ພັນລະຍາປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ພັນລະຍາລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ

24/08/2022

ພັນລະຍາປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ພັນລະຍາລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ

     ໃນຕອນເຊົ້າຂອງວັນທີ 24 ສິງຫາ 2022, ທີ່ຫ້ອງຮັບແຂກ ສະພາແຫ່ງຊາດລາວ, ທ່ານ ນາງ ນາລີ ສີສຸລິດ, ພັນລະຍາ ທ່ານປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ຫວູ ທິ ບິກ ຫງ໋ອກ, ພັນລະຍາ ທ່ານລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ພ້ອມດ້ວຍຄະນະຜູ້ແທນ ສະຫະພັນແມ່ຍິງກະຊວງການຕ່າງປະເທດ ສສ ຫວຽດນາມ ໄດ້ເດີນທາງມາຢ້ຽມຢາມເຮັດວຽກ ແລະ ແລກປ່ຽນບົດຮຽນ ທີ່ ສປປ ລາວ ໃນລະຫວ່າງ ວັນທີ 23-25 ສິງຫາ 2022.

     ໃນໂອກາດນີ້, ທ່ານ ນາງ ນາລີ ສີສຸລິດ ໄດ້ສະແດງຄວາມຍິນດີຕ້ອນຮັບຄະນະຜູ້ແທນ ສະຫະພັນແມ່ຍິງ ກະຊວງການຕ່າງປະເທດ ສສ ຫວຽດນາມ ທີ່ເດີນທາງມາເຄື່ອນໄຫວຢ້ຽມຢາມໃນຄັ້ງນີ້, ເຊິ່ງເປັນການນໍາເອົາໄມຕີຈິດ ມິດຕະພາບອັນດູດດື່ມແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ເວົ້າລວມ, ເວົ້າສະເພາະແມ່ນ ລະຫວ່າງເອື້ອຍນ້ອງແມ່ຍິງສອງກະຊວງການຕ່າງປະເທດ ລາວ-ຫວຽດນາມ. ພ້ອມນີ້, ທ່ານ ນາງ ນາລີ ສີສຸລິດ ຍັງໄດ້ສະແດງຄວາມຊົມເຊີຍຜົນສໍາເລັດການແລກປ່ຽນບົດຮຽນໃນຄັ້ງນີ້, ທີ່ເປັນບາດກ້າວທີ່ພົ້ນເດັ່ນຂອງການຮ່ວມມື ລະຫວ່າງ ສະຫະພັນແມ່ຍິງສອງກະຊວງການຕ່າງປະເທດ ກໍ່ຄື ພັນລະຍາການນໍາຂອງທັງສອງຝ່າຍ, ເຊິ່ງໄດ້ປະກອບ ສ່ວນສໍາຄັນໃນການເສີມຂະຫຍາຍສາຍພົວພັນ ມິດຕະພາບກັບບັນດາປະເທດຕ່າງໆໃນອາຊຽນ ກໍ່ຄືການຮັດແໜ້ນຄວາມສາມັກຄີພາຍໃນນັບມື້ນັບສູງຂຶ້ນ ແລະ ຍັງໄດ້ສະແດງຄວາມເຊື້ອໝັ້ນວ່າ ໃນອະນາຄົດ ບົດບາດຂອງແມ່ຍິງຍິ່ງຈະມີຄວາມສໍາຄັນໃນຂົງເຂດການເມືອງນັບມື້ນັບເພີ່ມຂຶ້ນ ເພື່ອເປັນການປະກອບ ສ່ວນເຂົ້າໃນການພັດທະນາໂດຍລວມຂອງປະເທດ ກໍ່ຄືເວທີພາກພື້ນ ແລະ ສາກົນ. ນອກນີ້, ທ່ານ ນາງ ນາລີ ສີສຸລິດ ຍັງໄດ້ຝາກຄວາມຢື້ຢາມຖາມຂ່າວເຖິງ ທ່ານ ເຈີ່ນ ທິ ຫງວຽດ ທູ, ພັນລະຍາ ທ່ານປະທານປະເທດ ຫງວຽນ ຊວັນ ຟຸກ ແລະ ທ່ານ ຫງວຽນ ຫງວຽດ ງາ, ພັນລະຍາ ທ່ານຮອງນາຍົກລັດຖະມົນຕີ ຜູ້ປະຈຳການ ຟາມ ບິ່ງ ມິງ.

     ໃນໂອກາດດຽວກັນນີ້, ທ່ານ ນາງ ຫວູ ທິ ບິກ ຫງ໋ອກ ກໍ່ໄດ້ສະແດງຄວາມຂອບໃຈຢ່າງຈິງໃຈ ຕໍ່ກັບການຕ້ອນຮັບອັນອົບອຸ່ນ ຂອງ ພັນລະຍາປະທານປະເທດ, ພ້ອມທັງໄດ້ລາຍງານຜົນສໍາເລັດຂອງການພົບປະກັບ ແລກປ່ຽນບົດຮຽນ ລະຫວ່າງ ຄະນະສະຫະພັນແມ່ຍິງກະຊວງການຕ່າງປະເທດຫວຽດນາມ-ລາວ ແລະ ແຜນການເຄື່ອນໄຫວຢ້ຽມຢາມໃນຄັ້ງນີ້. 

 

ຂ່າວຫຼ້າສຸດ
ຫສປທ ສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ