂະຫຍາຍເຂົ້າເປັນສະມາຊິກພັກ ເປີດຮຽນສະໜັບສະໜູນ ຈໍານວນ 08 ທ່ານ, ຍິງ 02 ທ່ານ, ຮຽນກົດລະບຽບພັກໃຫ້ມະຫາຊົນກ້າວໜ້າ 08 ທ່ານ, ຍິງ 03 ທ່ານ, ຮັບມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ 13 ສະຫາຍ, ຍິງ 05 ສະຫາຍ ແລະ ເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ 10 ສະຫາຍ, ຍິງ 07 ສະຫາຍ; ກໍ່ສ້າງພັກທາງດ້ານແບບແຜນວິທີນໍາພາ; ຈັດຊຸດຝຶກອົບຮົມທິດສະດີການເມືອງ-ການປົກຄອງ ໄລຍະ 45 ວັນຊຸດທີ II; ຈັດຝຶກອົບຮົມ, ບໍາລຸງຍົກລະດັບ ທາງດ້ານທິດສະດີ, ວິຊາສະເພາະ, ພາສາຕ່າງປະເທດ ຢູ່ທັງພາຍໃນ ແລະ ຕ່າງປະເທດ; ບັນດາດ້ານດີ, ດ້ານອ່ອນ-ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້. ສ່ວນທິດທາງແຜນການວຽກງານຈຸດສຸມໃນການກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງໃນປີ​ 2023 ສືບຕໍ່ສຶກສາອົບຮົມການເມືອງ-ແນວຄິດ ດ້ວຍການການເຜີຍແຜ່, ເຊື່ອມຊຶມມະຕິ, ຄໍາສັ່ງ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປາຖະກະຖາວັນສໍາຄັນຕ່າງໆເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ກໍາແໜ້ນເນື້ອໃນຈິດໃຈປະຕິບັດໜ້າທີ່ວຽກງານໃຫ້ສໍາເລັດຜົນ; ພັດທະນາຊັບພະຍາກອນມະນຸດຂອງ ຫສປທ ດ້ວຍການກໍ່ສ້າງຍົກລະດັບພະນັກງານໃຫ້ມີຄວາມຮູ້ຄວາມສາມາດ ຕາມແຜນກໍານົດຕໍາແໜ່ງງານ; ປັບປຸງກົງຈັກການຈັດຕັ້ງໃຫ້ກະທັດຮັດສົມເຫດ ສົມຜົນ, ຮັບປະກັນການປະຕິບັດໜ້າທີ່ການເມືອງໃນໄລຍະໃໝ່. ຫຼັງຈາກນັ້ນ ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປະກອບຄໍາຄິດເຫັນໃສ່ບົດສະຫຼຸບຢ່າງມີຈຸດສຸມດ້ວຍຄວາມຮັບຜິດຊອບສູງ.

     ກອງປະຊຸມຍັງໄດ້ຮັບຟັງ ບາງເນື້ອໃນທີ່ສໍາຄັນຂອງບົດສະຫຼຸບວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງທົ່ວປະເທດປະຈໍາປີ 2022 ແລະ ທິດທາງໜ້າທີ່ປີ 2023 ແລະ ບົດໂອ້ລົມຂອງສະຫາຍຫົວໜ້າ ຄຈສພ ຕໍ່ກອງປະຊຸມສະຫຼຸບວຽກງານຈັດຕັ້ງທົ່ວປະເທດປະຈໍາປີ 2022 ນອກນັ້ນຍັງໄດ້ຮັບຟັງການປະກອບຄໍາຄິດຄໍາເຫັນຈາກຜູ້ຕາງໜ້າ ຄຈສພ.

     ໃນຕອນບ່າຍ ກອງປະຊຸມຍັງໄດ້ຮັບຟັງການເຜີຍແຜ່ມະຕິຂອງກົມການເມືອງຂອງສູນກາງພັກ ສະບັບເລກທີ 21/ກມສພ, ລົງວັນທີ 09 ພະຈິກ 2022 ວ່າດ້ວຍການຕີລາຄາພະນັກງານ; ຄໍາສັ່ງຂອງຄະນະຈັດຕັ້ງສູນກາງພັກ ເລກທີ 268/ຄລສພ ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ;  ຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 25/ຄຈສພ ລົງວັນທີ 24 ມັງກອນ 2023 ກ່ຽວກັບການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ  ວ່າດ້ວຍການດໍາເນີກອງປະຊຸມຄົບຄະນະກາງສະໄໝ.

     ໃນຕອນທ້າຍ ສະຫາຍປະທານກອງປະຊຸມໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງສະຫາຍໄດ້ສະແດງຄວາມຊົມເຊີຍຕໍ່ບັນດາຜົນງານທີ່ຍາດມາໄດ້ ພ້ອມນັ້ນກໍຍັງໄດ້ເນັ້ນໜັກໃຫ້ກົມຈັດຕັ້ງ ແລະ ກວດກາ ສືບຕໍ່ຄົ້ນຄວ້າ, ກວດກາຄືນ ບັນດານິຕິກໍາກ່ຽວກັບວຽກງານຈັດຕັ້ງພັກ-ພະນັກງານ, ປັບປຸງກົງຈັກການຈັດຕັ້ງ ເພື່ອເປັນບ່ອນອີງໃນການຈັດຕັ້ງປະຕິບັດຢູ່ພາຍໃນ ຫສປທ; ສືບຕໍ່ນໍາເອົາເນື້ອໃນຈິດໃຈຂອງກອງປະຊຸມໄປຈັດຕັ້ງຜັນຂະຫຍາຍໃຫ້ເປັນອັນລະອຽດເພື່ອນໍາໄປຈັດຕັ້ງປະຕິບັດເຂົ້າໃນໜ້າທີ່ການເມືອງຂອງຕົນໃຫ້ປະກົດຜົນເປັນຈິງ ຕາມຄໍາຂວັນກອງປະຊຸມໃຫຍ່ຄັ້ງທີ I ຂອງອົງຄະນະພັກ ຫສປທ ທີ່ວ່າ “ຍົກສູງຄວາມສາມາດນໍາພາຮອບດ້ານຂອງຄະນະພັກ ເສີມຂະຫຍາຍຄວາມສາມັກຄີໃຫ້ເປັນປຶກແຜ່ນ, ບຸກທະລຸໃນການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານທຸກວຽກງານຂອງ ຫສປທ”.