ຫສປທ ສຳເລັດການຝຶກອົບຮົມທິດສະດີການເມືອງ-ການປົກຄອງໃຫ້ພະນັກງານ-ສະມາຊິກພັກ

02/08/2022

ຫສປທ ສຳເລັດການຝຶກອົບຮົມທິດສະດີການເມືອງ-ການປົກຄອງໃຫ້ພະນັກງານ-ສະມາຊິກພັກ

      ບັນດາສະມາຊິກພັກ, ພະນັກງານຫຼັກແຫຼ່ງ ຫ້ອງວ່າການສຳນັກງານປະທານປະເທດ (ຫສປທ)  ຈຳນວນ 35 ສະຫາຍ ໄດ້ສໍາເລັດຊຸດອົບຮົມ ທິດສະດີການເມືອງ-ການປົກຄອງ 45 ວັນ ຊຸດທີ II.ພິທີປິດຊຸດອົບຮົມດັ່ງກ່າວໄດ້ຈັດຂຶ້ນເມື່ອວັນທີ 2 ສິງຫາ 2022 ນີ້ ໂດຍໃຫ້ກຽດເຂົ້າຮ່ວມຂອງ ສະຫາຍ ນາງ ເຂັມມະນີ ພົນເສນາ, ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຫ້ອງວ່າການສຳນັກງານປະທານປະເທດ, ສະຫາຍ ນາງ ບຸນມີ ຈຸນລະຈັກ, ຮອງເລຂາຄະນະພັກ, ຮອງຫົວໜ້າສະຖາບັນການເມືອງ-ການປົກຄອງແຫ່ງຊາດ ພ້ອມດ້ວຍແຂກຖືກເຊີນ ແລະ ນັກຝຶກອົບຮົມເຂົ້າຮ່ວມ.

     

        ສະຫາຍ ເພັດສະໜອນ ພັນທະວົງ, ຮອງເລຂາຄະນະບໍລິຫານພັກ, ຮອງຫົວໜ້າຫ້ອງວ່າການສໍານັກງານປະທານປະເທດ, ຫົວໜ້າຄະນະຮັບຜິດຊອບຊຸດຝຶກອົບຮົມດັ່ງກ່າວ ໄດ້ກ່າວວ່າ: ຊຸດອົບຮົມຄັ້ງນີ້ ໄດ້ເລີ່ມມາແຕ່ ວັນທີ 30 ພຶດສະພາ ເຖິງ ວັນທີ 1 ສິງຫາ 2022 ໄດ້ສໍາເລັດລົງ ໂດຍມີນັກສໍາມະນາກອນທັງໝົດ 35 ສະຫາຍ ຍິງ 14 ສະຫາຍ ໃນນັ້ນນັກຝຶກອົບຮົມ ຫສປທ 27 ສະຫາຍ, ມາຈາກສານປະຊາຊົນນະຄອນຫຼວງວຽງຈັນ 3 ສະຫາຍ, ກອງບັນຊາການປ້ອງກັນສູນກາງ 4 ສະຫາຍ ແລະ ຫ້ອງການປົກຄອງເມືອງສີໂຄດຕະບອງ 1 ສະຫາຍ, ຊຸດອົບຮົມດັ່ງກ່າວ, ຜ່ານການຝຶກອົບຮົມຄັ້ງນີ້ເຫັນວ່ານັກຝຶກອົບຮົມ ໄດ້ຍົກລະດັບຄວາມຮູ້ ແລະ ຄວາມເຂົ້າໃຈທາງດ້ານທິດສະດີມາກ-ເລນິນ, ແນວຄິດ ປະທານ ໄກສອນ ພົມວິຫານ, ເຊື່ອມຊຶມກຳແໜ້ນແນວທາງນະໂນບາຍຂອງພັກ ໂດຍສະເພາະແນວທາງປ່ຽນແປງໃໝ່ຮອບດ້ານທີ່ເປັນຫຼັກການຂອງພັກ, ລະບຽບ, ກົດໝາຍ ແລະ ແຜນພັດທະນາເສດຖະກິດ-ສັງຄົມແຫ່ງລັດ ໄດ້ເລິກເຊິ່ງ ແລະ ກວ້າງຂວາງກສ່າເກົ່າ;ສາມາດບັນລຸໄດ້ຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ທັງເປັນການຍົກລະດັບຄວາມຮູ້ຂອງບັນດາຜູ້ເຂົ້າຮ່ວມຝຶກອົບຮົມໃຫ້ເຂົ້າໃຈເຖິງພາລະບົດບາດ ແລະ ຄວາມຮັບຜິດຊອບຂອງການເປັນພະນັກງານເພື່ອສືບທອດໃນອະນາຄົດ.

       ສະຫາຍ ນາງ ເຂັມມະນີ ພົນເສນາ ກ່າວວ່າ: ພັກເຮົາຍາມໃດກໍຢຶດໝັ້ນທິດສະດີມາກ - ເລນິນເປັນເຂັມທິດເຍືອງທາງ ພ້ອມທັງໝູນໃຊ້ທິດສະດີ ດັ່ງກ່າວໃຫ້ສອດຄ່ອງກັບສະພາບຕົວຈິງ ແລະ ຈຸດພິເສດຂອງປະເທດເຮົາ, ສະນັ້ນ ຈຶ່ງມີຄວາມຈໍາເປັນສໍາລັບພະນັກງານ, ສະມາຊິກພັກຂອງພວກເຮົາທີ່ຈະຕ້ອງເອົາໃຈໃສ່ ຄົ້ນຄ້ວາຮ່ຳຮຽນ ແລະ ກໍາແໜ້ນທິດສະດີມາກ-ເລນິນ, ບັນດາແນວທາງນະໂຍບາຍຂອງພັກ-ລັດ ໃນເງື່ອນໄຂທີ່ພັກກໍາອໍານາດ ເພື່ອປົກປັກຮັກສາ ແລະ ເສີມຂະຫຍາຍລະບອບການເມືອງຂອງພັກເຮົາໃຫ້ມີຄວາມໝັ້ນຄົງ, ສາມາດເປັນແກນນໍາໃນລະບົບການເມືອງ, ເພື່ອນໍາພາປະເທດຊາດຫຼຸດພົ້ນອອກຈາກຄວາມດ້ອຍພັດທະນາຕາມເປົ້າໝາຍທີ່ພັກ-ລັດໄດ້ວາງໄວ້, ຕ້ານບັນດາແນວຄິດສວຍໂອກາດຂອງກຸ່ມຄົນບໍ່ດີທີ່ຫວັງທໍາລາຍລະບອບໃໝ່, ສະມາຊິກພັກ, ພະນັກງານຫຼັກແຫຼ່ງ ຕ້ອງໄດ້ເປັນເຈົ້າການສຶກສາຄົ້ນຄວ້າ ຮ່ຳຮຽນທິດສະດີມາກ-ເລນິນ ແນວຄິດ ໄກສອນ ພົມວິຫານ ເພື່ອນໍາໃຊ້ເຂົ້າໃສ່ພຶດຕິກໍາຕົວຈິງ ເປັນການຍົກລະດັບຄວາມຮູ້, ຄວາມສາມາດຂອງຕົນໃຫ້ສູງຂຶ້ນ ເພື່ອສືບທອດພາລະກິດອັນນັກໜ່ວງຂອງພັກ, ນໍາພາປະເທດຊາດກ້າວຂຶ້ນຕາມຈຸດໝາຍສັງຄົມນິຍົມ.

 

 

ຂ່າວຫຼ້າສຸດ
ຫສປທ ສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ