ໃນວັນທີ 13 ກຸມພາ 2023, ທີ່ ທໍານຽບປະທານປະເທດ, ທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 13 – 14 ກຸມພາ 2023. ທ່ານ ປະທານປະເທດ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ ສົມເດັດ ນາຍົກລັດຖະມົນຕີ ຮຸນ ແຊນ ພ້ອມດ້ວຍຄະນະຜູ້ແທນຂັ້ນສູງ ກຳປູເຈຍ ທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນຄັ້ງນີ້, ເຊິ່ງເປັນນິມິດໝາຍອັນດີ ແລະ ເປັນການປະກອບສ່ວນອັນສຳຄັນໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ທີ່ມີມູນເຊື້ອມາແຕ່ດົນນານ ຖານບ້ານໃກ້ເຮືອນຄຽງ ລະຫວ່າງ ລາວ  ແລະ ກໍາປູເຈຍ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ພ້ອມດຽວກັນນີ້, ທ່ານປະທານປະເທດ ກໍໄດ້ສະແດງຄວາມຊົມເຊີຍ ຕໍ່ຜົນສໍາເລັດຂອງການພົບປະປຶກສາຫາລື ລະຫວ່າງ ສອງນາຍົກລັດຖະມົນຕີ ລາວ ແລະ ກໍາປູເຈຍ ທີ່ສາມາດຕົກລົງຫຼາຍບັນຫາຮ່ວມກັນ ແລະ ໄດ້ມີການຮ່ວມລົງນາມເອກະສານທີ່ສໍາຄັນຈໍານວນໜຶ່ງ ເປັນຕົ້ນ ການຮ່ວມລົງນາມການພົວພັນແບບຄູ່ຮ່ວມມືຍຸດທະສາດຮອບດ້ານ ໜັ້ນຄົງຍາວນານ ລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ ໄລຍະ 2023 – 2027. ນອກນີ້, ໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການເປັນປະທານອາຊຽນ ຂອງ ກໍາປູເຈຍ ໃນປີ 2022. ພ້ອມນີ້, ທ່ານປະທານປະເທດ ກໍໄດ້ຝາກຄວາມຢື້ຢາມຖາມຂ່າວ ເຖິງ ພະບາດ ສົມເດັດ ພະບໍຣົມມະນຽດ ໂນໂຣດົມ ສີຫາມຸນີ, ພະມະຫາກະສັດ ແຫ່ງ ຣາຊະອານາຈັກ ກໍາປູເຈຍ ແລະ ຫວັງວ່າຈະໄດ້ຮັບກຽດ ຕ້ອນຮັບ ພະບາດ ສົມເດັດ ມາຢ້ຽມຢາມ ສປປ ລາວ ອີກຄັ້ງໜຶ່ງ ໃນອານາຄົດ. ໃນໂອກາດດັ່ງກ່າວນີ້, ທ່ານ ທອງລຸນ ສີສຸລິດ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນ ໂພໄຊລ້ານຊ້າງ ໃຫ້ ສົມເດັດ ອັກຄະມະຫາ  ເສນາບໍດີ ເຕໂຈ ຮຸນ ແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ເຊິ່ງເປັນຫຼຽນທີ່ມອບໃຫ້ຜູ້ນໍາຕ່າງປະເທດ ທີ່ມີຄຸນງາມຄວາມດີ, ມີຜົນງານດີເດັ່ນ ທີ່ປະກອບສ່ວນໃນການເສີມສ້າງ, ປົກປັກຮັກສາສາຍພົວພັນມິດຕະພາບ ແລະ ການຮ່ວມມືທີ່ດີ ຕໍ່ ສປປ ລາວ.

                                                        ພິທີປະດັບຫຼຽນ ໂພໄຊລ້ານຊ້າງ ໃຫ້  ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ