ຫ້ອງວ່າການສໍານັກງານປະທານປະເທດ ຈັດກອງປະຊຸມ ສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ ປະຈຳປີ 2021

09/09/2022

 ຫ້ອງວ່າການສໍານັກງານປະທານປະເທດ ຈັດກອງປະຊຸມ ສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ ປະຈຳປີ 2021

     ຫ້ອງວ່າການສໍານັກງານປະທານປະເທດ (ຫສປທ) ໄດ້ຈັດກອງປະຊຸມສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ ປະຈຳປີ 2021 ຂຶ້ນໃນວັນທີ 9 ກັນຍາ ນີ້ ທີ່ຫ້ອງປະຊຸມ ທຳນຽບປະທານປະເທດ ໂດຍການເປັນປະທານຮ່ວມຂອງ ສະຫາຍ ນາງ ເຂັມມະນີ ພົນເສນາ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ຫສປທ ແລະ ສະຫາຍ ວິສຸກ ພົມພິທັກ ຄະນະພັກ,  ຮອງຫົວໜ້າຄະນະຈັດຕັ້ງສູນກາງພັກ(ຕອນເຊົ້າ) ແລະ ໃນຕອນບ່າຍສືບຕໍ່ດໍາເນີນກອງປະຊຸມສະຫຼຸບວຽກງານກວດກາໂດຍມີ ສະຫາຍ ວິໄລວັນ ບຸດດາຄຳ, ກໍາມະການສໍາຮອງສູນກາງພັກ, ຮອງປະທານກວດກາສູນກາງພັກເປັນປະທານຮ່ວມ; ມີບັນດາສະຫາຍຄະນະບໍລິຫານງານພັກ, ຄະນະໜ່ວຍພັກ ພ້ອມດ້ວຍບັນດາສະຫາຍສະມາຊິກພັກ-ພະນັກງານ-ລັດຖະກອນທົ່ວ ຫສປທ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

     ສະຫາຍ ຄຳຕາ ລາດຊະວົງ, ຄະນະພັກ, ເລຂາໜ່ວຍພັກ, ຫົວໜ້າກົມຈັດຕັ້ງ, ກວດກາ ແລະ ໂຄສະນາ ໄດ້ຜ່ານບົດສະຫຼຸບການເຄື່ອນໄຫວວຽກງານຈັດຕັ້ງ, ພັກ-ພະນັກງານ ປະຈຳປີ 2021 ແລະ ທິດທາງແຜນການ ປະຈຳປີ 2022 ໂດຍຍົກໃຫ້ເຫັນຜົນສຳເລັດໃນດ້ານຕ່າງໆ ຊຶ່ງໄດ້ກ່າວບາງຕອນວ່າ: ຫສປທ ໄດ້ເຄື່ອນໄຫວຕາມລັດຖະດຳລັດຂອງປະທານປະເທດ ສະບັບເລກທີ 054/ປປທ ລົງວັນທີ 21/2/2017 ປະກອບມີກົງຈັກຊ່ວຍວຽກ 5 ກົມ, ມີພະນັງານ-ລັດຖະກອນ ທັງໝົດ 101 ທ່ານ, ຍິງ 48 ທ່ານ (ລວມທັງຄະນະນໍາ). ປັດຈຸບັນກໍາລັງປັບປຸງພາລະບົດບາດຂອງຕົນ ໃຫ້ມີຄວາມເໝາະສົມກັບໜ້າທີ່ການເມືອງໃນໄລຍະໃໝ່; ທາງດ້ານກົງຈັກພັກ ອົງຄະນະພັກ ຫສປທ ປະກອບມີ 5 ໜ່ວຍພັກຂຶ້ນກັບ, ມີສະມາຊິກພັກທັງໝົດ 71 ສະຫາຍ, ຍິງ 32 ສະຫາຍ; ໃນນັ້ນ, ສະມາຊິກພັກສຳຮອງ 12 ສະຫາຍ, ຍິງ 7 ສະຫາຍ ແລະ ສະມາຊິກພັກບໍານານ 9 ສະຫາຍ, ຍິງ 2 ສະຫາຍ. ການຂະຫຍາຍພັກໃນປີ 2021 ໄດ້ເລື່ອນສະມາຊິກພັກສຳຮອງຂຶ້ນສົມບູນ 7 ສະຫາຍ, ຍິງ 4 ສະຫາຍ ແລະ ຮັບມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ 12 ສະຫາຍ, ຍິງ 7 ສະຫາຍ; ຕົກລົງຮຽນກົດລະບຽບພັກໃຫ້ 6 ສະຫາຍ, ຍິງ 3 ສະຫາຍ ແລະ ຮຽນສະໜັບສະໜູນ 10 ສະຫາຍ. ສຳລັບວຽກສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີ 2021 ແມ່ນໄດ້ດໍາເນີນຕີລາຄາແຜນສູ້ຊົນຂອງໜ່ວຍພັກຕາມຂັ້ນຕອນລະບຽບການ ທັງ 5 ໜ່ວຍພັກ ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2021. ຄະນະບໍລິຫານງານພັກ-ຄະນະນຳ ຫສປທ ຍັງໄດ້ຖືສຳຄັນວຽກງານບໍາລຸງ ແລະ ກໍ່ສ້າງພັກ-ພະນັກງານ ຊຶ່ງໃນປີ 2021 ໄດ້ບໍາລຸງ ແລະ ກໍ່ສ້າງຢູ່ພາຍໃນປະເທດ ຄື ບໍາລຸງດ້ານພາສາຕ່າງປະເທດ ໄລຍະ 3 ເດືອນ ແລະ 6 ເດືອນ ຈຳນວນ 6 ທ່ານ, ບໍາລຸງທິດສະດີການເມືອງໄລຍະ 5 ເດືອນ 2 ທ່ານ; ຍົກລະດັບວິຊາສະເພາະ ໂດຍມີພະນັກງານທີ່ສໍາເລັດການສຶກສາປະລິນຍາໂທ 1 ທ່ານ, ກຳລັງສຶກສາປະລິນຍາໂທ 2 ທ່ານ, ກໍາລັງສຶກສາປະລິນຍາຕີ 4 ທ່ານ ແລະ ກຳລັງສຶກສາຕໍ່ເນື່ອງຊັ້ນສູງ 1 ທ່ານ. ສຳລັບການບໍາລຸງ ແລະ ກໍ່ສ້າງຢູ່ຕ່າງປະເທດ ໂດຍມີພະນັກງານກຳລັງສຶກສາປະລິນຍາໂທ ທີ່ ສປ ຈີນ 2 ທ່ານ ແລະ ກຳລັງສຶກສາຢູ່ ສສ ຫວຽດນາມ 1 ທ່ານ.

     ສະຫາຍ ນາງ ພຸດ ທະວົງສີ, ຮອງຫົວໜ້າກົມຈັດຕັ້ງ, ກວດກາ ແລະ ໂຄສະນາ ໄດ້ຜ່ານບົດສະຫຼຸບການເຄື່ອນໄຫວວຽກງານກວດກາ ປະຈຳປີ 2021 ແລະ ທິດທາງແຜນການ ປະຈໍາປີ 2022 ໂດຍຍົກໃຫ້ເຫັນຜົນສຳເລັດຂອງວຽກງານກວດກາພັກ ແລະ ການຕິດຕາມກວດກາລັດ ທີ່ພົ້ນເດັ່ນຫຼາຍຢ່າງ ເປັນຕົ້ນຄື: ຕິດຕາມ, ກວດກາ ການປະຕິບັດ ມະຕິ, ຄຳສັ່ງ ແລະ ນິຕິກໍາຕ່າງໆ ທີ່ຂັ້ນເທິງ ແລະ ຄະນະພັກ ຫສປທ ວາງອອກ; ຕິດຕາມການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ມະຕິກອງປະຊຸມໃຫຍ່ສະມາຊິກພັກ ຄັ້ງທີ I ຂອງອົງຄະນະພັກ ຫສປທ, ແລະ ກົດລະບຽບພັກ ສະໄໝທີ XI; ນອກນີ້, ຍັງເອົາໃຈໃສ່ຕິດຕາມ, ກວດກາການປະເມີນໃນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກ   ແໜ້ນ, ຮ່ວມກັບຄະນຈາກອົງການກວດສອບແຫ່ງລັດກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານປະຈໍາປີ 2020 ແລະ ຕິດຕາມກວດກາໂຄງການຈໍານວນໜຶ່ງ.

     ກອງປະຊຸມຄັ້ງນີ້, ຜູ້ເຂົ້າຮ່ວມຍັງໄດ້ປະກອບຄຳເຫັນ ຕໍ່ສອງບົດສະຫຼຸບດັ່ງກ່າວ ແລະ ໄດ້ຮັບຟັງການສະ   ເໜີ ບົດລາຍງານວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໄລຍະ 5 ປີ ແລະ ທິດທາງ 5 ປີຕໍ່ໜ້າ ຕໍ່ກອງປະຊຸມວຽກຈັດຕັ້ງທົ່ວປະເທດ ຄັ້ງທີ XI ຈາກສະຫາຍ ວິສຸກ ພົມພິທັກ ຮອງຫົວໜ້າຈັດຕັ້ງສູນກາງພັກ ແລະ ບົດໂອ້ລົມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ຈາກສະຫາຍເລຂາຄະນະບໍລິຫານງານພັກ ຫສປທ. ຮັບຟັງເນື້ອໃນບົດສະຫຼຸບວຽກງານກວດກາທົ່ວປະເທດ ຄັ້ງທີ III ປີ 2016-2020 ແລະ ບາງເນື້ອໃນຕົ້ນຕໍ ແຕ່ນີ້ເຖິງປີ 2026 ຂອງຄະນະກວດກາສູນກາງພັກ ຕໍ່ກອງປະຊຸມກວດກາທົ່ວປະເທດ ຄັ້ງທີ IV ຈາກ ສະຫາຍ ວິໄລວັນ ບຸດດາຄໍາ ຮອງປະທານກວດກາ ສູນກາງພັກ ແລະ ຍັງໄດ້ຮັບຟັງການສະເໜີບົດໂອ້ລົມຂອງສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ ປະທານຄະນະກວດກາສູນກາງພັກ ຕໍ່ກອງປະຊຸມວຽກງານກວດກາທົ່ວປະເທດ ຄັ້ງທີ IV ຈາກສະຫາຍ ເພັດສະໝອນ ພັນທະວົງ ຮອງເລຂາຄະນະບໍລິຫານງານພັກ, ຮອງຫົວໜ້າ ຫສປທ ອີກດ້ວຍ.

 

ຂ່າວຫຼ້າສຸດ
ຫສປທ ສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ