ຫສປທ ຫວນຄືນມູນເຊື້ອວັນສໍາຄັນຂອງຊາດ

13/12/2022

ຫສປທ ຫວນຄືນມູນເຊື້ອວັນສໍາຄັນຂອງຊາດ

     ໃນຕອນເຊົ້າວັນທີ 13 ທັນວາ 2022 ຫ້ອງວ່າການສໍານັກງານປະທານປະເທດ (ຫສປທ) ຈັດປາຖະກະຖາຫວນຄືນມູນເຊື້ອ 2 ວັນປະຫວັດສາດຂອງຊາດຄື: ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 47 ປີ (2 ທັນວາ 1975-2 ທັນວາ 2022) ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 102 ປີ (13 ທັນວາ 1920-13 ທັນວາ 2022) ໂດຍໃຫ້ກຽດເປັນປະທານ ແລະ ປາຖະກະຖາຂອງ ທ່ານ ເພັດສະໝອນ ພັນທະວົງ, ຮອງເລຂາຄະນະພັກ, ຮອງຫົວໜ້າ ຫສປທ ມີຄະນະພັກ-ຄະນະນໍາ, ຄະນະໜ່ວຍພັກ, ສະມາຊິກພັກ,  ພະນັກງານ-ລັດຖະກອນ ພາຍໃນ ຫສປທ ເຂົ້າຮ່ວມຮັບຟັງຢ່າງພ້ອມພຽງ.

     ໂອກາດນີ້, ທ່ານ ເພັດສະໝອນ ພັນທະວົງ ໄດ້ເນັ້ນເຖິງຄວາມໝາຍຄວາມສໍາຄັນຂອງວັນສໍາຄັນດັ່ງກ່າວ ເພື່ອສຶກສາອົບຮົມແນວຄິດ ສະມາຊິກພັກ-ພະນັກງານ ໄດ້ຮັບຮູ້, ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງຕໍ່ກັບວັນປະຫວັດສາດ ແລະ ຄວາມເປັນມາຂອງຊາດລາວເຮົາ ໂດຍທ່ານໄດ້ຍົກໃຫ້ເຫັນ ເຖິງມູນເຊື້ອ ແລະ ຄວາມໝາຍສຳຄັນຂອງວັນຊາດ 2 ທັນວາ ຄວາມເອກອ້າງທະນົງໃຈ ຕໍ່ຜົນສໍາເລັດ ໜາກຜົນຂອງການປະຕິວັດລາວ ໃນມູນເຊື້ອອັນສະຫງ່າອົງອາດກ້າຫານ ແຫ່ງການຕໍ່ສູ້ ຂອງບັນພະບູລຸດ ແລະ ປະຊາຊົນບັນດາເຜົ່າ ພາຍໃຕ້ການຊີ້ນໍາ-ນໍາພາ ອັນສະຫລາດສ່ອງໃສ ຂອງພັກປະຊາຊົນປະຕິວັດລາວ ໄດ້ສາມັກຄີການຕໍ່ສູ້ ຢ່າງພິລະອາດຫານ ຕ້ານການຮຸກຮານ ຂອງພວກຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ ສາມາດປົດປ່ອຍ ປະເທດຊາດໄດ້ຢ່າງມີໄຊ ແລະ ປະກາດສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ເປັນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງການຕໍ່ສູ້ຂອງຊາດລາວເຮົາ, ເປັນວັນທີ່ປະຊາຊົນລາວ ບັນດາເຜົ່າໄດ້ມີອິດສະລະພາບ ແລະ ເປັນເຈົ້າຂອງປະເທດຊາດຢ່າງແທ້ຈິງ; 47 ປີແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດພາຍໃຕ້ການນຳພາຂອງພັກ ແລະ ການຄຸ້ມຄອງບໍລິຫານຂອງລັດເຮັດໃຫ້ປະເທດຊາດມີການພັດທະນາກ້າວຂື້ນຢ່າງຕໍ່ເນື່ອງ, ພ້ອມນັ້ນກໍ່ຮຽກຮ້ອງໃຫ້ຮ່ວມແຮງຮ່ວມໃຈກັນສືບຕໍ່ເສີມຂະຫຍາຍມູນເຊື້ອວັນຊາດ 2 ທັນວາໃຫ້ສູງເດັ່ນຂື້ນ.

     ໃນໂອກາດດຽວກັນ, ທ່ານ ອິນທະປັນຍາ ຂຽວວົງພະຈັນ ຄະນະພັກ, ຮອງຫົວໜ້າ ຫສປທ ກໍໄດ້ເລົ່າເຖິງປະຫວັດຫຍໍ້, ຜົນງານ ແລະ ຄຸນງາມຄວາມດີຂອງປະທານ ໄກສອນ ພົມວິຫານ ຜູ້ນໍາອັນເປັນທີ່ເຄົາລົບຮັກ ຂອງປວງຊົນລາວບັນດາເຜົ່າ ໂດຍທ່ານໄດ້ຍົກໃຫ້ເຫັນເຖິງຊີວິດ ແລະ ການເຄື່ອນໄຫວປະຕິວັດຂອງປະທານໄກສອນ ພົມວິຫານ ທີ່ໄດ້ເຂົ້າຮ່ວມເຄື່ອນໄຫວ ປະຕິວັດຕັ້ງແຕ່ເຍົາໄວ, ໄດ້ຜ່ານການທົດສອບໃນຂະບວນການຕົວຈິງ ແລະ ຮັບຜິດຊອບວຽກງານສໍາຄັນຈົນກ້າວຂຶ້ນເປັນຜູ້ນໍາສູງສຸດຂອງພັກ ແລະ ລັດເຮົາ. ສະນັ້ນ ຈົ່ງຮໍ່າຮຽນເອົາແບບຢ່າງຄຸນສົມບັດ, ທາດແທ້ປະຕິວັດ, ຄວາມຈົງຮັກພັກດີ, ຄວາມເດັດດ່ຽວໜຽວແໜ້ນຂອງປະທານ ໄກສອນ ພົມວິຫານ ໄປນໍາໃຊ້ໃນການເຄື່ອນໄຫວປະຕິບັດວຽກງານຂອງຕົນໃຫ້ດີຂຶ້ນເປັນກ້າວໆ.


 

ຂ່າວຫຼ້າສຸດ
ໜັງສືແຈ້ງເຊີນຍື່ນເຈດຈຳນົງ ສ້ອມແປງໃຫຍ່ ອາຄານຫໍຄຳ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ