ທ່ານປະທານປະເທດ ແຫ່ງ ສປປ ລາວ ຕ້ອນຮັບການເຂົ້າຢ້ຽມຂໍ່ານັບ ທ່ານ ສຸຣະກຽດ ສະຖຽນໄທ

20/03/2023

ທ່ານປະທານປະເທດ ແຫ່ງ ສປປ ລາວ ຕ້ອນຮັບການເຂົ້າຢ້ຽມຂໍ່ານັບ ທ່ານ ສຸຣະກຽດ ສະຖຽນໄທ

     ໃນຕອນແລງວັນທີ 20 ມີນາ 2023 ທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ໄດ້ຕ້ອນຮັບ ທ່ານ ສາດສະດາຈານ ດຣ. ສຸຣະກຽດ ສະຖຽນໄທ, ປະທານຄະນະມົນຕີເພື່ອສັນຕິພາບ ແລະ ຄວາມປອງດອງແຫ່ງອາຊີ, ຮອງປະທານກຳມະການທີ່ປຶກສາ ແລະ ປະທານກຳມະການບໍລິຫານ ມູນນິທິອາສາເພື່ອນເພິ່ງພາຍາມຍາກ ສະພາກາຊາດໄທ, ອະດີດຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກໄທ ໃນໂອກາດເດີນທາງມາເຄື່ອນໄຫວວຽກງານ ຢູ່ ສປປ ລາວ ໃນລະຫວ່າງວັນທີ 20-21 ມີນາ 2023.

     ໃນໂອກາດດັ່ງກ່າວ, ທ່ານປະທານປະເທດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ສຸຣະກຽດ ສະຖຽນໄທ ທີ່ໄດ້ນຳພາຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເພື່ອໃຫ້ກຽດບັນລະຍາຍ ແລະ ແລກປ່ຽນປະສົບການກ່ຽວກັບບັນຫາພາກພື້ນ ແລະ ສາກົນ ໃຫ້ແກ່ພະນັກງານກະຊວງການຕ່າງປະເທດ ແລະ ພາກສ່ວນທີ່ກ່ຽວຂ້ອງຕ່າງໆຂອງລາວ ພາຍໃຕ້ຫົວຂໍ້ “ສະພາບການສາກົນ ແລະ ພາກພື້ນໃນປະຈຸບັນ ສົ່ງຜົນກະທົບຕໍ່ຂົງເຂດພວກເຮົາຄືແນວໃດ”. ນອກຈາກນີ້, ທ່ານປະທານປະເທດ ສະແດງຄວາມຍິນດີ ແລະ ຂອບໃຈຕໍ່ການສະໜັບສະໜູນ ຂອງມູນນິທິອາສາເພື່ອນເພິ່ງພາຍາມຍາກ, ສະພາກາຊາດໄທ ໃຫ້ແກ່ຝ່າຍລາວ ໂດຍສະເພາະການຈັດຕັ້ງປະຕິບັດໂຄງການຕິດຕັ້ງສະນີວັດແທກລະດັບ ແລະ ສະພາບອາກາດ ຈຳນວນ 11 ສະຖານີ ຢູ່ແຂວງຕ່າງໆຂອງລາວ, ຊຶ່ງເປັນເຄື່ອງມືໜຶ່ງທີ່ສຳຄັນໃນການເຝົ້າລະວັງລະດັບນໍ້າ ແລະ ຕິດຕາມສະພາບອາກາດ ເພື່ອເປັນຂໍ້ມູນນຳໃຊ້ເຂົ້າໃນການແຈ້ງເຕືອນປະຊາຊົນ ເພື່ອຫຼຸດຜ່ອນຜົນກະທົບຈາກໄພນໍ້າຖ້ວມ ກໍ່ຄືໄພທຳມະຊາດຕ່າງໆທີ່ອາດຈະເກີດຂຶ້ນ ເນື່ອງຈາກບັນຫາອຸທົກກະໄພ ແມ່ນເປັນໄພຂົ່ມຂູ່ ແລະ ສິ່ງທ້າທາຍຕໍ່ຊີວິດການເປັນຢູ່ຂອງປະຊາຊົນ ແລະ ຫວັງວ່າການຮ່ວມມືດັ່ງກ່າວ ຈະສືບຕໍ່ເພີ່ມທະວີໃຫ້ຫຼາຍຂຶ້ນ ເພື່ອຄວາມສົມບູນພູນສຸກຂອງປະຊາຊົນສອງຊາດ.

   ໃນໂອກາດດຽວກັນ, ທ່ານ ສຸລະກຽດ ສະຖຽນໄທ ກໍ່ໄດ້ສະແດງຄວາມຂອບໃຈຕໍ່ ທ່ານປະທານປະເທດ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ແລະ ການເຊື້ອເຊີນໃຫ້ມາເຂົ້າຮ່ວມການບັນລະຍາຍ ແລະ ແລກປ່ຽນປະສົບການໃນຄັ້ງນີ້, ພ້ອມທັງຢືນຢັນວ່າຈະສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ໃຫ້ໄດ້ຮັບການພັດທະນາຕະຫຼອດໄປ.

 

ຂ່າວຫຼ້າສຸດ
ໜັງສືແຈ້ງເຊີນຍື່ນເຈດຈຳນົງຄວາມສົນໃຈສຳລັບການບໍລິການທີ່ປຶກສາ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ