ຫ້ອງວ່າການສໍານັກງານປະທານປະເທດ(ຫສປທ) ໄດ້ຈັດກອງປະຊຸມສະຫຼຸບວຽກງານແຂ່ງຂັນຍ້ອງຍໍ ແລະ ພິທີປະດັບຫຼຽນ, ມອບໃບຍ້ອງຍໍລັດຖະບານໃຫ້ບຸກຄົນ ແລະ ກົມກອງດີເດັ່ນ ຜົນງານ 5ປີ (2016-2020), ໃນວັນທີ 21 ກຸມພານີ້ ທີ່ ຫສປທ, ພາຍໃຕ້ການເປັນປະທານຂອງທ່ານນາງ ເຂັມມະນີ ພົນເສນາ, ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ຫສປທ. ເຂົ້າຮ່ວມ ມີບັນດາທ່ານຮອງຫົວໜ້າ ຫສປທ, ອະດິດຮອງຫົວໜ້າ ຫສປທ, ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກພ້ອມດ້ວຍພະນັກງານ-ລັດຖະກອນພາຍ ໃນ ຫສປທ.

     ໃນພິທີ, ທ່ານ ເພັດສະໝອນ ພັນທະວົງ ຮອງເລຂາຄະນະພັກ, ຮອງຫົວໜ້າ ຫສປທ ໄດ້ຂຶ້ນສະເໜີບົດສະຫຼຸບຂະບວນການແຂ່ງຂັນຮັກຊາດແລະພັດທະນາ (2016 - 2020) ຊຶ່ງໄດ້ຍົກໃຫ້ເຫັນດ້ານດີ, ຜົນງານທີ່ຍາດມາໄດ້, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ແລະ ວາງທິດທາງແຜນການໃນຕໍ່ໜ້າ ກໍຄືແຕ່ນີ້ຮອດປີ 2025. ຕະຫຼອດໄລຍະ5 ປີ ຄະນະພັກ-ຄະນະນຳ ຫ້ອງວ່າການສຳນັກງານປະທານປະເທດ ໄດ້ຖືເອົາວຽກງານສຶກສາອົບຮົມຖັນແຖວພະນັກງານ-ລັດຖະກອນ ທາງດ້ານການເມືອງ, ແນວຄິດໃຫ້ຮັບຮູ້ຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ມີສະຕິຊົນຊັ້ນ, ມີນໍ້າໃຈຮັກຊາດ, ຮັກລະບອບໃໜ່ ເຊື່ອໝັ້ນຕໍ່ການນໍາພາຂອງພັກ, ເປັນເຈົ້າການໃນການປົກປັກຮັກສາແລະ ພັດທະນາປະເທດຊາດ. ວຽກງານທີ່ພົ້ນເດັ່ນພະນັກງານ-ລັດຖະກອນ ຂອງ ຫສປທ ຖືເອົາຄໍາຂວັນ "ຮັກຊາດ ແລະ ພັດທະນາ" ຕິດພັນກັບຂໍ້ແຂ່ງຂັນພາຍໃນ ຫສປທ ເປັນເນື້ອໃນຂອງການຈັດຕັ້ງປະຕິບັດເຮັດໃຫ້ປະສົບຜົນສໍາເລັດຕົວຈິງເປັນຢ່າງດີ ແລະ ໃນຊຸມປີຕໍ່ໜ້າຈະສືບຕໍ່ສຸມໃສ່ຍົກລະດັບຄວາມຮັບຮູ້ ແນວທາງນະໂຍບາຍຂອງພັກ, ຍົກສູງສະຕິລະວັງຕົວ ທາງດ້ານການເມືອງ, ສຸມໃສ່ຊຸກຍູ້ການປະຕິບັດ ບັນດາຄາດໝາຍຂອງມະຕິ I ແລະ ແຜນພັດທະນາ 5 ປີ(2021-2025) ຂອງ ຫສປທ ໃຫ້ເປັນຮູບປະທໍາຕົວຈິງ ໂດຍເລີ່ມຈາກບຸກຄົນ, ກົມກອງ, ຊຸກຍູ້ການພັດທະນາວຽກງານຂອງບັນດາກົມ, ຍູ້ແຮງການສ້າງຕົວແບບດີເດັ່ນ, ນໍາໜ້າຈາກນ້ອຍຫາໃຫຍ່, ຈາກດ້ານດຽວກ້າວສູ່ຫຼາຍດ້ານ ແລະ ຂະຫຍາຍອອກໃຫ້ກວ້າງຂວາງ, ມີຄຸນນະພາບ ແລະ ຍືນຍົງ ທັງຮັບປະກັນ 4 ຄາດໝາຍ: ໃຫ້ໄວ, ໃຫ້ດີ, ໃຫ້ຫຼາຍ ແລະ ຖືກກົດໝາຍ ແລະ 4 ເນື້ອໃນລວມຂອງການແຂ່ງຂັນຄື: ດ້ານການກໍ່ສ້າງຮາກຖານການເມືອງ, ດ້ານການພັດທະນາເສດຖະກິດ, ດ້ານວັດທະນະທໍາ-ສັງຄົມ ແລະ ດ້ານປ້ອງກັນຊາດ-ປ້ອງກັນຄວາມສະຫງົບ. ພິທີດັ່ງກ່າວ ໄດ້ມີການຍ້ອງຍໍບຸກຄົນ, ກົມກອງລວມໝູ່ ເຊິ່ງໃນນັ້ນໄດ້ຮັບຫຼຽນໄຊແຮງງານຊັ້ນ I ຈໍານວນ 22 ທ່ານ ແລະ 4 ກົມກອງ, ຫຼຽນໄຊແຮງງານຊັ້ນ II ຈໍານວນ 6 ທ່ານ ແລະ 2 ກົມກອງ, ຫຼຽນໄຊແຮງງານຊັ້ນ III ຈໍານວນ 16 ທ່ານ, ຫຼຽນກາແຮງງານ ຈໍານວນ 22 ທ່ານ ແລະ ໃບຍ້ອງຍໍລັດຖະບານ 9 ທ່ານ

ໃນໂອກາດນີ້ ທ່ານ ອິນທະປັນຍາ ຂຽວວົງພະຈັນ ຮອງຫົວໜ້າ ຫສປທ ໄດ້ສະເໜີເນຶ້ອໃນລວມຂໍ້ແຂ່ງຂັນຮັກຊາດ ແລະ ພັດທະນາ ຮອດປີ 2025 ເພື່ອສືບຕໍ່ການແຂ່ງຂັນສ້າງຂະບວນການໃຫ້ເປັນຂະບວນຟົດຟື້ນ-ຕໍ່ເນື່ອງ. ຈາກນັ້ນ ທ່ານ ຄໍາຕາ ລາດຊະວົງ ຫົວໜ້າກົມຈັດຕັ້ງ ແລະ ກວດກາ ຍັງໄດ້ຂຶ້ນສະເໜີຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນໍາແຂ່ງຂັນ-ຍ້ອງຍໍ ຫສປທ, ຂໍ້ຕົກລົງວ່າດ້ວຍການແຕ່ງຕັ້ງກອງເລຂາຊ່ວຍວຽກ ແລະ ສະເໜີເນື້ອໃນຂໍ້ແຂ່ງຂັນຮັກຊາດ ແລະ ພັດທະນາ ຫສປທ ຮອດປີ 2025  ພ້ອມທັງຕາງໜ້າບັນດາກົມຂຶ້ນຈັບມືແຂ່ງຂັນເພື່ອນໍາເອົາໄປຜັນຂະຫຍາຍ ແລະ ນໍາພາຈັດຕັ້ງປະຕິບັດໃຫ້ໄດ້ຮັບຜົນດີ.

     ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມຈາກປະທານກອງປະຊຸມເຊິ່ງທ່ານກໍໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານທີ່ພະນັກງານກໍຄືກົມກອງພາຍໃນ ຫສປທ ຍາດມາໄດ້ ພ້ອມນັ້ນ ທ່ານກໍຍັງໄດ້ເນັ້ນໜັກໃຫ້ສືບຕໍ່ເຊື່ອມຊຶມຜັນຂະຫຍາຍແຜນການຮອດ 2025 ໂດຍສະເພາະແມ່ນ ການຫັນເປັນທັນສະໄໝໃນການບໍລິຫານວຽກງານພາຍໃນ ຫສປທ ໃຫ້ໄວ, ໃຫ້ດີ, ໃຫ້ຫຼາຍ, ຖືກກົດໝາຍ; ຮຽນຮູ້ປ່ຽນແປງຕົວເອງຢ່າງບໍ່ຢຸດຢັ້ງ ຮຽນຮູ້ທັກສະໃໝ່ໃຫ້ທັນສະພາບທັນຍຸກທັນສະ  ໄໝ; ຍົກລະດັບເພື່ອສ້າງຕົວແບບພັດທະນາໃນການປະຕິບັດວຽກງານຮອບດ້ານ.