ຫ້ອງວ່າການສໍານັກງານປະທານປະເທດ ຫວນຄືນມູນເຊືອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ

06/10/2022

ຫ້ອງວ່າການສໍານັກງານປະທານປະເທດ ຫວນຄືນມູນເຊືອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ

     ວັນທີ 06 ຕຸລາ 2022 ຫ້ອງວ່າການສໍານັກງານປະທານປະເທດ ( ຫສປທ)ໄດ້ຈັດຕັ້ງປາຖະກະຖາຫວນຄືນມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ (09 ກັນຍາ 2002-09 ກັນຍາ 2022) ຂຶ້ນທີ່ຫ້ອງປະຊຸມໃຫຍ່ຊັ້ນ 2 ຫ້ອງວ່າການສໍານັກງານປະທານປະເທດ, ໃຫ້ກຽດປາຖະກະຖາໂດຍ ທ່ານ ພົນຈັດຕະວາ ຄໍາຫອມ ແສງບົວລົມ, ວິລະຊົນແຫ່ງຊາດ, ຮອງປະທານສະຫະພັນນັກເກົ່າແຫ່ງຊາດລາວ, ເປັນກຽດເຂົ້າຮ່ວມຂອງ ທ່ານ ເພັດສະໝອນ ພັນທະວົງ,ຮອງເລຂາຄະນະພັກ ຮອງຫົວໜ້າຫ້ອງວ່າການສໍານັກງານປະ ທານປະເທດ, ມີຄະນະພັກ-ຄະນະນໍາ, ຄະນະກົມ, ຄະນະພະແນກ ແລະ ພະນັກງານ-ລັດຖະກອນທົ່ວ ຫສປທ ເຂົ້້າຮ່ວມຮັບຟັງ.

     ທ່ານ ພົນຈັດຕະວາ ຄໍາຫອມ ແສງບົວລົມ ໄດ້ຍົກໃຫ້ເຫັນປະຫວັດມູນເຊື້ອການກໍາເນີດຂອງສະຫະພັນນັກຮົບເກົ່າແຫ່ງຊາດລາວ, ຊຶ່ງໄດ້ສ່ອງແສງເຖິງນະໂຍບາຍຂອງພັກ-ລັດທີ່ມີຕໍ່ນັກຮົບປະຕິວັດ ພາຍຫຼັງອອກພັກຜ່ອນຮັບບໍານານ, ພ້ອມກັນນັ້ນຍັງໄດ້ຍົກໃຫ້ເຫັນ, ທີ່ຕັ້ງ,ພາລະບົດບາດ, ໜ້າທີ່ ແລະ ຜົນງາານຂອງອົງການຈັດຕັ້ງສະຫະພັນນັກຮົບເກົ່າແຫ່ງຊາດລາວ ຊຶ່ງເປັນອົງການຈັດຕັ້ງມະຫາຊົນຂອງພັກ ມີຄວາມໝາຍຄວາມສຳຄັນສຳລັບຖັນແຖວນັກຮົບເກົ່າເຊັ່ນວ່າ: ກຳລັງປະກອບອາວຸດທີ່ພັກຜ່ອນບຳນານ, ບຳເນັດ ແມ່ນຜູ້ທີ່ໄດ້ຜ່ານການປະຕິບັດໜ້າທີ່ເປັນນັກຮົບປ້ອງກັນຊາດ-ປ້ອງກັນຄວາມສະຫງົບ ແລະ ຜ່ານການທົດສອບໃນແປວໄຟສົງຄາມແຫ່ງການຕໍ່ສູ້ກູ້ຊາດ ແລະ ນຳເອົາເອກກະລາດຄວາມຢູ່ເຢັນເປັນສຸກມາໃຫ້ປະຊາຊົນລາວບັນດາເຜົ່າ, ເປັນຜູ້ມີບົດຮຽນໃນການຊີ້ນຳ - ບັນຊາການກໍ່ສ້າງຮາກຖານການເມືອງ, ຂົນຂວາຍປຸກລະດົມປະຊາຊົນ ແລະ ຊຳນິຊຳນານໃນການປັບປຸງກໍ່ສ້າງກຳລັງ, ດຸໝັ່ນຂະຫຍັນພຽນ ເພີ່ມພູນຜະລິດຜົນ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເປັນຜູ້ທີ່ຊື່ສັດບໍລິສຸດ, ຈົງຮັກພັກດີຕໍ່ພັກ, ຕໍ່ປະເທດຊາດ ແລະ ຕໍ່ປະຊາຊົນ  ພ້ອມກັນຈັດຕັ້ງ ແລະ ສຶກສາອົບຮົມນັກຮົບເກົ່າໃຫ້ປົກປັກຮັກສາ ແລະ ເສີມຂະຫຍາຍທາດແທ້ມູນເຊື້ອປະຕິວັດ, ສຶກສາອົບຮົມລູກຫຼານຮຸ່ນສືບທອດ ໃຫ້ປະກອບສວ່ນເຂົ້າໃນການຄຸ້ມຄອງລັດ, ຄຸ້ມຄອງສັງຄົມ, ການປົກປັກຮັກສາ ແລະ ພັດທະນາປະເທດຊາດ. ນອກນັ້ນ ສນຫລ ຍັງມີ ໜ້າທີ່ຄົ້ນຄ້ວາເຊື່ອຊືມ ແລະ ກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດກ່ຽວກັບວຽກງານນັກຮົບເກົ່າເພື່ອຫັນເປັນແຜນການ, ໂຄງການລະອຽດ ແລະ ຈັດຕັ້ງປະຕິບັດຢ່າງມີປະສິດທິຜົນ, ແນໃສ່ເພື່ອປົກປ້ອງອຸດົມການຂອງພັກ, ປົກປັກຮັກສາໝາກຜົນຂອງການປະຕິວັດ ແລະ ລະບອບປະຊາທິປະໄຕປະຊາຊົນລາວ ເອົາໄວ້ຢ່າງໝັ້ນຄົງ.

     ໂອກາດດັ່ງກ່າວ ທ່ານຮອງປະທານ ສນຫລ ຍັງໄດ້ຮຽກຮ້ອງມາຍັງຄະນະພັກ ຕະຫລອດຮອດພະນັກງານ-ລັດຖະກອນ ທົ່ວຫ້ອງວ່າການສໍານັກງານປະທານປະເທດ ຈົ່ງຮັກສາ ແລະ ນຳເອົາມູນເຊື້ອອັນດີງາມຂອງນັກຮົບປະຕິວັດລາວ ໄປເຜີຍແຜ່ຕໍ່ພະນັກງານຮຸ່ນໜຸ່ມ ແລະ ຮຸ່ນສືບທອດ ໃຫ້ເຂົ້າໃຈເຖິງທາດແທ້ ຄວາມເປັນມາ ແລະ ພາລະບົດບາດອັນສຳຄັນຂອງນັກຮົບເກົ່າລາວ ແລ້ວນຳເອົາໄປຈັດຕັ້ງຜັນຂະຫຍາຍໃຫ້ຖືກຕ້ອງສອດຄ່ອງຢ່າງແທ້ຈິງ, ຈົ່ງຮັບຮູ້ ແລະ ເຂົ້າໃຈວ່າ: ມີພວກເພິ່ນໃນມື້ນັ້ນຈຶ່ງມີພວກເຮົາໃນວັນນີ້.

 

ຂ່າວຫຼ້າສຸດ
ການນຳຂັ້ນສູງ ສປປ ລາວ ຕ້ອນຮັບການເຂົ້າອວຍພອນຂອງບັນດາທູຕານຸທູດ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ