ໃນວັນທີ 16 ມັງກອນ 2023, ທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານຕອບຂອບໃຈ ເຖິງ ທ່ານ ແຊກຈີໂອ ມັດຕາແຣນລາ, ປະ​ທາ​ນາ​ທິ​ບໍ​ດີ ແຫ່ງ ສາ​ທາ​ລະ​ນະ​ລັດ ອີຕາລີ ເນື່ອງໃນໂອກາດທີ່ເພິ່ນໄດ້ສົ່ງສານອວຍພອນວັນຊາດ ແຫ່ງ ສປປ ລາວ ຄົບຮອບ 47 ປີ ໂດຍເນື້ອໃນສານໄດ້ກ່າວວ່າ:

“ຂ້າ​ພະ​ເຈົ້າ ຂໍ​ສະ​ແດງ​ຄວາມ​ຂອບ​ໃຈຢ່າງຈິງໃຈ ​ມາ​ຍັ​ງ​ ພະ​ນະ​ທ່ານ ທີ່ໄດ້ສົ່ງຄຳຊົມເຊີຍອັນ​ອົບ​ອຸ່ນ ແລະ ​ພອນໄຊອັນປະເສີດ ມາ​ຍັງ​ ຂ້າ​ພະ​ເຈົ້າ ​ແລະ ປະ​ຊາ​ຊົນ​ລາວ ເນື່ອງ​ໃນ​ໂອ​ກາດວັນ​ຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 47 ປີ.

ຂ້າ​ພະ​ເຈົ້າ ເຊື່ອໝັ້ນວ່າ ດ້​ວຍ​ຄວາມ​ພະ​ຍາ​ຍາມ ແລະ ຄຳ​ໝັ້ນ​ສັນ​ຍາ​ອັນ​ໜັກ​ແໜ້ນ​ ຂອງ​ພວກ​ເຮົາ,   ສາຍ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມືໃນຂອບ ສອງຝ່າຍ ແລະ ຫຼາຍຝ່າຍ ລະ​ຫວ່າງ ສອ​ງ​ປະ​ເທດ​ພວກເຮົາ  ຈະສືບ​ຕໍ່ໄດ້​ຮັບ​ການ​ຮັດ​ແໜ້ນ ແລະ ເສີມ​ຂະ​ຫຍາຍ​ໃຫ້​ແຕກດອກ​ອອກ​ຜົນ​​ຍິ່ງ​ໆຂຶ້ນໃນ​ຊຸມ​ປີ​ຕໍ່​ໜ້າ, ໂດຍສະເພາະ       ການພົວພັນຮ່ວມມື ລະຫວ່າງ ນະຄອນຫຼວງວຽງຈັນ ແລະ ນະຄອນຫຼວງໂຣມ, ເພື່ອ​ຜົນ​ປະ​ໂຫຍດ​​ລວມຂອງ  ປະ​ຊາ​ຊົນ​ສອງ​ຊາດ​​ພວກ​ເຮົາ ກໍ່ຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ຢູ່ໃນພາກພື້ນ ແລະ ໃນໂລກ.

ຂ້າ​ພະ​ເຈົ້າ ຂໍ​ຖື​ໂອ​ກາດ​ນີ້ ​​ອວຍ​ພອນ​​ໃຫ້ພ​ະ​ນະ​ທ່ານ ຈົ່ງ​ມີ​ສຸຂະພາບເຂັ້ມແຂງ​, ມີ​ຄວາມ​​ຜາສຸກ​, ປະ​ສົບ​ຜົນ​ສຳ​ເລັດ​ອັນ​ຍິ່ງ​ໃຫຍ່​ໃນ​ໜ້າ​ທີ່​ອັນ​ມີ​ກຽດຂອງພະນະ​​ທ່ານ ​ແລະ ອວຍ​ພອນ​ໃຫ້​ ປະ​ຊາ​ຊົນ​ອີຕາລີ ຈົ່ງ​ມີ​​ຄວາມ​ຈະ​ເລີນ​ກ້າວ​ໜ້າ ແລະ ວັດ​ທະ​ນ​ະ​ຖາ​ວອນ.”