ຫ້ອງວ່າການສຳນັກງານປະທານປະເທດ ແຈ້ງຂ່າວກ່ຽວກັບການສ້ອມແປງໃຫຍ່ອາຄານຫໍຄໍາ

27/10/2022

ຫ້ອງວ່າການສຳນັກງານປະທານປະເທດ ແຈ້ງຂ່າວກ່ຽວກັບການສ້ອມແປງໃຫຍ່ອາຄານຫໍຄໍາ

     ໃນວັນທີ 27 ຕຸລາ 2022 ທີ່ສຳນັກງານ ຂອງຫ້ອງວ່າການສຳນັກງານປະທານປະເທດ, ທ່ານ ເພັດສະໝອນ ພັນທະວົງ, ຮອງຫົວໜ້າຫ້ອງວ່າການສຳນັກງານປະທານປະເທດ ໄດ້ຕາງໜ້າໃຫ້ຄະນະນຳຫ້ອງວ່າການສຳນັກງານປະທານປະເທດ ອອກຖະແຫລ່ງຂ່າວຜ່ານສື່ມວນຊົນກ່ຽວກັບການສ້ອມແປງໃຫຍ່ອາຄານຫໍຄຳ ເຊິ່ງມີເນື້ອໃນດັ່ງນີ້:

-   ອີງຕາມ ທິດຊີ້ນໍາຂອງກອງປະຊຸມກົມການເມືອງ ຮ່ວມກັບຄະນະເລຂາທິການສູນກາງພັກ, ກໍຄືແຈ້ງການ ຂອງຫ້ອງວ່າການສູນກາງພັກ ສະບັບເລກທີ 23/ຫສພ,ລົງວັນທີ 09 ມິຖຸນາ 2021; ເລກທີ 08/ຫສພ ລົງວັນທີ       02 ກຸມພາ 2022 ແລະ ເລກທີ 38/ຫສພ ລົງວັນທີ 07ມິຖຸນາ 2022 ກ່ຽວກັບການສ້ອມແປງໃຫຍ່ອາຄານຫໍຄໍາ;

-   ອີງຕາມ ມາດຕາ 47 ແລະ ມາດຕາ 48 ຂອງກົດໝາຍວ່າດ້ວຍ ມໍລະດົກແຫ່ງຊາດ ສະບັບເລກທີ 44/ສພຊ, ລົງວັນທີ 24 ທັນວາ 2013;

-   ອີງຕາມ ຜົນການສໍາຫຼວດ, ວັດແທກ ແລະ ກວດສອບ ລະບົບໂຄງສ້າງອາຄານເກົ່າຫໍຄໍາ ໃນຊຸມປີຜ່ານມາ.

     ຫ້ອງວ່າການສໍານັກງານປະທານປະເທດ ຂໍຖືເປັນກຽດຢ່າງສູງ ແຈ້ງຂ່າວມາຍັງທຸກໆພາກສ່ວນ ການຈັດຕັ້ງທັງພາກລັດ ແລະ ເອກະຊົນ ຕະຫຼອດຮອດ ພໍ່, ແມ່ ປະຊາຊົນລາວໃນຂອບເຂດທົ່ວປະເທດ ຊາບທົ່ວເຖິງກັນວ່າ: ອີງຕາມການຕົກລົງຂອງຂັ້ນເທິງ ແລະ ອີງຕາມສະພາບການນໍາໃຊ້ອາຄານຫໍຄໍາໄດ້ສ້າງມາຫຼາຍກວ່າ  48 ປີ ແລ້ວນັ້ນ, ຊຶ່ງມາຮອດປະຈຸບັນສະພາບຂອງອາຄານມີຄວາມຊຸດໂຊມຫຼາຍເຊັ່ນ: ມີການຮົ່ວຊຶມ, ແຕກແຫງ ແລະ ຊໍາຫຼຸດເປ່ເພ ສະນັ້ນ, ຈິ່ງມີຄວາມຈໍາເປັນໃນການສ້ອມແປງໃຫຍ່ອາຄານດັ່ງກ່າວ ເພື່ອແນໃສ່ຮັບປະກັນຄວາມປອດໄພ ແລະ ຄວາມແຂງແຮງແໜ້ນໜາຂອງໂຄງສ້າງ, ທັງຮັກສາເອກະລັກດ້ານວັດທະນະທໍາ, ຮັກສາດ້ານສະຖາປະນິກທີ່ມີຄຸນຄ່າທາງປະຫວັດສາດ,​ ເປັນມໍລະດົກອັນສໍາຄັນແຫ່ງມູນເຊື້ອຂອງຊາດລາວເຮົາ, ເປັນສະຖານທີ່ເຮັດວຽກ ແລະ ຕ້ອນຮັບແຂກຂອງປະມຸກລັດ, ຊຶ່ງເປັນຜູ້ຕາງໜ້າຂອງປະຊາຊົນລາວບັນດາເຜົ່າທີ່ຢູ່ທັງພາຍໃນ ແລະ ຕ່າງປະເທດ, ຕາມການອອກແບບທີ່ໄດ້ຮັບການຮັບຮອງ ແລະ ຢັ້ງຢືນຈາກລັດຖະບານ.

     ດັ່ງນັ້ນ, ຫ້ອງວ່າການສໍານັກງານປະທານປະເທດຈຶ່ງແຈ້ງມາຍັງບັນດາທ່ານ ແລະ ທຸກພາກສ່ວນ, ອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນເພື່ອຮັບຊາບ.

 

( ຂໍຂອບໃຈ )

 

ຂ່າວຫຼ້າສຸດ
ການນຳຂັ້ນສູງ ສປປ ລາວ ຕ້ອນຮັບການເຂົ້າອວຍພອນຂອງບັນດາທູຕານຸທູດ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ