ໃນວັນທີ 26 ມັງກອນ 2023, ທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານຊົມເຊີຍ ເຖິງ ທ່ານ ເດວິດ ເຮີເລ, ຜູ້ສຳເລັດຣາຊະການ ແຫ່ງ     ເຄືອຈັກກະພົບ ອົດສະຕຣາລີ ເນື່ອງ​ໃນ​ໂອ​ກາດ​ວັນ​ຊາດ ອົດ​ສະ​ຕ​ຣາ​ລີ​ ຄົບ​ຮອບ 235 ປີ, ໂດຍເນື້ອໃນສານໄດ້ກ່າວວ່າ:

“ໃນ​ນາມ​ ປະ​ຊາ​ຊົນລາວ ທຸກຖ້ວນໜ້າ ແລະ ໃນນາມສ່ວນຕົວ, ຂ້າພະເຈົ້າ ມີ​ຄວາມ​ປິ​ຕິ​ຍິນ​ດີເປັນ​ຢ່າງ​ຍິ່ງ ສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນ ​ແລະ ພອນໄຊອັນປະເສີດ ມາ​ຍັງ ພະນະ​​ທ່ານ ແລະ ປະຊາຊົນ ອົດສະຕຣາລີ ເພື່ອນມິດ ເນື່ອງ​ໃນ​ໂອ​ກາດ​ວັນ​ຊາດ ອົດ​ສະ​ຕ​ຣາ​ລີ​ ຄົບ​ຮອບ 235 ປີ.

“ຂ້າພະເຈົ້າ ມີຄວາມພາກພູມໃຈເປັນຢ່າງຍິ່ງທີ່ເຫັນວ່າ 7 ທົດສະວັດ ຜ່ານມາ, ສາຍພົວພັນມິດຕະພາບອັນດີງາມ ລະຫວ່າງ ສປປ ລາວ ແລະ ອົດສະຕຣາລີ ເປັນໜຶ່ງໃນສາຍພົວພັນມິດຕະພາບທີ່ຕໍ່ເນື່ອງ ແລະ ຍາວນານ ຊຶ່ງໄດ້ສ້າງຄວາມໄວ້ເນື້ອເຊື່ອໃຈ ແລະ ເຂົ້າໃຈຊຶ່ງກັນ ແລະ ກັນ. ນອກນັ້ນ, ພວກເຮົາໄດ້ເຫັນຢ່າງຈະແຈ້ງເຖິງຄວາມຄືບໜ້າໃນການຍົກລະດັບ ແລະ ການຂະຫຍາຍການຮ່ວມມືສອງຝ່າຍ ໂດຍສະເພາະໃນຂົງເຂດການເມືອງ, ການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ກໍຄື ການໄປມາຫາສູ່ລະຫວ່າງປະຊາຊົນສອງປະເທດ. ໃນປີ 2022, ພວກເຮົາໄດ້ຮ່ວມກັນສະເຫລີມສະຫລອງ ວັນສ້າງຕັ້ງສາຍພົວພັນການທູດ ລາວ - ອົດສະຕຣາລີ ຄົບຮອບ 70 ປີ ດ້ວຍຫຼາຍກິດຈະກໍາທີ່ມີເນື້ອໃນເລິກເຊິ່ງ ແລະ ມີບັນຍາກາດຄຶກຄື້ນ, ເຊິ່ງເປັນຂີດໝາຍສຳຄັນຢ່າງຍິ່ງ ທາງດ້ານປະຫວັດສາດການພົວພັນມິດຕະພາບລະຫວ່າງສອງປະເທດພວກເຮົາ.

ເນື່ອງໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍອວຍພອນໃຫ້ ພະນະທ່ານ ຈົ່ງມີສຸຂະພາບເຂັ້ມແຂງ,   ມີຄວາມຜາສຸກ, ປະສົບຜົນສຳເລັດໃນໜ້າທີ່ອັນສູງສົ່ງຂອງ ພະນະທ່ານ ແລະ ຂໍອວຍພອນໃຫ້ປະຊາຊົນ       ອົດສະຕຣາລີ ເພື່ອນມິດ ຈົ່ງສືບຕໍ່ມີຄວາມກ້າວໜ້າ ແລະ ວັດທະນະຖາວອນ.”