ທ່ານຫົວໜ້າຫ້ອງວ່າການສຳນັກງານປະທານປະເທດ ຕ້ອນຮັບການເຂົ້າຢ້ຽມຂໍ່ານັບຂອງ ທ່ານທູດ ສ.ເກົາຫຼີ ປະຈໍາ ລາວ

22/12/2022

ທ່ານຫົວໜ້າຫ້ອງວ່າການສຳນັກງານປະທານປະເທດ ຕ້ອນຮັບການເຂົ້າຢ້ຽມຂໍ່ານັບຂອງ ທ່ານທູດ ສ.ເກົາຫຼີ ປະຈໍາ ລາວ

     ໃນວັນທີ 22 ທັນວາ 2022 ທ່ານ ນາງ ເຂັມມະນີ ພົນເສນາ, ຫົວໜ້າຫ້ອງວ່າການສຳນັກງານປະທານປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຈອງ ຢອງ ຊູ, ເອກອັກຄະລັດຖະທູດ ແຫ່ງ ສາທາລະນະລັດ ເກົາຫຼີ ປະຈຳ ສປປ ລາວ.

     ໃນໂອກາດດັ່ງກ່າວ, ທ່ານຫົວໜ້າຫ້ອງວ່າການສຳນັກງານປະທານປະເທດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ຈອງ ຢອງ ຊູ ທີ່ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ.ເກົາຫຼີ ປະຈຳ ສປປ ລາວ, ພ້ອມທັງຕີລາຄາສູງຕໍ່ການພົວພັນຮ່ວມມື ແລະ ຊ່ວຍເຫຼືອຂອງລັດຖະບານ ແລະ ປະຊາຊົນ ສ.ເກົາຫຼີ ຕະຫຼອດໄລຍະເວລາທີ່ຜ່ານມາ, ອັນໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນແຕ່ລະໄລຍະ ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າ ໄດ້ຮັບການປັບປຸງດີຂຶ້ນເປັນກ້າວໆ. ພ້ອມທັງ ສະເໜີໃຫ້ທ່ານທູດ ສືບຕໍ່ປະກອບສ່ວນເສີມຂະຫຍາຍສາຍພົວພັນການທູດໃຫ້ຂະຫຍາຍຕົວ ແລະ  ແໜ້ນແຟ້ນຍິ່ງໆຂຶ້ນໃນຕໍ່ໜ້າ. ພິເສດ, ຍັງໄດ້ສະເໜີໃຫ້ ທ່ານທູດ ຊຸກຍູ້ນັກລົງທຶນ ແລະ ນັກທ່ອງທ່ຽວຂອງ ສ.ເກົາຫຼີ ເຂົ້າມາລົງທຶນ ແລະ ທ່ອງທ່ຽວຢູ່ ສປປ ລາວ ໃຫ້ນັບມື້ນັບຫຼາຍຂຶ້ນ.

     ພ້ອມນັ້ນ, ທ່ານຫົວໜ້າຫ້ອງວ່າການສຳນັກງານປະທານປະເທດ ສະເໜີຊຸກຍູ້ໃຫ້ມີການຮ່ວມມືແລກປ່ຽນບົດຮຽນດ້ານວິຊາການ ແລະ ກິດຈະກຳຕ່າງໆເປັນອັນສະເພາະ ລະຫວ່າງ ຫ້ອງວ່າການສຳນັກງານປະທານປະເທດ ແລະ ສະຖານທູດ ສ.ເກົາຫຼີ ປະຈຳ ສປປ ລາວ ເພື່ອສົ່ງເສີມການພົວພັນສອງຝ່າຍ ລາວ-ສ.ເກົາຫຼີ ໃຫ້ແໜ້ນແຟ້ນ.

     ໃນໂອກາດດຽວກັນນີ້, ທ່ານທູດ ກໍ່ໄດ້ສະແດງຄວາມຂອບໃຈຕໍ່ ທ່ານຫົວໜ້າຫ້ອງວ່າການສຳນັກງານປະທານປະເທດ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້ ແລະ ທັງໃຫ້ຄຳໝັ້ນສັນຍາວ່າ ຈະພະຍາຍາມຢ່າງສຸດຄວາມສາມາດ ແລະ ປະສົບການ ເພື່ອເສີມຂະຫຍາຍການພົວພັນຮ່ວມມືສອງຝ່າຍ ໃຫ້ນັບມື້ໄດ້ຮັບການຂະຫຍາຍຕົວຍິ່ງໆຂຶ້ນໃນຕໍ່ໜ້າ.

 

ຂ່າວຫຼ້າສຸດ
ໜັງສືແຈ້ງເຊີນຍື່ນເຈດຈຳນົງ ສ້ອມແປງໃຫຍ່ ອາຄານຫໍຄຳ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ