ຫ້ອງວ່າການສໍານັກງານປະທານປະເທດ ເຜີຍແຜ່ເອກະສານສໍາຄັນຂອງພັກ-ຂອງຊາດ

23/08/2022

ຫ້ອງວ່າການສໍານັກງານປະທານປະເທດ ເຜີຍແຜ່ເອກະສານສໍາຄັນຂອງພັກ-ຂອງຊາດ

     ໃນຕອນເຊົ້າວັນທີ 23 ສິງຫາ 2022 ຫ້ອງວ່າການສໍານັກງານປະທານປະເທດ (ຫສປທ) ໄດ້ຈັດກອງປະຊຸມເຜີຍແຜ່ເອກະສານສໍາຄັນຂອງພັກ-ຂອງຊາດຄື: ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI ປາຖະກະຖາເລົ່າມູນເຊື້ອວັນຍຶດອຳນາດ  23 ສິງຫາ  ຄົບຮອບ 47 ປີ ແລະ ຄົບຮອບ 77 ປີ ແລະ  ວັນເກີດປະທານສຸພານຸວົງ ຄົບຮອບ 113 ປີ ໃຫ້ກຽດເປັນປະທານ ແລະ ເຜີຍແຜ່ເອກະສານ ໂດຍສະຫາຍ ນ. ເຂັມມະນີ ພົນເສນາ, ເລຂາຄະນະບໍລິຫານງານພັກ, ຫົວໜ້າ ຫສປທ ເຂົ້າຮ່ວມມີຄະນະພັກ, ຄະນະໜ່ວຍພັກ, ສະມາຊິກພັກ ແລະ ພະນັກງານ-ລັດຖະກອນ ທັງໝົດພາຍໃນ ຫສປທ.

     ໃນໂອກາດນີ້, ສະຫາຍ ເລຂາຄະນະບໍລິຫານງານພັກ ຫສປທ ໄດ້ໃຫ້ກຽດເຜີຍແຜ່ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI ເຊິ່ງສະຫາຍຍົກໃຫ້ເຫັນຫຼາຍບັນຫາ ເປັນຕົ້ນແມ່ນໄດ້ປະເມີນສະພາບຢູ່ພາກພື້ນ ແລະ ສາກົນໃນປະຈຸບັນ ແລະ ຄາດຄະເນທ່າຂະຫຍາຍໃນຕໍ່ໜ້າ; ຕີລາຄາກ່ຽວກັບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ຕົ້ນປີ 2022 ຕິດພັນກັບຜົນການຈັດຕັ້ງປະຕິບັດ 2 ວາລະແຫ່ງຊາດ; ສືບຕໍ່ຍູ້ແຮງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກໃຫ້ປະກົດຜົນເປັນຈິງ; ການຊຸກຍູ້, ສົ່ງເສີມຜູ້ປະກອບການຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃຫ້ມີຄວາມເຂັ້ມແຂງ; ການເພີ່ມທະວີການພັດທະນາຊັບພະຍາກອນມະນຸດໃຫ້ມີຄຸນນະພາບສູງ; ການປັບປຸງລະບົບການຈັດຕັ້ງ, ກົງຈັກ ແລະ ກົນໄກການເຄື່ອນໄຫວຂອງອົງການບໍລິຫານລັດຕາມທິດເຂັ້ມແຂງ ແລະ ມີປະສິດທິພາບ; ຄົ້ນຄວ້າປຶກສາຫາລື ແລະ ໃຫ້ທິດຊີ້ນໍາເບື້ອງຕົ້ນກ່ຽວກັບການຄົ້ນຄວ້າທິດສະດີ ແລະ ສະຫຼຸບພຶດຕິກໍາໃຫ້ການສ້າງປະຖົມປັດໄຈ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ; ໄດ້ປຶກສາຫາລື ແລະ ໃຫ້ທິດຊີ້ນໍາກ່ຽວກັບ ການກະກຽມດໍາເນີນກອງປະຊຸມວຽກງານການເມືອງແນວຄິດ ທົ່ວປະເທດຄັ້ງທີ V, ກອງປະຊຸມວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານສາມສ້າງ, ກອງປະຊຸມສະຫຼຸບຂະບວນການແຂ່ງຂັນຮັກຊາດ ແລະ ພັດທະນາ.

     ພ້ອມນັ້ນ, ຄະນະບໍລິຫານງານສູນກາງພັກໄດ້ວາງວຽກງານຈຸດສຸມໃນການນໍາພາ - ຊີ້ນໍາ ຂອງຕົນແຕ່ນີ້ຫາກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ XI ໃນຫຼາຍດ້ານເຊັ່ນ:ຊີ້ນໍາການກະກຽມ ແລະ ດໍາເນີນກອງປະຊຸມສາມັນເທື່ອທີ 3 ຂອງສະພາແຫ່ງຊາດ; ຊີ້ນາໍການຈັດຕັງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານ ແຜນເງິນຕາໃນ 6 ເດືອນທ້າຍປີ 2022 ຕິດພັນກັບ 2 ວາລະແຫ່ງຊາດ; ສຸມໃສ່ຊີ້ນໍາແກ້ໄຂຄວາມເຄັ່ງຮ້ອນ, ອ່ອນໄຫວ ທີ່ກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນໃນປະຈຸບັນ ແລະ ບັນຫາອື່ນໆຕື່ມອີກ.

     ສະຫາຍ ເພັດສະໝອນ ພັນທະວົງ, ຮອງເລຂາຄະນະບໍລິຫານງານພັກ, ຮອງຫົວໜ້າ ຫສປທ ກໍໄດ້ເລົ່າຄືນມູນເຊື້ອ ປະຫວັດ ຂອງວັນຍຶດອຳນາດ 23 ສິງຫາ 1945 ແມ່ນວັນແຫ່ງໄຊຊະນະອັນຍິ່ງໃຫຍ່ຄັ້ງປະຫວັດສາດ ໃນຂະບວນການຕໍ່ສູ້ອັນຍຶດເຍື້ອຍາວນານຂອງປະຊາຊົນບັນດາເຜົ່າ ເພື່ອຫຼຸດພົ້ນອອກຈາກແອກປົກຄອງຂອງພວກລ່າເມືອງຂຶ້ນແບບເກົ່າ ສ້າງຕັ້ງອຳນາດການປົກຄອງຂອງຕົນຂຶ້ນຢູ່ຫຼາຍທ້ອງຖິ່ນຈົນໄດ້ປະກາດຄວາມເປັນເອກະລາດຂອງຊາດໃນວັນທີ 12 ຕຸລາ 1945. ພາຍຫຼັງຈັກກະພັດລ່າເມືອງຂຶ້ນແບບເກົ່າຖືກປະລາໄຊ ຈັກກະລ່າເມືອງຂຶ້ນແບບໃໝ່ກໍໄດ້ກະໂດດເຂົ້າມາແທນທີ່ດຳເນີນການແຊກແຊງ ແລະ ຮຸກຮານປະເທດລາວໂດຍທັນທີດ້ວຍກົນອຸບາຍຫວັງເຮັດໃຫ້ປະເທດເຮົາກາຍເປັນຫົວເມືອງຂຶ້ນແບບໃໝ່. ວັນທີ 22 ມີນາ 1955 ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນ ແລະ ນໍາພາການຕໍ່ສູ້ຢ່າງອົງອາດກ້າຫານ, ມີໄຫວພິບປະຕິພານ, ສະຫຼາດສ່ອງໃສປຸກລະດົມມວນຊົນເຂົ້າຮ່ວມຂະບວນການຕໍ່ສູ້ຢູ່ຕາມໂຮງຈັກໂຮງງານ, ຕົວເມືອງໃຫຍ່. ໂດຍປະສານສົມທົບກໍາລັງປະກອບອາວຸດຍຶດເອົາທີ່ຕັ້ງສໍາຄັນ ວັນທີ 23 ສິງຫາ 1975 ຊາວນະຄອນຫຼວງວຽງຈັນ ສອງໝື່ນຄົນໄດ້ໂຮມຊຸມນຸມມິດຕິງເພື່ອປະກາດສ້າງຕັ້ງອໍານາດການປົກຄອງປະຕິບັດຂຶ້ນຢູ່ຂັ້ນແຂວງ, ນະຄອນຫຼວງລົງຮອດຮາກຖານໄດ້ຮັບການສ້າງຕັ້ງຂຶ້ນ. ວັນທີ 02 ທັນວາ 1975 ກອງປະຊຸມໃຫຍ່ຜູ້ແທນທົ່ວປະເທດໄດ້ໄຂຂຶ້ນຢ່າງສະຫງ່າຜ່າເຜີຍຢູ່ນະຄອນຫຼວງວຽງຈັນ ຕົກລົງລົບລ້າງລະບອບລາຊາທິປະໄຕທີ່ຫຼ້າສະໄໝ ແລະ ສະຖາປະນາລະບອບສາທາລະນະລັດ ປະຊາທິປະໄຕ ປະຊາຊົນລາວ; ສ້າງຕັ້ງສະພາສູງສຸດ, ແຕ່ງຕັ້ງປະທານປະເທດ ແລະ ສ້າງຕັ້ງລັດຖະບານ ສປປ ລາວ, ກໍານົດທຸງຊາດ, ເພງຊາດ ແລະ ພາສາທາງການມາເຖິງປັດຈຸບັນນີ້.

 

ຂ່າວຫຼ້າສຸດ
ຫສປທ ສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ