ປະທານປະເທດ ແຫ່ງ ສປປ ລາວ ກ່າວຄໍາອວຍພອນປີໃໝ່ສາກົນ ເນື່ອງໃນໂອກາດ ສົົ່ງທ້າຍປີເກົົ່າ ຄ.ສ 2022, ຕ້ອນຮັບປີໃໝ່ ຄ.ສ 2023

30/12/2022

ປະທານປະເທດ ແຫ່ງ ສປປ ລາວ ກ່າວຄໍາອວຍພອນປີໃໝ່ສາກົນ ເນື່ອງໃນໂອກາດ ສົົ່ງທ້າຍປີເກົົ່າ ຄ.ສ 2022, ຕ້ອນຮັບປີໃໝ່ ຄ.ສ 2023

     ໃນຕອນເຊົ້າ ວັນທີ 30 ທັນວາ 2022, ທີ່ທຳນຽບປະທານປະເທດ ນະຄອນຫຼວງວຽງຈັນ, ທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ໄດ້ກ່າວຄຳອວຍພອນປີໃໝ່ສາກົນ ເນື່ອງໃນໂອກາດສົ່ງທ້າຍປີເກົ່າ ຄ.ສ 2022, ຕ້ອນຮັບປີໃໝ່ ຄ.ສ 2023 ເຖິງພີ່ນ້ອງຮ່ວມຊາດລາວ ຜ່ານທາງໂທລະພາບແຫ່ງຊາດ ແລະ ໄດ້ອອກອາກາດໃນວັນທີ 01 ມັງກອນ 2023 ເຊິ່ງມີເນື້ອໃນດັ່ງນີ້໊:

     ພີ່ນ້ອງຮ່ວມຊາດ ທີ່ຮັກເເພງທັງຫຼາຍ !

     ປີ ຄ.ສ 2022 ທີ່ຜ່ານມານັັ້ນ, ພວກເຮົາໄດ້ປະເຊີນກັບຄວາມຫຍຸ້ງຍາກ ແລະ ສິ່ງທ້າທາຍນາໆປະການ ໂດຍ​ສ​ະ​ເພາະແມ່ນຍັງສືບຕໍ່ມີ​ຜົນ​ກະ​ທົບ​ຈາກ​ການ​ແຜ່​ລະ​ບາດ​ ຂອງ​ພະ​ຍາດ​ໂຄວິດ-19 ແລະ ບັນ​ຫາຄວາມຫຍຸ້ງຍາກດ້ານ​ເສດ​ຖະ​ກິດການ​ເງິນ ທີ່ໜັກໜ່ວງກໍ່ຕາມ, ແຕ່ດ້ວຍ​ຄວາມເປັນນໍ້າໜຶ່ງໃຈດຽວຂອງທົ່ວພັກ ທົ່ວລັດ ແລະ ທົ່ວປວງຊົນລາວ ທັງຊາດ ແລະ ການສະໜັບສະໜູນຊ່ວຍເຫຼືອຂອງເພື່ອນມິດສາກົນ ພວກ​ເຮົາ​ຈຶ່ງສາ​ມາດ​ແກ້​ໄຂ​ບັນ​ຫາ​ເຫຼົ່າ​ນັ້ນ​ໄດ້​ໂດຍ​ພື້ນ​ຖານ, ສາ​ມາດ​ສະ​ກັດ​ກັ້ນ ແລະ ປະຄັບປະຄອງ​ບໍ່​ໃຫ້​ເກີດ​ວິ​ກິດ​ການ​ທີ່​ຮ້າຍ​ແຮງ​ມາໄດ້, ອັນ​ໄດ້​ເຮັດ​ໃຫ້ປະເທດຊາດ ມີສະຖຽນລະພາບທາງດ້ານການເມືອງຢ່າງໜັກແໜ້ນ ແລະ ສັງຄົມມີຄວາມສະຫງົບ, ເສດຖະກິດຄ່ອຍໆ ໄດ້​ຮັບ​ການ​ຟື້ນ​ຕົວ​ຂຶ້ນຢ່າງຕໍ່ເນື່ອງ,​ ເຊິ່ງເປັນການສ້າງເງື່ອນໄຂຫຼາຍດ້ານ ທີ່ຈະເຮັດໃຫ້ເສດ​ຖະ​ກິດ ຂອງປະ​ເທດພວກ​ເຮົາໄດ້ມີພຶື້ນຖານຈຳນວນໜຶ່ງ ເພື່ອເປັນທ່າແຮງກ້າວຂຶ້ນໃນປີຕໍ່ໄປ.

     ປີໃໝ່ 2023 ນີ້, ພວກ​ເຮົາ​​ຍັງ​ຈະ​ໄດ້​ສືບ​ຕໍ່​ຜ່ານ​ຜ່າບັນ​ດາ​ສິ່ງ​ທ້າ​ທາຍ ແລະ ອຸ​ປະ​ສັກ​ດັ່ງ​ກ່າວ​ຕື່ມ​ອີກ. ສະ​ນັ້ນ, ຂ້າພະເຈົ້າ ຂໍຮຽກຮ້ອງມາຍັງປວງຊົນລາວທຸກຖ້ວນໜ້າ ທັງ​ຢູ່​ພາຍ​ໃນ ແລະ ຢູ່ຕ່າງ​ປະ​ເທດ ຈົົ່ງພ້ອມ​ກັນສຸມທຸກສະ​ຕິ​ປັນ​ຍາ, ເຫື່ອ​ແຮງ ແລະ ກໍາລັງໃຈ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດຂອງພວກເຮົາ ໃຫ້ບັນລຸຈຸດໝາຍ ທີ່ໄດ້ວາງໄວ້, ນໍາເອົາປະເທດຊາດຂອງພວກເຮົາ ໄປສູ່ບາດກ້າວໃໝ່ ຂອງການພັດທະນາ, ເຮັດໃຫ້ປະຊາຊົນ ມີຄວາມຜາສຸກຮົົ່ມເຢັນ, ສັງຄົມນັບມື້້ນັບມີຄວາມສະຫງົບ ເເລະ ສີ​ວິ​ໄລ​ຢ່າງບໍ່ຢຸດຢັ້ງ.

     ໃນ​ໂອ​ກາດຕ້ອນ​ຮັບປີ​ໃໝ່ ຄ.ສ 2023 ນີ້, ຂ້າ​ພະ​ເຈົ້າ ຂໍ​ຕາງ​ໜ້າ​ການ​ນຳ​ພັກ, ລັດ ແລະ ໃນນາມສ່ວນຕົວ ຂໍ​ສົ່ງຄຳ​ອວຍ​ພອນ​​ອັນ​ປະ​ເສີດ ມາຍັງ​ປວງ​ຊົນ​ລາວທຸກຖ້ວນໜ້າ ທັງຢູ່​ພາຍ​ໃນ​ປະ​ເທດ ແລະ ຢູ່​ຕ່າງ​ປະ​ເທດ ຈົ່ງ​ມີ​ສຸ​ຂະ​ພາບ​ແຂງ​ແຮງ, ມີ​ຄວາມ​ຜາ​ສຸກ ແລະ ສືບ​ຕໍ່​ປະ​ຕິ​ບັດ​ໜ້າ​ທີ່​ຂອງ​ຕົນ​ໃຫ້​ມີ​ຜົນ​ສຳ​ເລັດ​ໃໝ່ ໃຫຍ່ຫຼວງກວ່າເກົ່າ ເພື່ອພັດ​ທະ​ນາ​ປະ​ເທດ​ຊາດຂອງພວກເຮົາ ໃຫ້​ມີ​ຄວາມ​ຈະ​ເລີນ​ກ້າວ​ໜ້າຂຶ້ນໄປເລື້້ອຍໆ.

     ຂໍໃຫ້ການສະ​ເຫຼີມ​ສະຫຼອງປີໃໝ່​ສາ​ກົນ ປີ ຄ.ສ 2023 ນີ້ ຈົ່ງເຕັມໄປດ້ວຍ​ບັນ​ຍາ​ກາດ​ເບີກ​ບານມ່ວນ​ຊື່ນ ເເລະ ມີ​ຄວາມ​ສະຫງົບ ສັນຕິ ແລະ ປອດ​ໄພທຸກປະການ ດ້ວຍເທີ້ນ. 

                                                                                                                                                             ໂຊກດີ ປີໃໝ່ 2023

                                                                                                                                                                   (ຂໍຂອບໃຈ)

 

 

ຂ່າວຫຼ້າສຸດ
ໜັງສືແຈ້ງເຊີນຍື່ນເຈດຈຳນົງ ສ້ອມແປງໃຫຍ່ ອາຄານຫໍຄຳ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ