ຫ້ອງວ່າການສໍານັກງານປະທານປະເທດ(ຫສປທ) ໄດ້ຈັດກອງປະຊຸມເຜີຍແຜ່ມະຕິກອງປະຊຸມຄົບຄະນະຄັ້ງທີ5 ຂອງຄະນະບໍລິຫານງານສູນກາງພັກ ສະໄໝທີXI, ບົດໂອ້ລົມຂອງສະຫາຍເລຂາທິການໃຫຍ່ຕໍ່ກອງປະຊຸມສະຫຼຸບຕີລາຄາວຽກງານກໍ່ສ້າງຮາກຖານການເມືອງຕິດພັນວຽກງານພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະວຽກງານ 3 ສ້າງ, ຜົນສໍາເລັດກອງປະຊຸມສະຫຼຸບຕີລາຄາ ຂະບວນການແຂ່ງຂັນຮັກຊາດ ແລະ ພັດທະນາ ຊຶ່ງພິທີດັ່ງກ່າວໄດ້ຈັດຂຶ້ນໃນວັນທີ 27 ມັງກອນ2023 ທີ່ ຫສປທ ໂດຍໃຫ້ກຽດເຜີຍແຜ່ຂອງສະຫາຍ ນ. ເຂັມມະນີ ພົນເສນາ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ຫສປທ ແລະ ສະຫາຍ ເພັດສະໝອນ ພັນທະວົງ ຮອງເລຂາຄະນະບໍລິຫານງານພັກ, ຮອງຫົວໜ້າ ຫສປທ, ເຂົ້າຮ່ວມຮັບຟັງມີ: ຄະນະພັກ, ຄະນະນໍາ, ຫົວໜ້າກົມ, ຮອງກົມ,ຫົວໜ້າພະແນກ, ຮອງພະແນກ ແລະ ພະນັກງານ-ລັດຖະກອນພາຍໃນ ຫສປທ.

     ສະຫາຍ ນ. ເຂັມມະນີ ພົນເສນາ ໄດ້ຍົກໃຫ້ເຫັນວ່າ: ກອງປະຊຸມຄົບຄະນະຄັ້ງທີ 5 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ຍົກສູງຄວາມຮັບຜິດຊອບທາງດ້ານການເມືອງ, ສຸມສະຕິປັນຍາຄົ້ນຄວ້າ, ປຶກສາຫາລືແລະໃຫ້ທິດຊີ້ນໍາຕໍ່ບັນຫາສໍາຄັນ ເປັນຕົ້ນ: ແຜນພັດທະນາເສດຖະກິດ-ສັງຄົມ,ແຜນງົບປະມານ,ແຜນເງິນຕາໄລຍະ 9ເດືອນ,ວຽກງານຈຸດສຸມທ້າຍປີ 2022 ແລະ ທິດທາງປີ 2023 ຕິດພັນກັບ 2 ວາລະແຫ່ງຊາດ; ໃນທິດທາງຕໍ່ໜ້າ 2023 ຕ້ອງສູ້ຊົນຍູ້ແຮງ ການພັດທະນາເສດຖະກິດ-ສັງຄົມ ໃຫ້ໄປຕາມທິດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ,ໝັ້ນທ່ຽງແລະມີຄວາມຍືນຍົງ. ຄາດຄະເນຜົນກະທົບພາຍນອກຕໍ່ປະເທດລາວບົນພື້ນຖານນັ້ນກໍານົດມາດຕະການຕົວຈິງ ເພື່ອແກ້ໄຂໃຫ້ທັນການ ແລະ ນໍາສະເໜີຕໍ່ສະພາແຫ່ງຊາດເພື່ອພິຈາລະນາຮັບຮອງເອົາເປັນຕົ້ນ: ອັດຕາເຕີບໂຕຂອງເສດຖະກິດໃນລະດັບ GDP 4,5% ຂຶ້ນໄປ ຊຶ່ງເປັນຄາດໝາຍທີ່ມີລັກສະນະບຸກບືນສູ້ຊົນສູງສົມຄວນໃນເງື່ອນໄຂສະພາບແວດລ້ອມຫຼາຍດ້ານບໍ່ເອື້ອອໍານວຍ, ສ້າງລາຍຮັບເຂົ້າງົບປະມານໃຫ້ໄດ້ 17% ຂອງGDP ຂຶ້ນໄປ, ສຶກສາຄົ້ນຄວ້າລະອຽດກ່ຽວກັບການປັບຂຶ້ນອັດຕາດັດສະນີເງິນເດືອນຂອງພະນັກງານ-ລັດຖະກອນ,ທະຫານ,ຕໍາຫຼວດ; ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານຕ່າງປະເທດ; ການຕີລາຄາການປະຕິບັດມະຕິວ່າດ້ວຍເພີ່ມທະວີການຄຸ້ມຄອງ ແລະ ພັດທະນາທີ່ດິນໃນໄລຍະໃໝ່; ການດໍາເນີນຊີວິດການເມືອງຂອງຄະນະບໍລິຫານງານສູນກາງພັກ ປະຈໍາປີ 2022; ສືບຕໍ່ຊີ້ນໍາການຜັນຂະຫຍາຍ ແລະ ຈັດຕັ້ງປະຕິບັດມະຕິ XI ຂອງພັກ ແລະ ແຜນພັດທະນາເສດຖະກິດສັງຄົມ 5 ປີ ຄັ້ງທີ 9, ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານສູ່ລວງເລິກ. ຄະນະບໍລິຫານງານສູນກາງພັກໄດ້ ຮຽກຮ້ອງໃຫ້ຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ ຕ້ອງທຸ່ມເທສະຕິປັນຍາ,ເຫື່ອແຮງ ແລະ ຍົກສູງຄວາມຮັບຜິດຊອບທາງດ້ານການເມືອງ ເພື່ອນໍາພາ ຊີ້ນໍາການຜັນຂະຫຍາຍ ແລະ ຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມຄັ້ງນີ້ ຕິດພັນກັບການຍູ້ແຮງຂະບວນການແຂ່ງຂັນ “ ຮັກຊາດ ແລະ ພັດທະນາ ” ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ກໍຄື ການແກ້ໄຂບັນຫາຕົວຈິງທີ່ເກີດຂຶ້ນ ຢູ່ແຕ່ລະຂົງເຂດວຽກງານ ໃຫ້ເປັນລະບົບຕໍ່ເນື່ອງ ແລະ ມີປະສິດທິພາບ.

     ຈາກນັ້ນກອງປະຊຸມຍັງໄດ້ຮັບຟັງການເຜີຍແຜ່ບົດໂອ້ລົມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ຕໍ່ກອງປະຊຸມສະຫຼຸບຕີລາຄາວຽກງານກໍ່ສ້າງຮາກຖານການເມືອງຕິດພັນວຽກງານພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ວຽກງານສາມສ້າງ ເຊິ່ງເນື້ອໃນໂອ້ລົມຂອງສະຫາຍເລຂາທິການໃຫຍ່ເພິ່ນໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາຕໍ່ຄະນະຮັບຜິດຊອບທີ່ໄດ້ເອົາໃຈໃສ່ໃນການກະກຽມ ແລະ ຈັດຕັ້ງດໍາເນີນກອງປະຊຸມຄັ້ງນີ້ ເຊິ່ງເປັນກອງປະຊຸມທີ່ມີຄວາມໝາຍສໍາຄັນ ພ້ອມນັ້ນກໍຍັງໄດ້ເນັ້ນໜັກວ່າ: ດັ່ງທີ່ພວກເຮົາຮູ້ນໍາກັນແລ້ວວ່າຍາມໃດພັກເຮົາກໍຖືວຽກງານກໍ່ສ້າງຮາກຖານການເມືອງເປັນບັນຫາຍຸດທະສາດທັງສະເພາະໜ້າ ແລະ ຍາວນານ; ມັນແມ່ນທາດແທ້ມູນເຊື້ອຂອງພັກເຮົາເຊິ່ງເປັນພັກທີ່ ມາຈາກປະຊາຊົນ ແລະ ເດີນຕາມເສັ້ນທາງມະຫາຊົນ, ໃກ້ຊິດຕິດແທດກັບປະຊາຊົນ ແລະ ເຮັດທຸກສິ່ງທຸກຢ່າງເພື່ອຜົນປະໂຫຍດຂອງປະຊາຊົນ;  ກໍາລັງການເມືອງຂອງມະຫາຊົນແມ່ນກໍາລັງຂອງທົ່ວປວງຊົນທີ່ເຂົ້າຮ່ວມການຕໍ່ສູ້ປະຕິວັດຢ່າງມີການຈັດຕັ້ງ ເຊິ່ງປະກອບດ້ວຍຫຼາຍຊັ້ນຄົນໃນສັງຄົມພາຍໃຕ້ຄັນທຸງແນວໂຮມເອກະພາບແຫ່ງຊາດໂດຍມີພັກປະຕິວັດເປັນຜູ້ນໍາພາ; ບົດຮຽນອັນສໍາຄັນໜຶ່ງແຫ່ງໄຊຊະນະຂອງການປະຕິວັດຢູ່ປະເທດເຮົາແມ່ນການຮູ້ໝູນໃຊ້ ແລະ ສົມທົບຢ່າງແໜ້ນແຟ້ນ ແລະ ຖືກຕ້ອງລະຫວ່າງການຕໍ່ສູ້ດ້ວຍອາວຸດ, ການຕໍ່ສູ້ທາງການເມືອງ, ທາງກົດໝາຍໄປພ້ອມກັນ. ການຕໍ່ສູ້ດ້ວຍການເມືອງໃນເວລານັ້ນ ກໍອີງໃສ່ໝາກຜົນຂອງການກໍ່ສ້າງກໍາລັງການເມືອງຂອງມະຫາຂົນຢູ່ຖັນແຖວບັນດາອົງການຈັດຕັ້ງມະຫາຊົນຂອງແນວລາວສ້າງຊາດ, ບັນດາກໍາລັງເປັນກາງຮັກຊາດ ແລະ ບັນດາອົງການຈັດຕັ້ງສັງຄົມ, ບຸກຄົນຮັກຊາດ, ກໍາມະກອນ, ຂ້າລັດຖະການ ຍ້ອນແນວນັ້ນ ໃນວຽກງານກໍ່ສ້າງຮາກຖານການເມືອງຂອງພັກເຮົາຍາມໃດກໍຕິດພັນຢ່າງສະໜິດແໜ້ນລະຫວ່າງ ການສ້າງກໍາລັງການເມືອງ ກັບ ການສ້າງກໍາລັງປະກອບອາວຸດ ໂດຍຖືອົາວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານເປັນໜ້າທີ່ໃຈກາງ ເພື່ອຮັບປະກັນໃຫ້ແກ່ການພັດທະນາໄດ້ດໍາເນີນໄປຢ່າງເປັນປົກກະຕິ ແລະ ມີຄວາມຕໍ່ເນື່ອງມາຮອດເທົ່າທຸກວັນນີ້. ກອງປະຊຸມສະຫຼຸບຕີລາຄາຂະບວນການແຂ່ງຂັນຮັກຊາດ ແລະ ພັດທະນາ ໄດ້ຈັດຂຶ້ນໃນວັນທີ 15-16 ກັນຍາ 2022 ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວເຊິ່ງກອງປະຊຸມໄດ້ສະຫຼຸບຕີລາຄາ ແລະ ຖອດຖອນບົດຮຽນ ການຈັດຕັ້ງຜັນຂະຫຍາຍມະຕິ, ຄໍາສັ່ງຂອງພັກ, ລັດຖະບານກ່ຽວກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ, ວຽກງານສາມສ້າງໃນໄລຍະຜ່ານມາ (2015-2021)ສະຫຼຸບ ແລະ ປະເມີນຄືນຂະບວນການແຂ່ງຂັນຮັກຊາດ ແລະ ພັດທະນາ ເພື່ອກໍານົດທິດທາງແຜນການໃນໄລຍະ2021-2025 ໃຫ້ສອດຄ່ອງ ແລະ ສ້າງການຫັນປ່ຽນຢ່າງເປັນຮູບປະທໍາ; ຈັດຕັ້ງພິທີຍ້ອງຍໍຊົມເຊີຍຕໍ່ຜູ້ທີ່ມີຜົນງານດີເດັ່ນໃນຂະບວນການແຂ່ງຂັນຮັກຊາດ ແລະ ພັດທະນາ ໃຫ້ກົມກອງ ແລະ ບຸກຄົນດີເດັ່ນໃນຂອບເຂດທົ່ວປະເທດ ດ້ວຍການມອບຫຼຽນໄຊແຮງງານຊັ້ນ I ຈໍານວນ 2.950 ທ່ານ ແລະ ກົມກອງ415, ຫຼຽນໄຊແຮງງານຊັ້ນ  II ຈໍານວນ 6.168 ທ່ານ ແລະ 563ກົມກອງ, ຫຼຽນໄຊແຮງງານຊັ້ນ III ຈໍານວນ 10.941 ທ່ານ ແລະ789ກົມກອງ, ຫຼຽນນາມມະຍົດວິລະຊົນແຮງງານ 01 ທ່ານ , ຫຼຽນນາມມະຍົດພັດທະນາດີເດັ່ນແຫ່ງຊາດ 02 ທ່ານ, ຫຼຽນກາແຮງງານ 19.515 ທ່ານ ແລະ 1.150 ກົມກອງ ແລະ ໃບຍ້ອງຍໍລັດຖະບານ ບຸກຄົນ 46.721 ທ່ານ ແລະ 2.119 ກົມກອງ.