ໃນວັນທີ 16-18 ມັງກອນ 2023 ຜ່ານມານີ້, ທ່ານ ນາງ ປານີ ຢາທໍ່ຕູ້, ຮອງປະທານປະເທດ ພ້ອມດ້ວຍຄະນະຕິດຕາມ: ທ່ານ ນາງ ເຂັມມະນີ ພົນເສນາ, ຫົວໜ້າ ຫສປທ, ບັນດາຫົວໜ້າກົມ, ຮອງຫົວໜ້າກົມ ແລະ ພະນັກງານວິຊາການ ກ່ຽວຂ້ອງ ຂອງ ຫສປທ ໄດ້ລົງເຄື່ອນໄຫວຢ້ຽມຢາມ ແລະ ຊີ້ນຳວຽກງານ ຢູ່ ແຂວງຈຳປາສັກ ໂດຍການຕ້ອນຮັບ ຂອງ  ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ພ້ອມດ້ວຍຄະນະນຳ ຂອງແຂວງ-ເມືອງ, ສະພາປະຊາຊົນແຂວງ, ພະແນກການ, ຂະແໜງການຂອງແຂວງ ແລະ ປະຊາຊົນແຂວງຈໍາປາສັກ.

     ໃນພາກເຊົ້າ ຂອງວັນທີ 16 ມັງກອນ 2023, ທ່ານຮອງປະທານປະເທດ ໄດ້ຮັບຟັງການລາຍງານ ຈາກ ບັນດາຫົວໜ້າພະແນກການໃນຂົງເຂດເສດຖະກິດ-ການເງິນ ກ່ຽວກັບການຈັດຕັ້ງປະຕິບັດວຽກງານປີ 2022 ແລະ ທິດທາງແຜນປີຕໍ່ໜ້າ ຂອງແຕ່ລະພາກສ່ວນ; ລາຍງານການປ່ອຍສິນເຊື່ອ ແລະຍອດເຫຼືອເງິນຝາກ; ຮັບຟັງລາຍງານ ຂໍ້ສະດວກ ແລະ ຂໍ້ຫຍຸ້ງຍາກ ກ່ຽວກັບການລົງທຶນຜ່ານປະຕູດຽວ, ການຈັດສັນທຶນຕາມການແບ່ງຂັ້ນຄຸ້ມຄອງຂອງແຂວງ; ການສົ່ງເສີມສິນຄ້າສົ່ງອອກ, ຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດນະໂຍບາຍສົ່ງເສີມການຜະລິດ ເປັນສິນຄ້າ ໂດຍສະເພາະ ດ້ານນິຕິກຳຂອງສະພາແຫ່ງຊາດ, ຂອງລັດຖະບານ ແລະ ທ້ອງຖິ່ນ; ກົນໄກການຕະຫຼາດ ໃນການສົ່ງເສີມສິນຄ້າລາວ ເພື່ອສົ່ງອອກໄປຕະຫຼາດ ພາຍໃນປະເທດ ຈາກ ແຂວງ ຈຳປາສັກໄປ ແຂວງອື່ນໆ ຫຼື ໄປຕ່າງປະເທດ; ການຄຸ້ມຄອງລາຄາສິນຄ້າ ແລະ ການອະນຸຍາດນຳເຂົ້າສິນຄ້າ ແລະ ຮັບຟັງລາຍງານການສົ່ງເສີມການຜະລິດສິນຄ້າ ໃນວຽກງານກະສິກຳ ໂດຍສະເພາະ ສິນຄ້າທີ່ລັດຖະບານລາວໄດ້ເຊັນ ກັບ ຫວຽດນາມ, ຈີນ ແລະໄທ; ກົນໄກການປະສານງານກ່ຽວກັບການສົ່ງເສີມການຜະລິດສິນຄ້າ ກັບກະຊວງທີ່ກ່ຽວຂ້ອງ ຊີ້ໃຫ້ເຫັນດ້ານດີ ແລະ ດ້ານອ່ອນ ທີ່ຈະໄດ້ສືບຕໍ່ແກ້ໄຂ. ໃນໂອກາດນີ້, ທ່ານນາງ ປານີ ຢາທໍ່ຕູ້ ຮອງປະທານປະເທດ ກໍໄດ້ມີຄຳເຫັນໂອ້ລົມ ໂດຍໄດ້ຍ້ອງຍໍຊົມເຊີຍຄະນະພັກ - ອົງການປົກຄອງແຂວງ ເຫັນໄດ້ຄວາມພະຍາຍາມໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ; ແຜນງົບປະມານ ຂອງລັດຖະບານ ເວົ້າລວມ, ເວົ້າສະເພາະ ຂອງແຂວງຈຳປາສັກ ທີ່ມີຫຼາຍດ້ານປະຕິບັດໄດ້ດີ, ບັນດາພະແນກການມີຄວາມເປັນເຈົ້າການໃນການຈັດຕັ້ງປະຕິບັດສິດ, ໜ້າທີ່ ພາລະບົດບາດ ມີ ການແບ່ງຂັ້ນຄຸ້ມຄອງ ແລະ ຫັນເຂົ້າສູ່ການຄຸ້ມຄອງລັດດ້ວຍລະບຽບກົດໝາຍ; ພ້ອມນັ້ນ ທ່ານຮອງປະທານປະເທດ ຍັງໄດ້ເນັ້ນໃຫ້ ຄະນະພັກ - ອົງການປົກຄອງແຂວງ ຈຳປາສັກ ເອົາໃຈໃສ່ ໃນການຊີ້ນຳ ການຈັດຕັ້ງປະຕິບັດ 2 ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ  ໃຫ້ຫັນເຂົ້າສູ່ແຜນງານ ເປັນໂຄງການລະອຽດ ເປັນຄວາມຮັບຜິດຊອບລວມຂອງທຸກຂະແໜງການ, ລວມທັງ ຜູ້ປະກອບການ ແລະປະຊາຊົນ, ເພີ້ມທະວີການຄຸ້ມຄອງເງິນຕາ, ສົ່ງເສີມການຜະລິດເປັນສິນຄ້າ ດ້ວຍການ ສ້າງກົນໄກປະສານງານໃນການຮ່ວມມື ແລະ ການແກ້ໄຂວຽກງານດັ່ງກ່າວ ຕ້ອງໄດ້ຮັບການຈັດຕັ້ງປະຕິບັດຢ່າງເຂັ້ມງວດ. ໃນພາກບ່າຍຂອງວັນດຽວກັນ ທ່ານ ຮອງປະທານປະເທດ ແລະ ຄະນະ ກໍໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ສະພາປະຊາຊົນແຂວງຈຳປາສັກ ໂດຍມີທ່ານ ວິໄລວົງ ບຸດດາຄຳ ເລຂາພັກແຂວງ ເຈົ້າແຂວງຈຳປາສັກ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງ, ມີຄະນະປະຈໍາສະພາປະຊາຊົນແຂວງ, ບັນດາສະມາຊິກສະພາແຫ່ງຊາດເຂດເລືອກຕັງທີ 15, ສະມາຊິກສະພາປະຊາຊົນແຂວງ, ພະແນກການກົມກອງອອມຂ້າງ, ບັນດາຫົວໜ້າຂະແໜງການປົກປ້ອງກົດໝາຍ ແລະ ພະນັກງານກ່ຽວຂ້ອງເຂົ້າຮ່ວມ.

     ໃນພາກເຊົ້າ ຂອງວັນທີ 17 ມັງກອນ 2023 ທ່ານ ຮອງປະທານປະເທດ ແລະ ຄະນະໄດ້ລົງຢ້ຽມຢາມ ແລະ ຊຸກຍູ້ ເຂດການຜະລິດເຂົ້າ ບ້ານປ່າໂມກ ເມືອງມຸນລະປາໂມກ ແຂວງຈໍາປາສັກ. ພ້ອມທັງໄດ້ຮັບຟັງການລາຍງານກ່ຽວກັບ ເຂດການຜະລິດເຂົ້າ ຂອງບໍລິສັດດັ່ງກ່າວ, ມີເນື້ອທີ່ປູກເຂົ້າທັງໝົດ 350 ເຮັກຕາ. ສຳລັບການຜະລິດເຂົ້າປີຜ່ານມາ ແລະ ຕົ້ນປີ 2023 ຄາດຄະເນ ຜົນຜະລິດທີ່ຈະໄດ້ຮັບປະມານ 4ໂຕນຕໍ່ເຮັກຕາ. ນອກນັ້ນ, ບໍລິສັດ ຍັງມີໂຮງສີເຂົ້າທັນສະໄໝ, ສາມາດຄັດເມັດແຍກເມັດເຂົ້າໄດ້ລະອຽດ. ຫຼັງຈາກນັ້ນ, ຍັງໄດ້ລົງເບິ່ງຈຸດທີ່ຈະກໍສ້າງຂົວເຊລຳເພົາ ຕັ້ງຢູ່ບ້ານເວີນຍາງ ເມືອງມູນລະປາໂມກ, ຕາມການອອກແບບຂົວ ແມ່ນກຳນົດຈຸດຫ່າງຈາກເສັ້ນທາງໄປປະມານ 500 ແມັດ, ເປັນຂົວເບຕົງອັດແຮງ, ມີຄວາມຍາວ 150 ແມັດ, ກວ້າງໜ້າຂົວ 8 ແມັດ, ໂຄງການນີ້ໄດ້ເລີ່ມດຳເນີນການແຕ່ ປີ 2013 ເປັນຕົ້ນມາ. ຫຼັງຈາກນັ້ນ, ໃນພາກບ່າຍຂອງວັນດຽວກັນ, ທ່ານ ຮອງປະທານປະເທດ, ພ້ອມດ້ວຍຄະນະ, ຍັງໄດ້ສືບຕໍ່ລົງມາຢ້ຽມຢາມ ໂຄງການເຂດພັດທະນາເສດຖະກິດໃໝ່ ສີພັນດອນ ເມືອງໂຂງ ແຂວງຈໍາປາສັກ.

     ໃນຕອນເຊົ້າຂອງວັນທີ 18 ມັງກອນ 2023, ທ່ານ ຮອງປະທານປະເທດ ໄດ້ພົບປະ, ໂອ້ລົມ ຄະນະພັກ-ຄະນະນໍາ, ພະນັກງານຫຼັກແຫ່ງ ແຂວງຈໍາປາສັກ ຢູ່ຫ້ອງປະຊຸມຊັ້ນ 4 ຂອງຫ້ອງວ່າການແຂວງຈໍາປາສັກ ໂດຍມີ ທ່ານ ເລຂາພັກແຂວງ, ເຈົ້າແຂວງຈຳປາສັກ, ຄະນະປະຈໍາພັກແຂວງ, ບັນດາເຈົ້າເມືອງ, ຫົວໜ້າພະແນກການ ແລະ ຂະແໜງການອ້ອມຂ້າງ ເຂົ້າຮ່ວມ. ໃນໂອກາດນີ້, ທ່ານ ຮອງປະທານປະເທດ ໄດ້ຮັບຟັງລາຍງານ ສະພາບແຜນການພັດທະນາເສດຖະກິດ-ສັງຄົມ ປີ 2022 ແລະ ທິດທາງແຜນການປີ 2023 ຂອງແຂວງຈໍາປາສັກ. ພາຍຫຼັງຈາກການຮັບຟັງແຜນພັດທະນາເສດຖະກິດ-ສັງຄົມ ຂອງແຂວງ ທ່ານ ຮອງປະທານປະເທດ ໄດ້ຍ້ອງຍໍ ຊົມເຊີຍ ແລະ ຕີລາຄາສູງຕໍ່ຜົນສໍາເລັດທີ່ຍາດມາໄດ້ ໃນການພັດທະນາເສດຖະກິດ-ສັງຄົມ ຂອງແຂວງ ແລະ ສະ   ເໜີໃຫ້ທ່ານເຈົ້າແຂວງ ແລະ ຄະນະພັກ-ຄະນະນໍາ ທຸກຂັ້ນຂອງທຸກພາກສ່ວນ ຈົ່ງສືບຕໍ່ເອົາໃຈໃສ່ຈັດຕັ້ງປະຕິບັດຕາມແຜນການຄາດໝາຍສູ້ຊົນ ຂອງຕົນໃຫ້ສໍາເລັດຕາມແຜນການທີ່ວ່າງໄວ້. ສືບຕໍ່ຊຸກຍູ້ການປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ຕ້ານຢາເສບຕິດ ເພາະເປັນໜ້າທີ່ລວມຂອງທຸກພາກສ່ວນ.

     ໃນພາກບາຍຂອງວັນດຽວກັນ, ທ່ານ ຮອງປະທານປະເທດ ແລະ ຄະນະ ໄດ້ເຄື່ອນໄຫວຢ້ຽມຢາມພົບປະປະຊາຊົນ, ບ້ານໜອງໄຮໂຄກ, ເມືອງໂພນທອງ, ແຂວງຈໍາປາສັກ; ໂດຍມີ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະນຳຂອງແຂວງ, ພະແນກການກ່ຽວຂ້ອງ ຮ່ວມຕິດຕາມ ແລະ ທ່ານ ສຸພາບ ທໍາມະຮັກສາ ເຈົ້າເມືອງໂພນທອງ, ຄະນະນຳຂອງເມືອງ, ອຳນາດການປົກຄອງ, ຕະຫຼອດຮອດພໍ່ແມ່ປະຊາຊົນ ກຸ່ມບ້ານ ດັ່ງກ່າວ ໃຫ້ການຕ້ອນຮັບ.

     ໃນໂອກາດນີ້, ທ່ານ ຮອງປະທານປະເທດ ພ້ອມຄະນະໄດ້ຮັບຟັງລາຍງານ ການຈັດຕັ້ງປະຕິບັດວຽກງານໃນໄລຍະໜຶ່ງປີຜ່ານມາຂອງເມືອງຈາກທ່ານ ສຸພາບ ທໍາມະຮັກສາ ເຈົ້າເມືອງໂພນທອງ, ພ້ອມທັງຮັບຟັງລາຍງານສະພາບລວມຂອງກຸ່ມບ້ານ ຜ່ານການຈັດຕັ້ງປະຕິບັດ ຍ້ອນໄດ້ຮັບການຊີ້ນຳຢ່າງໃກ້ຊິດຈາກຄະນະພັກຂັ້ນເທິງ ແລະ  ຄວາມສາມັກຄີຂອງພໍ່ແມ່ປະຊາຊົນໃນການພັດທະນາ, ພໍ່ແມ່ປະຊາຊົນ ໄດ້ປະກອບສ່ວນທຶນຮອນ ແລະ ເຮື່ອແຮງເຂົ້າໃນການກໍ່ສ້າງເສັ້ນທາງເບຕົງພາຍໃນບ້ານ ແລະ ການສ້າງພື້ນຖານໂຄງລ່າງ; ການຈັດຕັ້ງໄດ້ນຳພາຊຸກຍູ້ ພໍ່ແມ່ປະຊາຊົນສ້າງເສດຖະກິດຮອບດ້ານ, ການຜະລິດເຂົ້ານາປີ, ປູກພືດ, ລ້ຽງສັດ ແລະ ສ້າງວຽກເຮັດງານທຳເຮັດໃຫ້ເສດຖະກິດບຸກຄົນ, ຄອບຄົວດີຂຶ້ນເປັນກ້າວໆ. ໂອກາດນີ້, ທ່ານຮອງປະທານປະເທດ ກໍມີຄຳເຫັນ ພົບປະໂອ້ລົມໂດຍ ໄດ້ຍ້ອງຍໍ, ຊົມເຊີຍ ຕໍ່ຜົນສໍາເລັດ ຂອງຄະນະພັກ-ອົງການປົກຄອງທຸກຂັ້ນ ຕະຫຼອດຮອດພໍ່ແມ່ປະຊາຊົນ ພາຍໃນກຸ່ມບ້ານ ທີ່ຍາດມາໄດ້ໃນໄລຍະທີ່ຜ່ານມາ, ພ້ອມນັ້ນກໍໄດ້ເນັ້ນໃຫ້ ອົງການປົກຄອງ ທຸກຂັ້ນ ຕ້ອງໄດ້ ຈັດຊຸດອົບຮົມວິຊາຊີບໃຫ້ແກ່ລູກຫຼານ, ສົ່ງເສີມປະຊາຊົນ ໃຫ້ມີທ່າແຮງທາງດ້ານການຜະລິດ ເພື່ອໃຫ້ມີລາຍໄດ້ເພີ່ມຂື້ນ, ວຽກງານກະສິກໍາ, ຫັດຖະກຳ, ປຸງແຕ່ງ ໃຫ້ກາຍເປັນຜະລິດຕະພັນ  ເພື່ອຫຼຸດຜ່ອນການນໍາເຂົ້າສິນຄ້າ ແລະ ການເປັນສິນຄ້າປະຈໍາຊຸມຊົນ ເພື່ອດຶງດູດການທ່ອງທ່ຽວ ເຮັດໃຫ້ເມືອງໂພນທອງ ເປັນຈຸດດຶງດູດນັກທ່ອງທ່ຽວເຂົ້າມາແວະຊົມ ຈັບຈ່າຍ ຜະລິດຕະພັນປະຈໍາກຸ່ມບ້ານໄດ້ ພ້ອມທັງຂະຫຍາຍຕະຫຼາດຈໍາໜ່າຍສິນຄ້າ ເລີ່ມຈາກພາຍໃນປະເທດ ເພື່ອສ້າງຄຸນນະພາບຊີວິດຂອງປະຊາຊົນ ໃນທ້ອງຖິ່ນດີຂື້ນເທື່ອລະກ້າວ.

     ຈາກນັ້ນ, ທ່ານຮອງປະທານປະເທດ ແລະຄະນະຍັງໄດ້ ຢ້ຽມຢາມພົບປະໂອ້ລົມຄະນະພັກ, ຄະນະນຳ ແລະ ພະນັກງານ - ລັດຖະກອນ ບັນດາຂະແໜງການຂອງຄະນະຄຸ້ມຄອງດ່ານຊາຍແດນສາກົນວັງເຕົ່າ ແລະ ຢ້ຽມຢາມ ບໍລິສັດ ທ່າບົກວັງເຕົ່າ ຈຳກັດ ຢູ່ເຂດເສດຖະກິດວັງເຕົ່າໂພນທອງ ຕື່ມອີກ.