ໃນວັນທີ 4 ຕຸລາ 2024 ຜ່ານມາ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ພ້ອມຄະນະ ໄດ້ ພົບປະສອງຝ່າຍ ກັບ ທ່ານ ເອັມມາ ນຸຍແອນ ມາຄຣົງ ປະທານາທິບໍດີ ແຫ່ງ ສາທາລະນະລັດ ຝຣັ່ງ ແລະ ຄະນະ, ໃນໂອກາດເຂົ້າຮ່ວມກອງປະຊຸມ ສຸດຍອດຝຣັງໂກໂຟນີ ຄັ້ງທີ 19 ທີ່ນະຄອນຫຼວງປາຣີ ສ ຝຣັ່ງ.

          ທ່ານປະ​ທາ​ນາ​ທິ​ບໍ​ດີ ເອັມມາ ນຸຍແອນ ມາຄຣົງ ໄດ້​ສະ​ແດງ​ຄວາມ​ຍິນ​ດີ​ຕ້ອນ​ຮັບ ແລະ ຂອບ​ໃຈ ທ່ານ​ປະ​ທານ​ປະ​ເທດ ແຫ່ງ ສ​ປ​ປ ລາວ ທີ່​ໄດ້​ຕອບ​ຮັບ​ການ​ເຊື້ອ​ເຊີນ ແລະ ສະ​ລະ​ເວ​ລາ​ນຳ​ພາ​ຄະ​ນະ ເຂົ້າ​ຮ່ວມກອງ​ປະ​ຊຸມສຸດຍອດ ຝຣັງໂກໂຟນີ ຄັ້ງທີ 19 ທີ່ນະຄອນຫຼວງປາຣີ ຄັ້ງ​ນີ້, ເຖິງວ່າ ສ​ປ​ປ ລາວ ຈະຢູ່​ໃນ​ໄລ​ຍະ​ກະ​ກຽມ​ກອງ​ປະ​ຊຸມ​ສຸດ​ຍອດ​ອາ​ຊຽນ ໃນ​ເວ​ລາ​ອັນ​ໃກ້​ນີ້. ​ພ້ອມ​ດຽວ​ກັນ, ກໍ​ໄດ້​ຕີ​ລາ​ຄາ​ສູງ ແລະ ຊົມ​ເຊີຍ​ການ​ເປັນ​ເຈົ້າ​ພາບ ຈັດ​ກອງ​ປະ​ຊຸມ​ດັ່ງ​ກ່າວ ຂອງ ສ​ປ​ປ ລາວ ແລະ ໃຫ້​ການສະ​ໜັບ​ສະ​ໜູນ ການ​ເຊື່ອມ​ໂຍງ-ເຊື່ອມ​ຈອດ​ພາກ​ພື້ນ ທີ່ ສ​ປ​ປ ລາວ ຖື​ເປັນ​ບຸລິ​ມະ​ສິດ ໃນ​ກອງ​ປະ​ຊຸມ​.

          ໂອກາດນີ້, ທ່ານປະທານປະເທດ ແຫ່ງ ສປປ ລາວ ໄດ້ສະແດງຄວາມຂອບໃຈຢ່າງສູງ ຕໍ່ ທ່ານປະທານາທິ ບໍດີ ເອັມມາ ນຸຍແອນ ມາຄຣົງ ທີ່ໄດ້ເຊື້ອເຊີນ ຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດ ຝຣັງໂກໂຟນີ ຄັ້ງທີ 19 ທີ່ຝຣັ່ງ ເປັນເຈົ້າພາບ ແລະ ຊົມເຊີຍ ຝຣັ່ງ ໃນການເປັນເຈົ້າພາບ ຈັດກອງປະຊຸມສຸດຍອດ ຄັ້ງນີ້, ຊຶ່ງເປັນ ກອງປະຊຸມສໍາຄັນ ເພື່ອສົ່ງເສີມການພັດທະນາ ແລະ ການນໍາໃຊ້ ພາສາຝຣັ່ງ ໃນທົ່ວໂລກ. ພ້ອມທັງໄດ້ຊົມເຊີຍ ຕໍ່ປະເທດ ຝຣັ່ງ ທີ່ໄດ້ປະສົບຜົນສໍາເລັດ ໃນການຈັດງານ ມະຫາກຳກິລາໂອແລັມປິກ ແລະ ປາຣາແລັມປິກ 2024 ຜ່ານມາ ເຊິ່ງເປັນການປະກອບສ່ວນສໍາຄັນເຂົ້າໃນການສົ່ງເສີມມິດຕະພາບ, ຄວາມສາມັກຄີ ແລະ ການຮ່ວມມືຂອງ ວົງຄະນະຍາດສາກົນ ແລະ ຊົມເຊີຍ ຕໍ່ຜົນສໍາເລັດ ໃນການພັດທະນາ ເສດຖະກິດ-ສັງຄົມຂອງຝຣັ່ງ ພາຍໃຕ້ການ ນໍາພາ-ຊີ້ນໍາຂອງ ທ່ານປະທານາທິບໍດີ ເອັມມາ ນຸຍແອນ ມາຄຣົງ ອັນໄດ້ເຮັດໃຫ້ປະເທດຝຣັ່ງ ສືບຕໍ່ມີບົດບາດທີ່ ພົ້ນເດັ່ນໃນເອີຣົບ ກໍຄື ໃນເວທີໂລກ. ພ້ອມກັນນີ້, ທ່ານປະທານປະເທດ ຍັງໄດ້ແຈ້ງສະພາບ ການພັດທະນາເສດຖະກິດ-ສັງຄົມ ຢູ່ ສປປ ລາວ ໂດຍລວມ ສັງຄົມມີສະຖຽນລະພາບ, ມີຄວາມສະຫງົບ, ເສດຖະກິດມີການຂະຫຍາຍ ຕົວຢ່າງຕໍ່ເນື່ອງ ແລະ ການ​ກະ​ກຽມ​ຈັດ​ກອງ​ປະ​ຊຸມ​ສຸດຍອດ​ອາ​ຊຽນ ຄັ້ງ​ທີ 44-45 ທີ່ ສ​ປ​ປ ລາວ ເປັນ​ເຈົ້າ​ພາບ ໃນອັນໃກ້ນີ້.

        ໃນການພົບປະ ສອງຝ່າຍຍັງໄດ້ຕີລາຄາສູງ ຕໍ່ການພົວພັນຮ່ວມມືກັນ ໃນໄລຍະຜ່ານມາ ແລະ ມີຄວາມປິຕິຍິນດີ ທີ່ເຫັນວ່າ ການພົວພັນຮ່ວມມື ລະຫວ່າງ ລາວ-ຝຣັ່ງ, ຝຣັ່ງ-ລາວ ໄດ້ຮັບການເສີມຂະຫຍາຍຢ່າງຕໍ່ເນື່ອງ ຕະຫຼອດຫລາຍທົດສະວັດຜ່ານມາ, ສະແດງອອກ ສອງຝ່າຍ ໄດ້ມີການສະເຫລີມສະຫລອງ 70 ປີ ແຫ່ງການສ້າງຕັ້ງສາຍພົວພັນການທູດ ລາວ-ຝຣັ່ງ, ຝຣັ່ງ-ລາວ ໃນປີ 2023 ຜ່ານມາ.  ການຮ່ວມມືດ້ານການເມືອງ ສືບຕໍ່ເປັນປົກກະຕິ, ຮັກສາການແລກປ່ຽນຢ້ຽມຢາມ ຂອງການນໍາຂັ້ນສູງ ກໍຄື ປະຊາຊົນຂອງສອງປະເທດ; ດ້ານເສດຖະກິດ, ສອງຝ່າຍໄດ້ຮ່ວມກັນຊຸກຍູ້ສົ່ງເສີມ ຢ່າງຕັ້ງໜ້າ ໂດຍສະເພາະ ການຮ່ວມມືດ້ານການຄ້າ ແລະ ການລົງທຶນ, ຊຶ່ງ ຝຣັ່ງ ເປັນປະເທດອັນດັບຕົ້ນໆໃນຂົງເຂດເອີຣົບ ທີ່ລົງທຶນຢູ່ ສປປ ລາວ ໂດຍມີມູນຄ່າການລົງທຶນ 558 ລ້ານໂດລາສະຫະລັດ ໃນ 227 ໂຄງການ.

​         ໂອ​ກາດດຽວກັນ​ນີ້, ທ່ານປະທານປະເທດ ແຫ່ງ ສປປ ລາວ ຍັງ​ໄດ້​ສະ​ແດງ​ຄວາມ​ຂອບ​ໃຈ​ ຕໍ່​ລັດ​ຖະ​ບານ ກໍຄື​ ປະ​ຊາ​ຊົນ​ຝ​ຣັ່ງ ທີ່​ໃຫ້​ການ​ສະ​ໜັບ​ສະ​ໜູນ, ​ຊ່ວຍ​ເຫຼືອ ແລະ ປະ​ກອບ​ສ່ວນ ເຂົ້າໃນ​ການ​ພັດ​ທະ​ນາ ​ເສດ​ຖະ​ກິດ-ສັງ​ຄົມ ຢູ່ ສ​ປ​ປ ລາວ ແລະ ຫວັງວ່າ ​ຝ​ຣັ່ງ ຈະສືບ​ຕໍ່​ສະ​ໜັບ​ສະ​ໜູນ ຊ່ວຍເຫລືອ ສ​ປ​ປ ລາວ ໃນ​ຕໍ່​ໜ້າ.