ສະຫະພັນແມ່ຍິງ ຫສປທ ສະຫຼຸບຜົນງານປະຈໍາປີ 2021 ແລະ ປາຖະກະຖາວັນສ້າງ ຕັ້ງສະຫະພັນແມ່ຍິງລາວ ຄົບຮອບ 67 ປີ

29/07/2022

ສະຫະພັນແມ່ຍິງ ຫສປທ ສະຫຼຸບຜົນງານປະຈໍາປີ 2021 ແລະ ປາຖະກະຖາວັນສ້າງ  ຕັ້ງສະຫະພັນແມ່ຍິງລາວ ຄົບຮອບ  67  ປີ

       ໃນວັນທີ 29 ກໍລະກົດ 2022 ສະຫະພັນແມ່ຍິງຫ້ອງວ່າການສໍານັກງານປະທານປະເທດ ໄດ້ຈັດກອງປະຊຸມສະຫຼຸບຜົນງານປະຈໍາປີ 2022 ແລະ ປາຖະກະຖາວັນສ້າງຕັ້ງສະຫະພັນແມ່ຍິງລາວ ຄົບຮອບ 67  ປີ  ທີ່ຫ້ອງງານລ້ຽງ  ເປັນປະທານໂດຍສະຫາຍ ນ. ອໍາມະລີ ຈັນທະພອນ ຄະນະບໍລິຫານງານພັກ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງ ຫສປທ, ໃຫ້ກຽດເຂົ້າຮ່ວມຂອງສະຫາຍ  ອິນທະປັນຍາ  ຂຽວວົງພະຈັນ, ຄະນະບໍລິຫານງານພັກ, ຮອງຫົວໜ້າຫ້ອງວ່າການສໍານັກງານປະທານປະເທດ, ທັງເປັນຜູ້ຊີ້ນໍາອົງການຈັດຕັ້ງມະຫາຊົນ, ພະນັກງານແມ່ຍິງອາວຸໂສບໍານານ, ສະມາຊິກແມ່ຍິງ ຫສປທ ແລະ ແຂກຖືກເຊີນຈາກອ້ອມຂ້າງພາຍໃນ ຫສປທ ຈໍານວນ   42  ສະຫາຍ, ຊາຍ 04 ສະຫາຍ ເຂົ້າຮ່ວມ.

        ໃນພິທີ ສະຫາຍນ. ອໍາມະລີ ຈັນທະພອນ ຄະນະບໍລິຫານງານພັກ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງ ຫສປທ ໄດ້ລາຍງານຜົນສຳເລັດ ຂອງກອງປະຊຸມໃຫຍ່ແມ່ຍິງລາວທົ່ວປະເທດ ຄັ້ງທີ VIII ໂດຍຫຍໍ້ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ໄດ້ດໍາເນີນມາຢ່າງເປັນທາງການ ນັບແຕ່ວັນທີ 18-19 ພະຈິກ 2021 ທີ່ນະຄອນຫຼວງວຽງຈັນ; ກອງປະຊຸມໃຫຍ່ຄັ້ງນີ້ ມີຜູ້ແທນສົມບູນເຂົ້າຮ່ວມຈໍານວນ 331 ສະຫາຍ ທີ່ເປັນຕົວແທນໃຫ້ສະມາຊິກສະຫະພັນແມ່ຍິງ ຈໍານວນ 1.434.236 ຄົນ ໃນທົ່ວປະເທດ ແລະ ມີແຂກຖືກເຊີນເຂົ້າຮ່ວມ  60 ທ່ານ, ຍິງ 35 ທ່ານ, ຊາຍ 25 ທ່ານ. ກອງປະຊຸມໄດ້ເປັນເອກະສັນກັນຮັບຮອງເອົາທິດທາງແຜນການ 5 ປີ ຕໍ່ໜ້າ ນັບແຕ່ປີ 2021-2025 ຊຶ່ງມີເນື້ອໃນຕົ້ນຕໍດັ່ງນີ້:ຮັບຮອງເອົາບົດລາຍງານການເມືອງ (2021-2025) ຊຶ່ງໄດ້ວາງຄາດໝາຍສູ້ຊົນ, ທິດທາງລວມ ແລະ ວຽກງານຈຸດສຸມໃນ 5 ປີຕໍ່ໜ້າ,  ຮັບຮອງທິດທາງແຜນພັດທະນາແມ່ຍິງແຫ່ງຊາດ 5 ປີ (2021-2025) ຊຶ່ງປະກອບມີ 10 ແຜນງານ, 65 ໂຄງການ,ຮັບຮອງເອົາກົດລະບຽບຂອງສະຫະພັນແມ່ຍິງລາວ ສະບັບປັບປຸງ ສະໄໝທີ VIII ປະກອບ​ດ້ວຍ 11 ໝວດ 39 ມາດຕາ ໃນນັ້ນ ປັບປຸງໃໝ່ 11 ໝວດ,  27 ມາດຕາ  ແລະ ເພີ່ມຂຶ້ນ 1 ມາດຕາ, ຮັບຮອງເອົາ ຄຳຂັວນຂອງສະຫະພັນແມ່ຍິງ ຄື: “ ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ” ແລະ ຂໍ້ແຂ່ງຂັນ 03 ດີ ຄື: “ພັດທະນາດີ, ພົນລະເມືອງດີ ແລະ ສ້າງຄອບຄົວດີ”. ກອງປະຊຸມໃຫຍ່ ຍັງໄດ້ພ້ອມກັນໃຊ້ສິດປະຊາທິປະໄຕ ປ່ອນບັດເລືອກຕັ້ງ ແລະ ຮັບຮອງເອົາຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ໂດຍສອດຄ່ອງ ກັບມາດຖານເງື່ອນໄຂ ທີ່ໄດ້ກໍານົດໄວ້ ຊຶ່ງປະກອບດ້ວຍຜູ້ເກົ່າ, ຜູ້ໃໝ່, ຜູ້ອາວຸໂສ, ຜູ້ກາງ, ຜູ້ໜຸ່ມແໜ້ນ, ຂົງເຂດ ແລະ ຊົນເຜົ່າ, ຜູ້ລົງສະໝັກທັງໝົດ 68 ທ່ານ ເລືອກໄດ້ຈໍານວນ 63 ທ່ານ ໃນນີ້ປະທານສະຫະພັນແມ່ຍິງຫ້ອງວ່າການສຳນັກງານປະທານປະເທດ ໄດ້ຮັບການເລືອກຕັ້ງເຂົ້າເປັນຄະນະບໍລິຫານງານ ສູນກາງສະຫະພັນແມ່ຍິງລາວ.

          ໃນນັ້ນ, ສະຫາຍນ. ກຽງສອນ ສິດທິອານົງ ຮອງປະທານສະຫະພັນແມ່ຍິງ ຫສປທ ໄດ້ຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 03 ດີ ຂອງສະຫະພັນແມ່ຍິງ ຫສປທ ສະໄໝທີ II (2016-2020), ຂໍ້ຕົກລົງວ່າດ້ວຍການຮັບຮອງເອົາການຈັດຕັ້ງປະຕິບັດຂໍ້ແຂ່ງຂັນ 03 ດີ ສະໄໝທີ II (2016-2020 ) ສະຫະພັນ​ແມ່ຍິງ  ຫສປທ ແລະ ບົດສະຫລຸບການເຄື່ອນໄຫວວຽກງານ ປະຈຳປີ 2021 ແລະ ທິດທາງແຜນການ ປະຈໍາປີ 2022 ຂອງສະຫະພັນແມ່ຍິງ ຫສປທ. ພ້ອມດຽວກັນນັ້ນ, ໄດ້ມີພິທີມອບຮັບການຍ້ອງຍໍໃຫ້ຄະນະພັກ ຫສປທ, ພິທີມອບຮັບທຸງໄຊ ແລະ ຍ້ອງຍໍການຈັດຕັ້ງປະຕິບັດຂໍ້ແຂ່ງຂັນ 03 ດີ ຂອງໜ່ວຍສະຫະພັນແມ່ຍິງ ຫສປທສະໄໝທີ II (2016-2020 )  ແລະ ມອບໃບຍ້ອງຍໍ ຈໍານວນ 30ສະຫາຍ, ໃບຊົມເຊີຍ 05 ສະຫາຍ ໃຫ້ສະມາຊິກແມ່ຍິງ ຫສປທໃນການຈັດຕັ້ງປະຕິບັດຂໍ້ແຂ່ງຂັນ 03 ດີ (2016-2020 ).

         ໃນພິທີສະມາຊິກແມ່ຍິງ ຫສປທ  ຍັງໄດ້ຮັບຟັງ ການປາຖະກະຖາ ວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ ໃຫ້ກຽດປາຖະກະຖາໂດຍ ສະຫາຍ  ອິນທະປັນຍາ  ຂຽວວົງພະຈັນ, ຄະນະບໍລິຫານງານພັກ, ຮອງຫົວໜ້າຫ້ອງວ່າການສໍານັກງານປະທານປະເທດ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ ໂດຍສະຫາຍໄດ້ຫວນຄືນປະຫວັດມູນເຊື້ອຄວາມເປັນມາ ແລະ ມູນເຊື້ອອັນພິລະອາດຫານຂອງເອື້ອຍນ້ອງແມ່ຍິງ ໃນສະໄໝຕໍ່ສູ້ກູ້ຊາດ-ການສ້າງສາພັດທະນາໃນປັດຈຸບັນ, ສະຫາຍໄດ້ຍົກໃຫ້ເຫັນຜົນງານທີ່ພົ້ນເດັ່ນໃນແຕ່ລະໄລຍະ ເພື່ອໃຫ້ເອື້ອຍນ້ອງແມ່ຍິງໃນຍຸກໃໝ່ໄດ້ສືບຕໍ່ຮໍ່າຮຽນເອົາຄຸນງາມຄວາມດີ ແລະ ຮັກສາມູນເຊື້ອອັນດີງາມນັ້ນໄວ້ໃຫ້ລູກຫຼານສຶບທອດຕໍ່ໄປ. ພ້ອມດຽວກັນນັ້ນ, ສະຫາຍ ອິນທະປັນຍາ  ຂຽວວົງພະຈັນ ໄດ້ເນັ້ນໜັກບັນຫາຕໍ່ສະມາຊິກແມ່ຍິງ ຫສປທ ໃຫ້ເອົາໃຈໃສ່ໃນຈັດຕັ້ງປະຕິບັດວຽກງານແມ່ຍິງ ເຊັ່ນ: u ຮັກສາມູນເຊື້ອອັນພິລະອາດຫານ ແລະ ການກໍາເນີດຂອງສະຫະພັນແມ່ຍິງທີ່ຕິດພັນກັບຂະບວນການປົດປ່ອຍຊາດ, v ການເຕີບໃຫຍ່ຂະຫຍາຍຕົວຂອງສະຫະພັນແມ່ຍິງຈາກເມື່ອກ່ອນມີພຽງ 03 ທ່ານ ແຕ່ປະຈຸບັນມີ 1.434.236 ສະຫາຍ, wເສີມຂະຫຍາຍມູນເຊື້ອຂອງສະຫະພັນແມ່ຍິງສະໄໝຕໍ່ສູ້ກູ້ຊາດ; ຫຼັງປົດປ່ອຍສະຫະພັນແມ່ຍິງໄດ້ປະກອບສ່ວນຢ່າງຕັ້ງໜ້າເຂົ້າໃນທຸກຂົງເຂດວຽກງານ, x ເຕົ້າໂຮມຄວາມສາມັກຄີ, ມີຄວາມບໍລິສຸດພຸດພ່ອງ ແລະ ສ້າງເງື່ອນໄຂໃຫ້ສະມາຊິກແມ່ຍິງໄດ້ມີໂອກາດຍົກລະດັບທິດສະດີການເມືອງ, ວິຊາສະເພາະ ແລະ ພາສາຕ່າງປະເທດເພື່ອໃຫ້ສອດຄ່ອງກັບຍຸກ 4.0 ກໍຄືການພັດທະນາເອື້ອຍນ້ອງແມ່ຍິງຂອງ ຫສປທ ໃຫ້ມີຜົນສຳເລັດໃນອະນາຄົດ.

 

ຂ່າວຫຼ້າສຸດ
ຫສປທ ສະຫຼຸບວຽກງານຈັດຕັ້ງ, ພັກ-ພະນັກງານ ແລະ ວຽກງານກວດກາ
ຂໍ້ມູນຕິດຕໍ່ພົວພັນ
ຈຳນວນຜູ້ເຂົ້າຊົມ