ຕອນເຊົ້າວັນທີ 22 ມີນາ 2020 ທີ່ນະຄອນຫຼວງວຽງຈັນ, ການນໍາຂັ້ນສູງພັກ – ລັດເຮົາ ໄດ້ເຂົ້າຮ່ວມພິທີວາງພວງມາລາ ຢູ່ອະນຸສາວະລີ ນັກຮົບນິລະນາມດາວແດງ ແລະ ພິທີວາງກະຕ່າດອກໄມ້ ຢູ່ອະນຸສອນສະຖານ ປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງປວງຊົນລາວທັງຊາດ, ນໍາໂດຍ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ພ້ອມດ້ວຍສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ.
ເນື່ອງໃນໂອກາດວັນສ້າງຕັ້ງ ພັກປະຊາຊົນປະຕິວັດລາວຄົບ ຮອບ 65 ປີ ເພື່ອສະແດງຄວາມກະຕັນຍູຮູ້ບຸນຄຸນ ແລະ ຈາລຶກຄຸນງາມຄວາມດີ ຂອງວິລະຊົນແຫ່ງຊາດ, ນັກຮົບແຂ່ງຂັນ, ນາຍ ແລະ ພົນທະຫານ ແລະ ປະຊາຊົນລາວບັນດາເຜົ່າ ທີ່ໄດ້ເສຍສະຫຼະເລືອດເນື້ອ ແລະ ຊີວິດ ໃນພາລະກິດຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານທັງເກົ່າ ແລະ ໃຫມ່ເມື່ອກ່ອນ, ໃນການຍາດເອົາເອກະລາດ ມາໃຫ້ປະເທດຊາດ ແລະ ທັງເພື່ອສະແດງຄວາມຮູ້ບຸນຄຸນ ແລະ ຈົ່ງຮັກພັກດີຕໍ່ຜູ້ນໍາການປະຕິວັດ ທີ່ໄດ້ເສຍສະຫຼະເຫື່ອແຮງ, ສະຕິປັນຍາ ແລະ ຊີວິດອັນມີຄ່າ ເພື່ອພາລະກິດປົດປ່ອຍຊາດ ອອກຈາກແອກຄອບຄອງ ຂອງຈັກກະພັດຕ່າງດ້າວ ຈົນສາມາດຍາດໄດ້ໄຊຊະນະ, ລົບລ້າງລະບອບລາຊາທິປະໄຕ ແລະ ສະຖາປະນາ ສາທາລະນະລັດປະຊາທິປະໄຕປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.
ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955, ກໍາເນີດເກີດຂຶ້ນ ຈາກຄວາມຮຽກຮ້ອງຕ້ອງການ ຂອງຂະບວນການຕໍ່ສູ້ຂອງປະຊາຊົນບັນດາເຜົ່າຕ້ານການຮຸກຮານຈາກຕ່າງຊາດ, ທັງແມ່ນໝາກຜົນທີ່ຕ້ອງເປັນໄປຂອງ ປະຫວັດສາດໃນຍຸກໃໝ່ ທີ່ຕ້ອງປະສານສົມທົບລະຫວ່າງ ການຕໍ່ສູ້ປົດປ່ອຍຊາດ ກັບການປະຕິວັດ ຕາມເສັ້ນທາງສັງຄົມນິຍົມ ຂອງລັດທິມາກ – ເລນິນ. ນັບແຕ່ມື້ກໍາເນີດ , ພັກກໍ່ໄດ້ປະເຊີນໜ້າໂດຍກົງກັບອິດທິກໍາລັງຮຸກຮານທີ່ເຂັ້ມແຂງທີ່ສຸດ, ແຕ່ຍ້ອນສາມາດສົມທົບ ລະຫວ່າງ ໜ້າທີ່ປົດປ່ອຍຊາດ ກັບໜ້າທີ່ປົດປ່ອຍສັງຄົມ, ເອົາຂະບວນການຕໍ່ສູ້ ຂອງປະຊາຊົນບັນດາ ເຜົ່າ ຕ້ານການຮຸກຮານ ຕິດພັນກັບກະແສຟອງຂອງ ຂະບວນການປະຕິວັດທາງຊົນຊັ້ນ ຂອງຊົນຊັ້ນກໍາມະກອນ ຢູ່ໃນອິນດູຈີນ ແລະ ໃນໂລກ ຈິ່ງເຮັດໃຫ້ພັກເຮົາໄດ້ຮັບ ການສະໜັບສະໜູນ ທັງຈາກປະຊາຊົນພາຍໃນປະເທດ ທັງຈາກທຸກກໍາລັງປະຕິວັດ ແລະ ກ້າວໜ້າບົນເວທີສາກົນ, ຊຶ່ງເປັນປັດໄຈຄໍ້າປະກັນ ການເຕີບໃຫຍ່ເຂັ້ມແຂງ ຂອງພັກເຮົາຕະຫຼອດມາ, ທັງເປັນສິ່ງຄໍ້າປະກັນ ໄຊຊະນະ ຂອງພາລະກິດປະຕິວັດພາຍໃຕ້ການນໍາພາຂອງພັກ. ການນໍາພາຂອງພັກ ເຖິງຈະຜ່ານເສັ້ນທາງ ອັນລະອິດລະອ້ຽວ, ຍືດເຍື້ອຍາວນານ, ບາງໄລຍະກໍ່ຕົກຢູ່ໃນສະພາບ ທີ່ແສນອັດຕະຄັດ ຄືຈະກ້າວຜ່ານບໍ່ໄດ້, ແຕ່ໃນທີ່ສຸດກໍ່ສາມາດຜ່ານຜ່າໄດ້, ທັງສາມາດຍາດໄຊຊະນະ ຈາກໄຊຊະນະນີ້ ສູ່ໄຊຊະນະໃໝ່ ທີ່ໃຫຍ່ຫຼວງກວ່າເກົ່າ, ສາມາດນໍາພາປະຊາຊົນ ຂັບໄລ່ຜູ້ຮຸກຮານ, ໂຄ່ນລົ້ມອໍານາດການປົກຄອງ ແບບຂຸນເສິກ – ສັກດີນາ, ກາຍເປັນພັກກໍາອໍານາດ ແລະ ນໍາພາປະຊາຊົນກ້າວສູ່ໄລຍະ ຂອງການປະຕິບັດສອງໜ້າທີ່ ຍຸດທະສາດ: ປົກປັກຮັກສາ ແລະ ສ້າງສາປະເທດຊາດ, ສ້າງ ແລະ ຂະຫຍາຍລະບອບປະຊາ ທິປະໄຕປະຊາຊົນ ກ້າວຂຶ້ນສູ່ຈຸດໝາຍສັງຄົມນິຍົມ. ປະຈຸບັນນີ້, ປະເທດຊາດຂອງພວກເຮົາມີສະຖຽນລະພາບທາງດ້ານການເມືອງ, ເສດຖະກິດ-ສັງຄົມ ໄດ້ຮັບການພັດທະນາ ຢ່າງຕໍ່ເນື່ອງ, ຖານະບົດບາດ ຊື່ສຽງຂອງ ສປປ ລາວ ນັບມື້ນັບໄດ້ພົ້ນເດັ່ນຂຶ້ນ ໃນພາກພື້ນ ແລະ ສາກົນ.