ສົມເດັດ ພຣະຣາຊາ ຄຣັງ ດຸກ ອັງຣີ ແຫ່ງ ຣາຊະອານາຈັກ ລຸກຊຳບວກ ພ້ອມດ້ວຍຄະນະ ໄດ້ເດີນທາງມາຢ້ຽມຢາມເຮັດວຽກ ຢູ່ ສປປ ລາວ ໃນວັນທີ 5-9 ທັນວາ 2022

05/12/2022

ສົມເດັດ ພຣະຣາຊາ ຄຣັງ ດຸກ ອັງຣີ ແຫ່ງ ຣາຊະອານາຈັກ ລຸກຊຳບວກ ພ້ອມດ້ວຍຄະນະ ໄດ້ເດີນທາງມາຢ້ຽມຢາມເຮັດວຽກ ຢູ່ ສປປ ລາວ ໃນວັນທີ 5-9 ທັນວາ 2022

     ໂດຍຕອບສະໜອງຕາມຄໍາເຊີນຂອງ ທ່ານປະທານປະເທດ ແຫ່ງ ສປປ ລາວ, ໃນວັນທີ 05 ທັນວາ 2022,  ສົມເດັດ ພຣະຣາຊາ ຄຣັງ ດຸກ ອັງຣີ ແຫ່ງ ຣາຊະອານາຈັກ ລຸກຊຳບວກ​ ພ້ອມດ້ວຍຄະນະ ໄດ້ເດີນທາງມາຢ້ຽມຢາມເຮັດວຽກ ຢູ່ ສປປ ລາວ, ເຊິ່ງມີພິທີຕ້ອນຮັບ ຢ່າງເປັນທາງການ ໃນຕອນບ່າຍຂອງວັນດຽວກັນ, ທີ່ ທໍານຽບປະທານປະເທດ ຕ້ອນຮັບໂດຍ ພະນະທ່ານ ທອງລຸນ ສີສຸລິດ, ປະທານປະເທດ ພ້ອມດ້ວຍຄະນະຜູ້ແທນຂັ້ນສູງ ແຫ່ງ ສປປ ລາວ. ຫຼັງຈາກນັ້ນ, ກໍໄດ້ມີການພົບປະສອງຝ່າຍ, ໂດຍທັງສອງຝ່າຍໄດ້ແຈ້ງສະພາບການພັດທະນາເສດຖະກິດ-ສັງຄົມ ຢູ່ ພາຍໃນປະເທດຂອງຕົນ ໃຫ້ກັນຊາບໂດຍສັງເຂບ ແລະ ຖືການພົບປະຄັ້ງນີ້ເປັນຄັ້ງປະຫວັດສາດທີ່ມີຄວາມໝາຍ, ຄວາມສຳຄັນ ແລະ ເປັນນິມິດໝາຍໃໝ່ປະກອບສ່ວນເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍຄື ການສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນຂັ້ນສູງ ຂອງສອງປະເທດ ລາວ-ລຸກຊໍາບວກ ຢ່າງເປັນປົກກະຕິ  ນັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 25 ກັນຍາ 1997 ເປັນຕົ້ນມາ, ພິເສດ ປີ 2022 ນີ້ ຄົບຮອບ 25 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຣາຊະອານາຈັກ ລຸກຊໍາບວກ. ພ້ອມກັນນັ້ນ, ສອງຝ່າຍ ໄດ້ເຫັນດີຈະສືບຕໍ່ໃຫ້ມີການແລກປ່ຽນການຢ້ຽມຢາມ ລະຫວ່າງ ການນໍາຂັ້ນສູງຂອງສອງປະເທດ ທັງທາງດ້ານການເມືອງ ແລະ ຂະແໜງການຕ່າງໆ ທີ່ມີການຮ່ວມມືກັນ ຢ່າງເປັນປົກກະຕິ, ພ້ອມທັງຈະສືບຕໍ່ສົ່ງເສີມການຮ່ວມມືໃນຂະແໜງການອື່ນໆ ເຊັ່ນ: ຂະແໜງສາທາລະນະສຸກ, ການພັດທະນາຊົນນະບົດ, ການສຶກສາ ແລະ ການພັດທະນາຊັບພະຍາກອນມະນຸດ, ການບໍລິການດ້ານການທ່ອງທ່ຽວ ແລະ ການໂຮງແຮມ, ດ້ານການເງິນ-ທະນາຄານ, ການພັດທະນາພື້ນຖານໂຄງລ່າງຂອງ ພາກລັດ, ວຽກງານສະຖິຕິ, ການສົ່ງເສີມບົດບາດ ຍິງ-ຊາຍ ແລະ ອື່ນໆ. ນອກຈາກນັ້ນ, ສອງຝ່າຍ ຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບ ສະພາບການພາກພື້ນ ແລະ ສາກົນ ທີ່ທັງສອງຝ່າຍມີຄວາມສົນໃຈຮ່ວມກັນ.

     ພາຍຫຼັງສໍາເລັດການພົບປະສອງຝ່າຍ, ພະນະທ່ານ ປະທານປະເທດ ທອງລຸນ ສີສຸລິດ ແລະ ສົມເດັດ ພຣະຣາຊາ ຄຣັງ ດຸກ ອັງຣີ ກໍໄດ້ເຂົ້າຮ່ວມເປັນສັກຂີພິຍານ ໃນພິທີລົງນາມສັນຍາຮ່ວມກັນ 4 ສະບັບ ຄື: 1) ສັນຍາຮ່ວມມື ພາຍໃຕ້ໂຄງການສະໜັບສະໜູນຂະແໜງສາທາລະນະສຸກ ລາວ/035. 2) ສັນຍາການປົກຄອງ ແລະ ລະບຽບກົດໝາຍ ພາຍໃຕ້ໂຄງການສະໜັບ ສະໜູນວຽກງານກົດໝາຍ ແລະ ນິຕິກໍາ ລາວ/037. 3) ສັນຍາການຮ່ວມມືເພື່ອການພັດທະນາສີມືແຮງງານ ແລະ ການຈັດຫາງານ ພາຍໃຕ້ແຜນງານທັກສະ ສໍາລັບວຽກງານການທ່ອງທ່ຽວ ລາວ/336 ແລະ 4) ສັນຍາການຮ່ວມມືເພື່ອການພັດທະນາທ້ອງຖິ່ນ ພາຍໃຕ້ແຜນງານພັດທະນາທ້ອງຖິ່ນໃນແຂວງເປົ້າໝາຍ ລາວ/338. ໃນຕອນຄໍ່າຂອງວັນດຽວກັນ, ທີ່ ທໍານຽບປະທານປະເທດ, ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ໄດ້ຈັດງານລ້ຽງອາຫານຄໍ່າຕ້ອນຮັບ ເພື່ອເປັນກຽດ  ໃຫ້ແກ່ ສົມເດັດ ພຣະຣາຊາ ຄຣັງ ດຸກ ອັງຣີ ແຫ່ງ ຣາຊະອານາຈັກ ລຸກຊຳບວກ​ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມເຮັດວຽກ ຢູ່ ສປປ ລາວ ໃນຄັ້ງນີ້.

     

     ໃນວັນທີ 06 ທັນວາ 2022, ສົມເດັດ ພຣະຣາຊາ ອັງຣີ ແຫ່ງ ຣາຊະອານາຈັກ ລຸກຊໍາບວກ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມບັນດາໂຄງການຊ່ວຍເຫຼືອ ຂອງ ລຸກຊໍາບວກ ຢູ່ ນະຄອນຫຼວງວຽງຈັນ ເປັນຕົ້ນແມ່ນ ສະຖາບັນປັດສະເຕີລາວ; ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ; ແລະ ສູນຜ່າຕັດຫົວໃຈ ລາວ-ລຸກຊໍາບວກ, ໂຮງໝໍມະໂຫສົດ ແລະ ຍັງໄດ້ໄປຢ້ຽມຊົມ ສະຖານທີ່ວັດທະນະທໍາຈໍານວນໜຶ່ງ. ໃນວັນດຽວກັນ, ພະນະທ່ານ ທອງລຸນ ສີສຸລິດ ແລະ ສົມເດັດ ພຣະຣາຊາ ຄຣັງ ດຸກ ອັງຣີ ໄດ້ເຂົ້າຮ່ວມງານລ້ຽງສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ລຸກຊໍາບວກ ຄົບຮອບ 25 ປີ, ທີ່ ໂຮງແຮມ ຄຣາວ ພລາຊາ.

     ໃນວັນທີ 07 – 08 ທັນວາ 2022, ສົມເດັດ ພຣະຣາຊາ ຄຣັງ ດຸກ ອັງຣີ ແຫ່ງ ຣາຊະອານາຈັກ ລຸກຊໍາບວກ      ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຢ້ຽມຢາມ ບັນດາໂຄງການຊ່ວຍເຫຼືອຂອງລຸກຊໍາບວກ ຢູ່ ແຂວງວຽງຈັນ ແລະ ເດີນທາງໄປຢ້ຽມຢາມ ແຂວງຫຼວງພະບາງ.

     ທີ່ ແຂວງວຽງຈັນ, ສົມເດັດ ພຣະຣາຊາ ຄຣັງ ດຸກ ອັງຣີ ຢ້ຽມຢາມ ໂຮງໝໍ Maria-Teresa ຢູ່ ເມືອງວຽງຄໍາ, ໂຮງຮຽນພະຍາບານສາດເຕັກນິກແຂວງວຽງຈັນ, ໂຮງແຮມ ແລະ ຮ້ານອາຫານ ຝຶກປະຕິບັດ ເດີ ອະຄາເດມີ້ ຢູ່ ເມືອງວັງວຽງ ແລະ ໄດ້ໄປຢ້ຽມຊົມ ສະຖານທີ່ທ່ອງທ່ຽວທາງທໍາມະຊາດຈໍານວນໜຶ່ງ.

     ທີ່ ແຂວງຫຼວງພະບາງ, ສົມເດັດ ພຣະຣາຊາ ຄຣັງ ດຸກ ອັງຣີ ໄດ້ເຄື່ອນໄຫວຢ້ຽມຊົມສະຖານທີ່ສໍາຄັນທາງປະຫວັດສາດ ແລະ ວັດທະນະທໍາຂອງແຂວງ ເຊັ່ນ: ຫໍພິພິທະພັນແຫ່ງຊາດຫຼວງພະບາງ ແລະ ວັດຊຽງທອງ, ພ້ອມທັງໄດ້ໄປຢ້ຽມຊົມສູນຢ້ຽມຢາມໂຄງການເກັບກູ້ລະເບີດ ແລະ ທ່ຽວຊົມຮ້ານຄ້າຢູ່ໃນຕົວເມືອງຫຼວງພະບາງຈໍານວນໜຶ່ງ. ໃນຕອນແລງຂອງວັນດຽວກັນ, ທ່ານ ເຈົ້າແຂວງ ແຂວງຫຼວງພະບາງ ກໍ່ໄດ້ເຂົ້າລາຍງານສະພາບ ການພັດທະນາເສດຖະກິດ-ສັງຄົມ ຂອງແຂວງ ແລະ ໄດ້ຈັດພິທີບາສີສູ່ຂວັນຕາມປະເພນີ, ພ້ອມດ້ວຍຈັດງານລ້ຽງອາຫານຄໍ່າ ເພື່ອເປັນກຽດໃຫ້ແກ່ ສົມເດັດ ພຣະຣາຊາ ຄຣັງ ດຸກອັງຣີ ແຫ່ງ ຣາຊະອານາຈັກ ລຸກຊໍາບວກ ພ້ອມຄະນະ ໃນໂອກາດຢ້ຽມຢາມຄັ້ງນີ້. ໃນວັນທີ 09 ທັນວາ 2022 ສົມເດັດ ພຣະຣາຊາ ຄຣັງ ດຸກ ອັງຣີ ພ້ອມຄະນະ ກໍໄດ້ເດີນທາງກັບຄືນປະເທດ.

 

 

ຂ່າວຫຼ້າສຸດ
ໜັງສືແຈ້ງເຊີນຍື່ນເຈດຈຳນົງ ສ້ອມແປງໃຫຍ່ ອາຄານຫໍຄຳ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ