ໃນວັນທີ 20 ກຸມພາ 2023 ທີ່ຫ້ອງວ່າການສຳນັກງານປະທານປະເທດ, ທ່ານ ນາງ ເຂັມມະນີ ພົນເສນາ, ຫົວໜ້າຫ້ອງວ່າການສຳນັກງານປະທານປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ນາງ ມໍຣະກົດ ສີສະຫວັດດີ (Morakot SRISWASDI), ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈຳ ສປປ ລາວ.

     ທ່ານຫົວໜ້າຫ້ອງວ່າການສຳນັກງານປະທານປະເທດ ໄດ້ສະແດງຄວາມຊົມເຊີຍ ທ່ານທູດ ມໍຣະກົດ ສີສະຫວັດດີ  ໃນການມາປະຕິບັດໜ້າທີ່ການທູດ ຢູ່ ສປປ ລາວ ແລະ ມີຄວາມເຊື່ອໝັ້ນວ່າ ດ້ວຍຄວາມຮູ້ຄວາມສາມາດ ແລະ ປະສົບການຂອງທ່ານທູດ, ສາຍພົວພັນມິດຕະພາບ ແລະ ການຮ່ວມມືອັນດີງາມຂອງ ສອງປະເທດ ສປປ ລາວ ແລະ ຣາຊະອານາຈັກໄທ ຈະໄດ້ຮັບການສືບຕໍ່ເພີ່ມທະວີຮັດແໜ້ນ ແລະ ຈະເລີນງອກງາມຍິ່ງໆຂຶ້ນ.

     ທ່ານຍັງໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ລະຫວ່າງ ລັດຖະບານ ແລະ ປະຊາຊົນສອງຊາດ ໂດຍສະເພາະດ້ານການຄ້າ-ການລົງທຶນສອງຝ່າຍ ເຫັນໄດ້ວ່າມີທ່ວງທ່າທີ່ນັບມື້ເພີ່ມຂຶ້ນໃນອານາຄົດ, ສະເໜີທ່ານທູດຊຸກຍູ້ວຽກງານການຄ້າ-ການລົງທຶນ ແລະ ການທ່ອງທ່ຽວ ລວມທັງການຢ້ຽມຢາມຂອງການນຳຂັ້ນສູງໃຫ້ຫຼາຍຂຶ້ນ. ພ້ອມນີ້, ກໍຍິນດີໃຫ້ການຮ່ວມມື ແລະ ແລກປ່ຽນປຶກສາຫາລືໃນບັນຫາຕ່າງໆໂດຍສະເພາະທາງດ້ານການເມືອງ ໃນຂອບເຂດຄວາມຮັບຜິດຊອບ ຂອງຫ້ອງວ່າການສຳນັກງານປະທານປະເທດ.

    ໂອກາດດຽວກັນນີ້, ທ່ານ ເອກອັກຄະຣາຊະທູດ ແຫ່ງ ຣາຊະອາຈາຈັກໄທ ກ່າວສະເເດງຄວາມຮູ້ສຶກເປັນກຽດທີ່ໄດ້ເຂົ້າຢຽມຂ່ຳນັບທ່ານ ຫົວໜ້າ ຫສປທ ໃນມື້ນີ້ ແລະ ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນລາວ ທີ່ໄດ້ໃຫ້ການຕ້ອນຮັບທ່ານເປັນຢ່າງດີ. ພາຍຫຼັງເຂົ້າຍື່ນສານຕໍ່ ທ່ານປະທານປະເທດ ທອງລຸນ ສີສຸລິດ ທ່ານທູດມີຄວາມຕັ້ງໃຈ ສືບຕໍ່ໃຫ້ການພົວພັນຮ່ວມມື ແລະ ສົ່ງເສີມການຄ້າ-ການລົງທຶນ ໃຫ້ມີການພັດທະນາ ແລະ ເກີດປະໂຫຍດໃຫ້ສັງຄົມລາວ.