ພະນັກງານ ຫສປທ ເຂົ້າຮ່ວມຝຶກອົບຮົມ ການພັດທະນາຄວາມເປັນຜູ້ນໍາ

26/09/2022

ພະນັກງານ ຫສປທ  ເຂົ້າຮ່ວມຝຶກອົບຮົມ ການພັດທະນາຄວາມເປັນຜູ້ນໍາ

     ຫ້ອງວ່າການສໍານັກງານປະທານປະເທດ (ຫສປທ) ໄດ້ຈັດຊຸດຝຶກອົບຮົມກ່ຽວກັບການພັດທະນາຄວາມເປັນຜູ້ນໍາ ( Leadership Development) ຂຶ້ນໃນວັນທີ 26 ກັນຍາ 2022  ທີ່ໂຮງແຮມອໍາມະລີ  ເມືອງວັງວຽງ ແຂວງວຽງຈັນ  ໂດຍການໃຫ້ທຶນຂອງສະຖານທູດອົດສະຕາລີປະຈໍາ ສປປ ລາວ ເພື່ອຍົກລະດັບທັກສະຄວາມຮູ້ຄວາມສາມາດ​ໃຫ້​ພະ​ນັກ​ງານຫຼັກ​ແຫຼ່ງ ໂດຍ​ສະ​ເພາະ​ແມ່ນ​ການ​ພັດ​ທະ​ນາ​ດ້ານ​ຄວາມ​ເປັນ​ຜູ້​ນຳ ໃຫ້ກຽດເຂົ້າຮ່ວມພິທີເປີດໂດຍທ່ານ ຄໍາຕາ ລາດຊະວົງ, ຫົວໜ້າກົມຈັດຕັ້ງ, ກວດກາ ແລະ ໂຄສະນາ ແລະ ທ່ານ ນ. ລໍ​ເຣນ ຊູ​ເວວ, ເລ​ຂາ​ສອງຈາກ​ສະ​ຖານທູດ ອົດສະຕຣາລີ ປະຈໍາ ສປປ ລາວ ມີຄະນະຮັບຜິດຊອບ, ຄະນະຄູຝຶກຈາກສະຖາບັນລາວ-ອົດສະຕາລີ ແລະ ນັກຝຶກອົບຮົມຈາກ ຫສປທ ຈໍານວນ 20 ທ່ານ.

     ທ່ານ ຄໍາຕາ ລາດຊະວົງ ໄດ້ມີຄໍາເຫັນ ແລະ ກ່າວວ່າ: ການຝືກອົບຮົມໃນຄັ້ງນີ້ແມ່ນມີຄວາມສໍາຄັນຍິ່ງໃນການຍົກລະດັບຄວາມຮູ້ ແລະ ທັກສະການເປັນ​ຜູ້​ນຳ ຂອງພະນັກງານຫຼັກ​ແຫຼ່ງ​ພາຍ​ໃນ ຫສປທ ໂດຍຜ່ານການແລກ​ປ່ຽນ​ຄວາມ​ຮູ້ຈາກວິທະຍາກອນ ທີ່ມີປະສົບການສູງ, ຊຶ່ງນອກ​ຈາກ​ຈະ​ໄດ້​ຮຽນ​ຮູ້​ທາງ​ດ້ານ​ທິດ​ສະ​ດີ, ແລກ​ປ່ຽນ​ປະ​ສົບ​ການ​ທີ່​ແຕ່​ລະ​ທ່ານ​ໄດ້​ປະ​ສົບ​ພົບ​ພໍ້​​ກັບ​ການ​ປະ​ຕິ​ບັດ​ວຽກ​ງານ​ຕົວ​ຈິງ​ໃນ​ໄລ​ຍະ​ຜ່ານ​ມາ. ການຝຶກອົບຮົມໃນຄັ້ງນີ້ແມ່ນໜຶ່ງໃນການຊ່ວຍເຫຼືອທາງດ້ານວິຊາການ ຈາກສະຖານທູດອົດສະຕຣາລີ,​ ຊຶ່ງເປັນຄັ້ງທີ​ສອງ ຂອງການຮ່ວມມືທາງດ້ານວິຊາການ ລະຫວ່າງ ສະຖານທູດອົດສະຕຣາລີ  ປະຈໍາ ສປປ ລາວ ແລະ ຫສປທ ເປັນການເສີມຂະຫຍາຍສາຍພົວພັນອັນສະໜິດແໜ້ນລະຫວ່າງ ລາວ ແລະ ອົດສະຕຣາລີ. ນອກຈາກການຝຶກອົບຮົມຄັ້ງນີ້ແລ້ວ ສະ​ຖານ​ທູດ​ອົດ​ສະ​ຕາ​ລີ​ຍັງ​ໄດ້ໃຫ້​ທຶນ ຮຽນ​ພາ​ສາ​ອັງ​ກິດ 5 ທຶນ ​ຢູ່​ລາວ​ຕື່ມ​ອີກ.

     ທ່ານ ນ. ລໍ​ເຣນ ຊູ​ເວວ, ເລ​ຂາ​ສອງ ຈາກ​ສະ​ຖານທູດ ອົດສະຕຣາລີ ປະຈໍາ ສປປ ລາວ ກໍໄດ້ມີຄໍາເຫັນໃນການຝຶກອົບຮົມ ພາຍໃຕ້ ຫົວຂໍ້ ການພັດທະນາຄວາມເປັນຜູ້ນໍາ  ( Leadership Development)   ເປັນການສ້າງຄວາມສາມາດຂອງການເປັນຜູ້ນຳ, ສ້າງຄວາມສາມັກຄີພາຍໃນກຸ່ມ ແລະ ການສ້າງເປົ້າຫມາຍໃນການເຮັດວຽກຢ່າງຊັດເຈນ. ພ້ອມກັນນັ້ນ, ເຊື່ອໝັ້ນວ່າຫຼັກກສູດດັ່ງກ່າວຈະເປັນປະໂຫຍດ ແລະ ບັນດາທ່ານຈະນຳເອົາຄວາມຮູ້ຄວາມສາມາດຈາກຫຼັກສູດດັ່ງກ່າວໄດ້ປະຕິບັດ ແລະ ນໍາຄວາມສາມາດທາງດ້ານການເປັນຜູ້ນຳ ມາໃຊ້ໃນຊີວິດປະຈຳວັນຂອງທ່ານໄດ້.

     ການຝຶກອົບຮົມດໍາເນີນໄປເປັນເວລາ 2 ວັນ 26-27 ກັນຍາ 2022 ເຊິ່ງເຕັມໄປດ້ວຍຄວາມຮັບຮູ້ ແລະ ເຂົ້າໃຈຕໍ່ກັບວຽກງານການພັດທະນາຄວາມເປັນຜູ້ນໍາ ເພື່ອນໍາໄປຈັດຕັ້ງປະຕິບັດເຂົາສູ່ວຽກງານຕົວຈິງໃຫ້ໄດ້ຮັບຜົນດີ.

 

ຂ່າວຫຼ້າສຸດ
ການນຳຂັ້ນສູງ ສປປ ລາວ ຕ້ອນຮັບການເຂົ້າອວຍພອນຂອງບັນດາທູຕານຸທູດ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ